PADAYON nga nagatublag sa tagsa ka barangay ang palaligban sa kon ano ang himuon nga istratehiya agud nga masolbar ang problema sa mga layaw nga ido.
Nabatian naton sang tinalikdan nga adlaw nga nagahulat ang Liga ng mga Barangay sa pag-abot sang rabies vaccine antes magasugod sa pagpanakop sang mga layaw nga ido. Katuyuan sini nga masiguro nga may magamit nga bakuna para sa ido kag para sa tawo nga magapanakop sang ido.
Ginapaminsar sang mga punong barangay nga peligro para sa nagapanakop sang ido kon sila ang makadtan nga wala sang may mapudyot nga bakuna.
Ginapatsekyar man sa tagsa ka barangay kon may yara sila sang badyet nga magamit agud makapahamtang sang dog cage ukon temporaryo nga kurungan sang ido nga layaw nga ila madakpan nga nagalagaw sa ila barangay.
Nagpanugyan ang City Veterinary Office nga dapat tipunon sa kurungan ang mga ido nga layaw kag hatagan sang tatlo ka adlaw ang mga tag-iya nga mabawi nila ang ila ido antes ini dal-on sa dog pound ukon kwaon sang City Veterinary Office agud nga hatagan sang angay nga pagtalupangod.
Malawig na ini nga ginatalakay nga problema. Nagtuga na ini sang gahud syudad kag madamo na sang opinyon ang nabatian tuhoy diri.
Apang, kon aton gid suguran ang tanan, antes pa man nakapasar sang ordinansa ang syudad nga dapat may dog pound kag ang tagsa ka barangay may temporaryo nga pasilidad, may yara na sang kasuguan sa bug-os nga pungsod nga nagamulta sang 500 pesos sa tagsa ka maggwa ang ido gikan sa ugsaran ukon balay sang nagahupot sa ido.
Nalipatan ukon wala lang sang hinalung-ong ang iban nga barangay officials rason nga wala nila ginatalupangod ang ini nga kasuguan kag ginapiyong nila ang ila mga mata sa nagalagaw nga mga layaw nga ido, lakip na ang mga ido sang iresponsable nga mga tag-iya.
Luyag ko lang maghatag sang suhestyon, sa gamay ko nga paghangop agud nga maaktuhan naton ang problema.
Dapat may isa ka barangay kagawad, upod sa pagbuylog sang ila pumuluyo, nga magalibot sa tagsa ka panimalay, listahan ang mga balay kag ang tag-iya nga may ginahuptan nga ido, kon pila ka bilog ang ido, kon may nagabusong nga ido, kon may nagbata nga ido, kon pila ka totoy ang nabun-ag, kon pila ang lalaki kag pila man ang babaye nga ido, kag kon nabakunahan ukon wala.
Paagi sa sini nga inisyatibo mahibaluan sang barangay ang populasyon sang ido, matumod ang mga tag-iya kag mahatagan sang respomsibilidad, mapasabat kon may mga paglapas sa kasuguan, kag mapatudok sa ila ang ila obligasyon sa paghupot sang ido.
Ipahangop man sa ila nga may multa ang nagalapas, may salabton ang nagapatumbaya sa ila obligasyon kag ipasiguro nga ang ila ido nahigtan ukon wala nagalagaw sa dalan.
Pamangkuton man kon may gana pa sila magsagud sang ido kag kon wala na, agud nga maaktuhan kag mapadala na sa dog pound kag didto na talupangdon sang City Veterinary Office.
Bastante kita sa kasuguan, masakit ang penalidad, magasto ang paghatag sang solusyon sa sini nga problema sa ido apang ang tanan nasandig lang sa pagka-responsable sang may ginahuptan nga ido.
Maathag nga ang ido indi problema sa komunidad. Inosente ang mga ido sa nagakatabu. Ang problema yara sa mga patumbaya, iresponsable kag wala sang pasunaid nga mga nagahupot sang ido. (bertladera@gmail.com/PN)
