SA PINAKAUNA nga kahigayunan, nasaksihan kag nabati-an ko nga nangin matigdas ang mga tinaga nga kaundan sang mensahe ni Mayor Jose Espinosa III sa iya paghambal sa atubang sang mga barangay officials sa turn over sang mga propedad kag dokumento sang outgoing punong barangays sa incoming officials kag sa iya pagpasumpa sang mga opisyal sang Sangguniang Kabataan sang nagligad nga Byernes.
Indi man pwersado ang pag-deliver sang mensahe, pero mabug-at ang mga tinaga nga ginabungat sang alkalde.
Pahayag sang alkalde sya ang magapirma sang mga papeles kalakip na ang paghatag sang Fidelity Bond sa mga elected barangay officials agud maka-disburse sila sang pondo sang barangay.
Dugang pa sang alkalde nga kun may makahatag sang kaangay nga dokumento sa mga kapitan, okay lang. Sa pihak sini pasalig ni Espinosa, bukas ang iya opisina sa mga gusto magpalapit sa iya.
Ini ang una nga higayun nga nangin prangka ang alkalde sa mga kapitanes. Sa makapila na ka ti-on nga ginpahayag ginapunggan sang pihak nga kampo ang mga kapitan nga magpalapit sa iya, wala sang ano man nga sabat ang alkalde. Bisan sang Marso nga nagdeklarar si Cong. Jerry Treñas nga ginaindorso sya sang mga kapitan nga magbalik sa pagkaalkalde, blangko ang reaksyon sang alkalde.
Sa malawig nga tion laragway sang kampante nga tawo ang alkalde. Kaangay nga indi sya apektado sa ano man nga hulag sang iya bilas. Bisan pa nga ginatirada na, wala gihapon sang reaksyon si Joe III. Siling lang niya, wala anay politika, governance lang kita.
Pero subong nga nagahilapit na ang election, nagaumpisa na bala sa pagpamwersa si Joe III? Kun sa Ingles pa, “Is Joe III flexing his muscles now?”
Nagaumpisa na ayhan si Joe III sang iya plano pulitika? Siling sang iban sekreto lang nga nagapangamang ang mga tinawo ni Joe III.
Pinakapwersa nga nahimo sang alkalde amo ang pagkakas sang mga job hires nga kuno kaalyado ni Treñas. Sang nagligad nga semana naglapta ang text nga may 600 naman ka job hires nga ginkakas. Pero kun si City Administrator Hernando Galvez ang pahambalon, indi termination ang natabu kundi non-renewal of contract nga normal lang nga nagakatabu sa contract-based nga mga empliyado. Kun ano man ang tawag sini, ang lihok pagpakita sa gihapon sang pagpamwersa sang alkalde.
Sa mga nagpungko sa city hall sya lang ang nagpangisog nga magtandog sa mga job hires. Ini bala pagpakita nga kampante sya ano man ang bungahon sini?
Bantayan ang masunod nga pagpamwersa ni Joe III./PN
