
BY ROBERTO ‘BERT’ LADERA
NANGIN magansal ang social media tuhoy sa bag-o nga tourism tagline nga “My Heart Beats in Iloilo City.”
Matuod nga wala sang sayop sa grammar kon gamiton ang tinaga nga “in” kag kon gamiton ang tinaga nga “for” suno sa mga naganotar sa sini nga tagline.
Nahangpan naton nga may kaugalingon nga pagpakahulugan ang nagbalay sini kag may mga salandigan kon ngaa ini ang ila napinsaran nga mangin bag-o nga tourism tagline.
Kon aton hangpon, nagapitik ang imo korason kon yari ka sa dakbanwa sang Iloilo. Nanamian ikaw sa mga lalantawon ukon makagalanyat nga mga lugar, istruktura kag iban pa nga tilipunan sang mga tawo. Posible nga nalipay ka sa manami nga nawong sang syudad kag sa mga manamit nga pagkaon nga karon mo lang natilawan ukon ginahanduraw mo sadto nga natilawan mo na karon.
Ayhan, mas mabatyagan mo ang pitik sang imo dughan kon yari ka sa sabak sang syudad sang Iloilo kag luyag mo nga magpabilin sa sini nga lugar.
Ginakampanya sang syudad ang iya industriya sang turismo kag ginapabugal sini ang mga manami nga lugar nga dapat makadtuan kag ma-eksperyensyahan sang mga bisita.
Nahangpan naton ang ini nga pagtinguha sang syudad sang Iloilo.
Apang, may mga pang-ino-ino man ang iban. Matuod nga wala sang sayop sa grammar apang may nakita sila nga mas maayo nga konteksto sa sini nga tourism tagline.
Ang punta sang istorya amo ang kaepektibo sang mensahe nga mapalab-ot naton sa mga kaangay nga Ilonggo kag sa mga lokal kag dumuluong nga mga turista.
Sa akon paglantaw, mas angay ang “My Heart Beats for Iloilo City”. Una, kon diri ka nagapuyo, nagakahulugan nga para sa syudad sang Iloilo ang kada pitik sang imo korason. Mabatyagan mo ang imo pagka-Ilonggo, ang bugal kag dungog mo bilang Ilonggo, kag ang imo kabuhi, ang imo ginahimo, ang imo damgo, ang imo kadalag-an para lang sa syudad sang Iloilo.
Mas masangkad ini nga paglantaw kag paghangop. Madalom ini nga pagpalangga sa syudad kag makasiling kita nga ang akon pagka-Ilonggo para lang gid sa syudad sang Iloilo.
Dugang pa diri, kon ang indi mga tumandok nga naka-eksperyensya sang pangabuhi sa syudad sang Iloilo makasiling nga diri na sila nagtenir kag mangabuhi tubtob san-o tungod diri na ang pitik sang ila korason. Mas nanamian sila sa lugar, mas komportable sila diri sa syudad sang Iloilo.
Kaangay ini sa mga obserbasyon nga nabatian ko, ilabi na sa mga regional directors sang national government agencies nga naglawig diri, mas luyag nila diri sa syudad sang Iloilo tungod nga mas malinong, manamit ang pagkaon, mas gamay sa Metro Manila apang kumpleto na tungod madamo sang de-kalidad nga kolehiyo kag unibersidad. Madamo man sang mga ospital kag iban pa nga mga importante nga sangkap sa pagpangabuhi.
Para sa mga indi tumandok, nagapitik ang ila korason para sa syudad sang Iloilo, indi nila pag-ibaylo sa iban, kag mas pasulabihon nila ang pagpuyo diri ikumparar sa iban nga lugar.
Sa bahin sang mga dumuluong, ang ila nakita sa social media tuhoy sa syudad sang Iloilo ang nagahaylo sa ila nga magpadulong diri. Luyag nila makabisita kag makahangaw-hangaw diri sa syudad sang Iloilo. Sa tagsa nila ka paglantaw sa social media, nagapitik ang ila korason para sa syudad sang Iloilo.
Buot-silingon, yara gid ang luyag nila, mas ginapwersa sila nga maghatag sang tion kag higayon ga magbisita sa Iloilo. Diri ang ila pokus, diri ang ila plano, diri ang ila destinasyon tungod ang pitik sang ila korason napatuhoy para lang sa syudad sang Iloilo.
Kon magsiling kita nga “My Heart Beats in Iloilo City”, sa akon paghangop, yari ka na sa syudad kag naga-eksperyensya na sang kanamion sang lugar.
Kon magsiling naman kita nga “My Heart Beats for Iloilo City”, ginahangop ko nga ang wala pa diri magahimakas gid nga magkadto. Samtang, ang yari diri mas pilion nga magpabilin diri kag ang nakabiya na diri ang nagahanduraw kag daw luyag nga indi magbiya sa lugar kag bitbit gid nila ang mga handumanan nila gikan diri padulong sa ila dutang natawhan.
Sa simple nga pulong, kon “in” ang gamiton daw para lang sa present situation, apang kon preposition nga “for” makabig nga nasakop sini ang nagligad, ang karon, kag ang palaabuton.
Samtang, ginasiling nga gintawtaw pa lamang ini nga tagline. Nagtukob ang pumuluyo kag ginbati sini ang paminsaron sang mga tumandok. Maayo man ini nga madamo nga utok ang nagapalibog kag nagahatag sang ila tagsa ka panan-awan.
Ang importante nga maathag ang mensahe kag katuyuan nga makabulig sa industriya sang turismo sa syudad sang Iloilo.
Nagalaum kita nga indi magbingit ang syudad sang Iloilo kag bukas sa pagbaton sa kaangay sini nga panugdaon agud nga mas mapanami kag mangin epektibo ang tourism tagline.
Dapat matalom kag matahum ang tagline. Matalom agud makapalanuhot sa paminsaron kag balatyagon. Matahum agud nga makaganyat sa tanan. (bertladera@gmail.com/PN)