MALAPIT na lang ang May 2022 presidential election. Sa padayon nga popularity ni President Duterte tubtub sa sining ulihi, ang kalidad nga ini ni Duterte bala ang luyag botohon gihapon sang mga pumuluyo?
Kon amo sina, sin-o sa inyo pensar ang posible nga kahintulad ni Duterte sa iya political group ang dapat nga kandidato nila sa pagka-presidente?
Ugaling kon ang luyag sang pumuluyo lain naman nga personalidad, nga posible halin sa oposisyon, sin-o naman ayhan ini sila?
***
Ano gid bala ang naluyagan sang mga pumuluyo nga padayon ang pagsuporta sa kay Duterte despite sang mabug-at man niya nga mga kasaypanan sa moral kag legal sense sang iban?
Sa mga napasalamatan na sang iban sa kay Duterte, yara ang pag-doble sa sweldo sang mga soldado kag mga pulis. Ginpataasan man ang sweldo kag dugang nga benepisyo sang iban nga mga empleyado sa gobyerno. Pati na ang mga pensionado.
Napahagan-hagan man ang problema sa drug menace kag mga dalagku nga mga krimen, ugaling lang kay daw mas natutok ini sa mga imol samtang mahapos gihapon makalusot ang mga may sarang kag poderoso.
Napamag-an man, ukon libre na gani, ang pagtuon sa pang-publiko nga kolehiyo kag unibersidad. Ginapasige man ang programa para sa mga 4Ps. Napalawak man ang health care program.
Sa sining panahon sang pandemic, may padayon man nga bulig sa mga nawad-an ubra kag agud mapadayon ang negosyo sang iban. May nagakaigu man nga pagtatap sa mga na-quarantine, na-isolate kag natepok sa pandemic.
Napauswag man ang mga dalanon kag mga taytay. Nabuligan man ang mga mangunguma kag iban pa nga sektor sa ila pangabuhian sa masarangan sang gobyerno.
Of course indi mo man ma-please ang tanan. In fact, madamo man ang may reklamo. Diri na masulod ang panindugan sang political opposition labi na gid sa nagahilapit nga May 2022 nga eleksyon.
Isa na seguro ang mga akusasyon batok sa extrajudicial killing nga ginapabangod sa mga soldado kag kapulisan direkta sa command responsibility sang Presidente nga nakalab-ut na gani sa United Nations. Ang gina-alegar nga pang-harass sa mga kritiko labi na gid sa pila ka independent media. Ang padayon nga pagpakig-away sang armado nga komunista nga grupo tungod sa wala gihapon kahusayan nga problema sa agraryo kag kaimolon sa kaumhan.
Kag yara man ang pagpakamalaut ni Presidente sa kay Pope Francis sang pag-abot sini diri sa Filipinas. At worst, sang gintawag niya nga “stupid” ang Diyos nga ginasimba ni Pope Francis kag sang 80 porsyento sang aton populasyon, nga ginatoohan man sang mga Muslim kag Jewish Faith – ang Diyos Amay, ang tagtuga sang una mga tawo nga sanday Adan kag Eba.
Idugang ta pa ang indi ma-intiendihan nga panindugan ni Presidente Duterte sa aton relasyon sa China angot sa aton kinamatarong sa 200-nautical mile nga Exclusive Economic Zone sa West Philippine Sea kag sa Scarborough Shoal, nga gindaug na naton sa Permanent Court of Arbitration sa Hague, Netherlands.
Ining reklamo gin-file sang administrsyon ni former President Noynoy Aquino batok sa China angot sa pag-agaw sangChina sang Scarborugh Shoal sadtong Hunyo 2013.
Gindaug naton ining kaso sang Hulyo 2016, nga nag-legitimize na sang aton claim sa West Philippine Sea kag Scarborough Shoal.
Ugaling lang kay wala ini ginakilala sang China kag padayon nga daw gina-bebe pa gihapon naton ini sa idalom sang administrasyon ni Duterte.
Samtang may sovereign right kita diri, nagagwa gani nga daw luyag ta pa i-surrender ini sa Komunistang China, samtang huyog ta pa nga pakalainon ang United States nga dapat kadampig naton sa demokrasyahon nga Free World.
Well, sa nasiling na naton malapit na ang May 2021 nga eleksyon. Kamo, nga mga pinalangga naton nga mga kasimanwa, na lang seguro ang mag-binagbinag kon sin-o gid tagaan ninyo sing pagsakdag. Of course, pagkatapos sang inyo nagakaigu nga pagbinag-binag sa pagsugod na sang pag-file sang kandidatura sa palaabuton nga Oktubre.
Ang may panimuot bala katulad ni Duterte, ukon bala ang lain nga personalidad nga makapaseguro sang mas maayo nga pangabuhi kag panindugan sa Demokrasya upod ang aton mga ally sa Free World?/PN
