HOLIDAY Blues. Ini ang paglaragway sang mga experto sa balatyagon sang kasubo sa ti-on sang mga masadya nga panahon kaangay sang Paskwa.
Ginasiling nga isa ini ka kamatuoran nga dapat talupangdon sang atun mga otoridad.
Ngaa bala bisa sa panahon sang Paskwa may nagautas sa ila kabuhi? Ini bangud apektado sila sang ginatawag nga holiday blues ukon kapung-aw sa pihak nga dapat magkinasadya ang tanan.
Madamo sang kabangdanan ini nga balatyagon apang sa masami simple man lang ang kabangdanan nga mahimo natun malikawan. Kun Paskwa ang atun kasakuon amo ang masami nga nagahatag sa atun sang stress. Ang kapaslawan nga matuman ang tanan nga plano nagahatag sa atun sang kasubo.
Pero bilang isa ka ordinaryo nga tawo mahimo kita makalikaw sini nga balatyagon kun magpalayo ukon limitahan naton ang alcohol ukon makahulobog nga ilimnon. Ang alcohol makaapekto sa modo sang tawo.
Ang madamo nga Christmas events rason man nga ginakulang kita sang tulog. Pulaw-pulaw dala tagay…pagkasunod nga adlaw hangover kag sakit sa ulo. Plus, sakit man sa bulsa. Ang kumpleto nga oras sang tulog ginasiling nga makapaayo sang modo sang tawo.
Sa pihak sang atun kalipay indi malipat sa pamilya. Dumdumon ang mga himata bangud ini nga mga tawo amo ang matuod nga kadampig sa ti-on sang kasubo. Dapt magpain sang ti-on kaupod sa ila. Indi man magkahuya magpautwas sa ila sang mga kasubo nga ginabatyag sa kabuhi.
Ay abaw indi gid magpatama sa pagkaon. Ang ginatawag nga overindulgence makaapekto sa atun modo kag ikaayong lawas. Ginasiling nga ang maayo nga panglawason, nagabunga sang maayo nga paminsaron.
Sa kadamuon sang mga pagakaon sa mga parties, kinahanglan nga magsunog sang calories sa lawas. Ang maayo nga panglawason makabatak sa atun gikan sa kasubo.
Labaw sa tanan indi maghandum sang sobra. Maghandom lang sang masarangan, bangud ang kapaslawan nga malambot ang atun handum, ugat man sang atun kasubo. (jpranco1975@gmail.com/PN)
