ILISIPON na lang ang inadlaw sa paghiwat sang kampanya sang mga lokal nga kandidato. Maathag nga 17 ka adlaw na lang ang nabilin ukon umpisa subong tubtub Mayo 11 nga katapusan sang adlaw sang kampanya.
Madamo na sang propaganda nga nabatian, madamo na sang programa kag proyekto ang ginhumlad sa tawo agud nga ila himuon sa tion nga magdaug sa eleksyon.
Sa syudad sang Iloilo, manami pamatian ang mga plano kag programa, maka-ingganyo sa dulunggan ang mga handom nga luyag matuman sang mga nagapadalagan.
Kahibalo man ang tanan nga may iban sa ila nga maayo lang sa paghumlad sang mga handom apang kon yara na sa pwesto, daw indi na makadumdom. Nagakalipat sila sang ila mga ginpasalig, nagalikaw sila sa ila ginpasaligan kag tuhay na ang ila ginahulag nga supak sa ila mga gintug-an.
Madamo sa ila ang nagpalanog sang huring-huring sadto pa nga nagatuyo pa lang sila nga magpadalagan nga preparado sila, nga madamo sila sang ginahanda nga kwarta kag handa sila nga mag-atubang sa bisan sin-o man ang ila mangin kasumpong.
Apang ang tawo, kaangay sang subay nga nagakaila sa pagpalapit sa lugar nga may yara sang kalamay. Nagaka-ingganyo sila bangud man sa pasalig sa ila, bangud sa igahatag sa ila, kag bangud sa bulig nga ginatan-ay sa ila.
Madamo lang sang padugi ang mga kandidato sa syudad sang Iloilo. Bisan nga nagasinggitan sila nga suportado sila sang madamo nga botante apang ang ila kakibang ang ila ginatago nga basi sila ang malutsan sang ila mga kasumpong.
Bisan pa nagasiling ang grupo ni Congressman Jerry Treñas nga mapag-on sila apang indi malipod nga nagabatyag man sila sa humlad sang hitabu sa tagsa ka maglabay ang inadlaw.
Madamo man sang sorpresa ang kampo ni Mayor Jose Espinosa III, nagatipon man siya sang madamo nga tawo gikan mismo sa kabarangayan kag masakit tulukon ang tumpok sang madamo nga tawo.
Indi man lipod sa ihibalo sang tanan kon paano magmaniobra ang grupo ni Dr. Pacita Gonzalez. Madalom ang iya pagpasad sang organisasyon. Pino ang iya mga hulag apang madamo sang lideres siya nga natipon sa tagsa ka mga barangay.
Samtang nagahilapit ang adlaw sang piniliay, may kandidato nga hapuon, kapuyon kag mawad-an sang papay. May mga kandidato naman nga marot ang hulag kag nagatigana sang iya pwersa kag kwarta sa ulihi nga hugnat sang pagkampanya.
Makaluluoy lang ang kandidato nga naunahan sang iya nga bugal ilabi na ang nag-una sugid sang iya pwersa kag kwarta bangud nga sa ulihi mahubsan kag kapuyon gid siya.
Ang pagtipon sang tagsakdag indi madala sa pagtikal sang madamo nga manggad ukon mangin buhaha sa pagtagtag sang kwarta sa mga tawo agud nga magsuporta sa imo kandidatura.
May mga botante nga bulag sa kamautoran, may mga botante nga ang ila mata ginatabunan sang kwarta, kag may mga botante nga tudok ang pagsuporta sa iya nahamut-an nga kandidato.
Wala pa sang may makasiguro sang kadalag-an magluwas lang kon may ginhakyaw na nga kamot ang Comelec.
Ang kadalag-an nasandig sa kampanya kag kandidatura. (bertladera@gmail.com/PN)
