PADAYON nga naga-init ang isyu sang mandatory vaccination, partikular sa hingyo nga ipatuman ang “No vaccination, No work” policy, diri sa siyudad.
Angot diri, luyag ta pasalamatan si Mayor Jerry Treñas nga wala dayon nagmando sini, kundi ginkuha anay ang opinyon sang mga pumuluyo parti sini.
Sa aton Demokrasya, naga-involver ini sang legal kag moral nga mga isyu angot sa kahilwayan sang tawo – sa iya konsyensya (Freedom of Religion), “right to have a choice” katulad sang kon magpabakuna ukon indi, “equal opportunity to survive”, kag “Right to Life”.
Ang iloy-iloy gid sining problema, para sa aton, amo kon bala mabaton sang aton pumuluyo ining mandatory vaccination sa ila konsyensya, nga mabudlay sikwayon kay gaangot ini sa ila pagtuo sa Diyos. Kontrahon mo na ang tanan indi lang ang Diyos!
Labi na gid kay may matudlo kita nga malain nga natabo sa pila ka tawo nga nagkontra sa Diyos. Katulad abe sang nagpahambog nga mas popular pa siya kay Kristo. Subong man ang isa ka diktador nga nag-agaw sang kinamatarong sang Diyos sa kabuhi nga Siya mismo ang nagtuga. Labi na gid kay sobra 6 ka milyon ka inosente nga mga tawo gid ang iya ginpapatay.
Napatay ini sila sa indi ma-explicar nga kabangdanan kag sa iban pa nga hitabo nga pwede masiling naton nga nagdala na sa ila derecho sa Impiyerno.
***
Well, ang mga dalagku nga mga relihiyon wala naga-prohibir sang ila mga tumuluo sa pagpa-bakuna. Si Pope Francis sang Roman Catholic Church, nga may sobra isa ka bilyon nga sumulunod, nagpabakuna na gani sang nagligad nga semana.
Ugaling ginatugutan man nila ang ila mga tumuluo sa pagsunod sang ila indibidwal nga konsyensya sa pagpa-bakuna ukon indi.
Daku ini nga rason kon ngaa mamalabag gid ang Simbahan, pati na ang ila sumulunod, batok sa mandatory vaccination. In fact, madamo na ang nagpautwas sang ila magahod nga pagkontra sini.
Ano bala ka importante sa pumuluyo ang ila konsyensya?
Gintilawan ini kontrahon sang gobyerno sang United Kingdom sadto. Ginpa-compulsory sini ang infant vaccination, kag ginpatawan sang fine kag pagka-bilanggo ang mga ginikanan nga indi magsunod.
Nag-riot ang mga pumuluyo batok sini. Tungod sini gin-introduce sa kasuguan ang “conscience clause” nga naga-exempt sa mga “parents who did not believe vaccination was efficacious or safe”.
In fact, diri mismo sa Filipinas indi compulsory ang pagpa-bakuna sa mga kabataan batok bisan gani sa labing makamamatay kag makahalalit nga mga balatian katulad sang measles, rubella, polio, rabies kag tetanus. Voluntary lang.
So, ngaa ipa-mandatory gid naton ining hingyo nga “No vaccination, No work”? Madamo man dira medyos para makumbinse ang mga pumuluyo, katulad sang husto nga edukasyon kag mga perks agud mapasugot.
Kon may ara gid man sing kasuguan nga pwede ipasar, katulad sang isa ka ordinansa sang siyudad, dapat updan ini sang “conscience cause”.
Katulad bala sang yara sa United Kingdom nga naga-exempt sa pagpabakuna sang sin-o man nga nagapati nga indi “efficacious ukon safe” ini para sa ila.
***
Indi man matarong nga kuhaan naton sing trabaho ang indi luyag magpabakuna.
Madamo dira ang madulaan sing pangabuhian, nga magadugang pa sa problema naton sa aton ekonomiya.
Maga-resulta man ini sa diskriminasyon, labi na gid kay pwede ta man proteksyunan ang tanan sa padayon nga pagpatuman sang health protocols.
In fact, wala sing health expert ang makapasalig nga ang mga nabakunahan indi na ma-reinfect sang COVID-19. Madamo na gani kaso sang re-infection.
In other words, wala man sing kinalis ang ila kahimtangan kay pareho man sila tanan – ang nabakunahan kag wala nabakunahan – nga dapat gihapon mag-amlig kag magpadayon sa pagtuman sang health protocols.
Sa matuod, sunu sa mga health experts, bisan ang ginasiling nga “effective immunity” nga mahatag sang bakuna indi man makapasalig sing lubos sa pagpapas sang virus.
Ina tungod bisan ang virus nga na-block sang bakuna dala gihapon ina sang nabakunahan nga pwede niya ilaton sa iban, kag bisan sa iya mismo sa padayon nga pag-mutate sang virus sa bag-o nga kinaiya.
Kon may yara nga bakuna nga makahatag sing lubos nga immunity kag makapapas sing lubos sa virus amo gid lang ang ginatawag nga “sterilizing immunity” nga “rare” matabo. Kag wala ina sa karon nga vaccines, labi na gid kay pang-emergency lang ini./PN
