PINASAHI ang naaguman nga kadalag-an sang mga banwa sang Tigbauan kag New Lucena tungod nga sila ang nagkampiyon sa tagsa nila ka kategoriya sa Provincial Legislative Awards para sa Search for the Most Outstanding Sanggunian in the Province of Iloilo nga ginhiwat sang Biernes, Abril 12, 2024 sa Grand Xing Imperial Hotel sa syudad sang Iloilo.
May mga criteria nga ginplastar, sa bulig sang Department of Interior and Local Government, agud nga mangin talaksan sa pagtukib kon ano nga local government unit sa probinsya sang Iloilo ang mas labaw kaysa sa iban kon lehislasyon ang paga-istoryahan.
Nangin maragtason ini tungod pinakauna kag dalayawon nga lihok nga ginapapag-on paagi sa ginpasar nga Provincial Ordinance No. 2022-288 nga may tigulo “AN ORDINANCE ESTABLISHING THE SEARCH FOR THE MOST OUTSTANDING SANGGUNIAN IN THE PROVINCE OF ILOILO AND PROVIDING MECHANICS THEREOF”.
Ang natumod nga ordinansa gin-author ni Vice Governor Christine “Tingting” Garin, gin-sponsor nanday 2nd District Senior Board Member June Mondejar kag Ex-Officio Board Member Ramon Sullano sang PCL-Iloilo kag gin-co-sponsor nanday 4th District Board Member Rolando Distura kag 2nd District Board Member Rolito Cajilig.
Ang ordinansa pagakilalahon sa iya malip-ot nga tigulo nga “Search for the Most Outstanding Sanggunian in the Province of Iloilo”.
Gin-evaluate kag ginkilala ang performance sang legislative branch sang kada component unit.
Isa ini ka palaagyan para sa madamo pa nga mga pag-imprubar, inobasyon, kag maayo nga buluhaton sa Sanggunian sang component units sa Probinsya sang Iloilo nga mangin instrumento sa pag-agom sang iya vision kag mission nga nadesinyo sa pagduso sang general welfare sang iya mga nasakupan.
Nangin kampiyon ang banwa sang Tigbauan sa Category A nga ginalakipan sang component city, first class kag second class municipalities. Nagbaton sang 100,000 pesos nga padya ang Tigbauan, samtang 1st Runner-up naman ang banwa sang Pavia nga nagbaton sang 75,000 pesos nga padya, nangin 2nd Runner-up ang banwa sang Oton nga nagbaton sang 50,000 pesos kag 3rd Runner-up ang City of Passi nga nagbaton sang 25,000 pesos.
Sa bahin sang Category B nga ginalakipan sang mga 3rd Class tubtob 6th Class municipalities, nangibabaw ang banwa sang New Lucena nga nagbaton sang 100,000 pesos nga padya, nangin 1st Runner-up ang banwa sang Tubungan nga nagbaton sang 75,000 pesos nga padya, nangin 2nd Runner-up ang banwa sang San Miguel, Iloilo nga nagbaton sang 50,000 pesos nga padya, kag nangin 3rd Runner-up ang banwa sang Guimbal nga nagbaton sang 25,000 pesos nga padya.
Lunsay nagbaton sang Certificate of Participation ang 14 ka mga LGU nga nagpasakop diri.
Sa akon personal nga paglantaw, lubos ako nga nagadayaw sa banwa sang Tubungan tungod nga bisan gamay nga banwa kag kabus sa pondo para sa pagpasanyog sang ila imprastruktura apang nagapangita sila sang paagi agud nga makaserbisyo sa ila pumuluyo.
Tungod nga wala sang talatapan ang tagsa nila ka mga sangguniang bayan member, gingamit nila ang opisina sang mga departamento sang local government unit nga nakasantu sa komitiba nga ila gina-uyatan agud didto mag-opisina sa isa ka bes sa kada semana agud nga maatubang ang ila pumuluyo kag maatipan ang ila mga kinahanglanon.
Kahibalo gid magpangita sang paagi ang Sangguniang Bayan sang Tubungan sa pagpamuno sang ila presiding officer nga si Vice Mayor Leo Cesar Taypen kag sa liderato ni Mayor Roquito Tacsagon.
Kabay pa nga mangin inspirasyon ini sa iban nga local government unit nga maghimakas agud nga makaserbisyo sa mga pumuluyo sang ila banwa.
Mas makapaminsar sila kon paano makapasad sang mga resolution kag ordinansa nga mas makahatag sang benepisyo sa mga pumuluyo.
Daku nga bulig sa mga LGU ang ini nga search agud nga mas mapaayo ang ila serbisyo, mas mapatudok ang ila katungdanan sa banwa kag makapangita sang dugang nga paagi kon paano pa gid mapasanyog ang ila serbiyo.
Sa pagpadayon sang sini nga search, mas pa nga maimprubar ang lokal nga lehislasyon sang tagsa ka local government unit. (bertladera@gmail.com/PN)
