KAHAPON lang nga adlaw ginkumpermar ni Vice Mayor Jeffrey Ganzon nga magapadalagan sya sa pagka-bise alkalde sa idalum ni Lone District congressman Jerry Treñas. Siling ni Ganzon nakalisensya na sya sa Davao Group nga ginapamunuan ni Davao City mayor Sarah Duterte.
Subong nga nakakumpermar na si Ganzon sang iya linyada, ano naman ang mangin desisyon sang mga city councilors?
Sa ila nga 11, si Councilor R Leone Gerochi lang ang wala nagsumpa sa PDP-Laban sang tinalikdan nga tuig. Ano ang ila mangin linyada? Kay sin-o sila maupod? Kay Cong. Treñas ukon kay Mayor Jose Espinosa III? Siling nila maalwan kuno si Treñas samtang bagit naman si Joe III?
Siling sang isa ka konsehal nga kaupod ni Treñas sa nakaligad nga election, sentimos man lang ang ginhatag ni Treñas sa mga konsehal para sa ila pondo sa kampanya. Bilog kuno nga election ahaw nga P30,000 ang nahatag ni Treñas sa ila tapos damo pa kuno sang estorya kag pamilit. Pero sang amo nga ti-on, wala man sang gin-amot si Joe III.
Sa pinakaulihi nga impormasyon, subong kuno mas galante na si Joe III. Sa isa nila ka meeting sa mga konsehal naghatag sya sang kwarta sa mga konsehal. Medyo madamol man ang bundle.
Sigurado mabudlayan diri ang mga konsehal sa pagdesisyon – sa ila bala madugay na nga kalaalyado sa election? Ukon sa ila subong kaupod sa city hall?
Mangin masadya ini nga election sa 2019 kun mag-engkwentrohanay ang magbilas sa pagkaalkalde. Sigurado nga ang ila mga anay kaalyado mabudlayan man nga magdesisyon.
Samtang sa pihak nga bahin, ano ining impormasyon nga ginakurdam kuno si Treñas subong sa mga hulag ni Joe III sa kabarangayan? Nagasala-sala ang kampo sang kongresista kun paano nila ma-counter ang mga barangay events subong sang alkalde.
Paano mo man abi map-counter ang Pag-ulikid Program sa kabarangayan? Ang simple na lang nga solusyon amo nga gub-on ang ini nga programa paagi sa pag-angut sini sa pulitika. Klaro lang nga ang mahimo nila agud ma-counter ang programa ni Joe III amo nga isyuhan ini sang pangontra.
Daw maathag na ini nga magabungguanay gid ang magbilas. Kun sang una, drama lang ang panan-awan sang iban sa ila ginahimo. Pero kun basehan ang ila mga preparasyon, daw masungay gid ang duha ka toro sa syudad sang Iloilo. (jpranco1975@gmail.com/PN)
