PORMAL na nga nagsugod ang 45 ka adlaw nga pagpanglakaton sang mga lokal nga kandidato agud nga siguruhon nga maangkon ang boto sang mga rehistrado nga botante sa ila tagsa ka lugar nga nasakupan.
Mabatian na ang ang ila katampad sa pagserbisyo, ang ila pagkamaalwan sa tawo, kag ang ila paghandom nga mabatak ang tanan sa kapigaduhon.
Apang ang kampanya isa ka planado nga tikang agud nga masiguro ang kadalag-an, paglantaw ini sa sitwasyon kon ang kandidatura mapag-on kag kon may higayon nga ang kandidato maluyagan sang mga botante.
May mga kandidato nga ang ila ginalantaw amo ang kadalag-an lamang ukon ang resulta sang ila ginahandom, apang wala nila ginatun-an kon ano ang sa tunga sang panugod kag resulta sang kampanya.
Dapat ginapalibutan ang kandidato sang maayo nga hubon nga nagahimulso, nagaplano, kag nagagiya sa kandidato sa husto nga tikang agud nga maka-usoy sa bana sang kadalag-an.
Sa una pa lang, dapat makita sang kandidato ko may higayon siya nga magdaug. Dapat napakilala na niya ang iya kaugalingon ukon nakapasad na siya sang ngalan sa pulitika ukon pamilyar sa iya ang mga tawo agud nga mapagkit sa ila pang-ino-ino ang ngalan sang kandidato. Kon malutos sang makaduha ka beses, malayo ang higayon nga magdaug pa sa ikatatlo ka beses bangud ang mga botante nagakalas-ay sa kandidato nga wala nagadaug.
Hibaluon man ang kadamuon sang rehistrado nga botante kag kon pila ang kadamuon sang boto nga mahimo makapadaug sa kandidato. Indi tanan magaboto sa kandidato, apang mas maayo kon masiguro ang numero sang boto nga makapatungtong sa pwesto.
Dapat maghimo sang paagi kon paano ka matalupangdan sa tunga sang madamo nga kandidato. Ipahibalo kon ngaa ikaw gid ang pilion labaw sa imo mga kasumpong.
Ipalab-ot sa mga botante ang mensahe sang katuyuan sa imo pagpapili. Ipahibalo kon ano ang imo ikasangkol, ipakita ang kinaadman kag kon ano ang imo mabulig sa komunidad.
Indi magkahuya ang kandidato sa pagpangabay sa mga botante, sa pagpanuktok sa ila mga ganhaan kag sa pagpangayo sang ila bulig. Ang pagkampanya amo ang pagpangayo, sa tanan nga tion, sang pabor ukon bulig gikan sa mga pumuluyo.
Maathag ang reyalidad nga dapat may pondo ukon badyet ang kandidato sa iya paglunsar sang kandidatura. Planuhon sing maayo kon paano padalaganon ang kampanya sa gintigana nga pondo kag dapat hibaluon kon pila gid ang balor sang dapat gamiton agud nga makalabaw sa mga kasumpong.
Tuon sa pagpamati. Ang kampanya indi lamang tuhoy sa imo kandidatura kundi tuhoy sa botante. Masami nga nagapokus ang kandidato sa kon ano ang mensahe nga luyag niya mapalab-ot sa mga botante. Dapat pamatian ang mga botante kag ang ila mensahe amo ang ipalab-ot sa ila bangud ini ang luyag nila mabatian gikan sa imo kag ini ang nahangpan nila nga mensahe kag sa pagbungat sang kandidato, ginakabig nila nga nagaupod ang kandidato sa ila sitwasyon.
Balikdon ang mga pigado, ugyunan ang magkatuhay nga mga grupo sa komunidad kag ipabatyag ang imo pagtatap sa ila.
Ang kampanya indi lamang sa pagsugid kon sin-o ang kandidato kundi ang pagtukib kon sin-o ang nagaboto. (bertladera@gmail.com/PN)
