NAGLIPAS na ang Valentine’s Day. Wala ka sang “date” sa sina nga adlaw bangud wala ka sang kahagugma apang nalampuwasan mo kag buhi ka sa gihapon.
Wala ka naila kag nagpadala sa daludo sang balatyagon kag nagkapyot sa tunukon nga sitwasyon bisan pa nga natublag ka sa mga nakita sang imo mata nga ang palibot lunsay pula, nagapares-pares ang magkahagugma, kag matam-is ang yuhum sang kada isa.
Bulahan ka nga nalampuwasan mo ang hangkat sang panahon. Nangin mapag-on ka sa tentasyon. Nagpabilin ka nga hangaway sa tunga sang naga-ulan nga mga sunlog kag yaguta.
Wala sang problema ang pagka-single. Madamo sang benepisyo nga ginadulot ini sa kaugalingon, sa aspeto sang pinansyal, propesyunal ukon bisan pa sikolohikal.
Kapin sa 34 million ang single nga tawo sa Pilipinas suno sa 2015 Philippine mid-decade census. Kon indi pag-ilakip ang 20-anyos kag panubo, may yara sang kapin sa 14.8 million ang single nga Pinoy.
May kabug-usan nga 4.8 million ka single ang Metro Manila, kon sa diin ang 2.5 million ka tawo ang nagap-edad sang 20 tubtub 80-anyos.
Nagapanguna ang Quezon City nga may pinakadamo nga single nga nagalab-ot sa 1.1 million kag 576,095 diri ang yara sa edad nga 20 tubtub 80-anyos.
Nakita sa pagtuon nga ang iban luyag magpabilin nga single bangud sa ila paglantaw nga dapat unahon nila ang mataas nga halintang sang edukasyon kag makakita sang maayo nga trabaho nga may manami nga sweldo agud nga makapili sila sa kon paano patin-aron ang ila manggad.
Samtang nagahilway ang isa ka tawo, mas nagadugang ang iya kalipay bangud nga wala sang palaligban, wala sang ulikdan ukon wala sang nagatublag sa iya.
Mas kontento ang mga ulitawo sa ila kaugalingon kag sa paghimo sang mga bagay nga ila naluyagan. Mas may panahon sila sa ila kaugalingon, hilway sa pagpili sang panahon sa paghinguyang sa ila mga naluyagan kag mas makahatag sang pokus sa ila ginahingad-an nga buhaton.
Nagapanguna sa listahan sang mga pagbag-o sa sosyudad, ilabi na sa kababaihan, ang kahilwayan sa pinansyal nga amo ang nagahatag sang ikasarang sa madamo nga ulitawo.
Tuman na kadamo karon sang mga babaye nga nagaganar, may kaugalingon nga pangita kag bastante sa kwarta agud nga isuporta sa ila mismo kaugalingon kag sa ila mga kabataan nga wala na nagapangita sang mangin bana agud masuportahan ang pagpangabuhi.
Kaangay man ini nga sahi sang mentalidad ang natalupangdan sa mga pagtuon sa iban nga pungsod kaangay sang China, Japan kag South Korea. Mas luyag sang mga babaye nga wala sang may makaupod nga lalaki sa kabuhi bisan pa nga nagahandom man sila nga may yara sang anak. Ang iban ang nagapaidalom sa ginatawag nga ‘in vitro fertilization’ agud nga magkaanak nga wala sang lalaki nga naga-unay sa ila luyo.
Luyag sang mga babaye nga hilway sila sa gahum sang mga lalaki. Mas ginapili nila nga wala sila sang ugtasan sa ila kabuhi. Mas ginapili man nila nga magpadaku na lang sang bata, kag posible may mga lalaki man nga naga-ambit sa sini nga panimuot.
Nagaligwat na ang panimuot sang iban nga tawo tuhoy sa pagpakigrelasyon. Indi naton sila mabasol kon may panan-awan sila nga mas benepisyo para sa ila nga wala sang katimbang sa kabuhi, mas hilway ang ila paghulag kag wala sang sablag sa paglab-ot sang ila handom sa kabuhi. (bertladera@gmail.com/PN)
