BY THE WAY, may reklamo ang pila ka mga pumuluyo diri sa siyudad sang Iloilo batok sa GDR Taxi.
Sadto madale man lang kuno ang magkuha sang ila unit paagi sa telefono dira sa ila lugar. Matuod, suludlon ining lugar nila kag kon nagaulan ginadanaw ang pila ka bahin sang alagyan dira nga manubo, pero indi man gani problema gid ini.
In fact, madamo nga mga pumuluyo dira ang may salakyan nga balewala man lang ini nga problema sa ila, kon problema gid man. Sige man ang ila pagwa kag pasulod dira nga wala reklamo. Ang iban nga taksi wala man gani gareklamo sa pagdul-ong kag pagsugat sang pasahero dira.
Gani, natingala ang pila ka pumuluyo nga hinali na lang mabudlay na ang pagsulod sang unit sang GDR unit agud magkuha sang pasahero sa ila lugar dira.
Sang ulihi nakabati na lang sila sing reklamo halin mismo sa isa nila ka drayber. Indi kuno sila magsulod diri kay mahigkuan ang ila taksi sang danaw, samtang wala man ini nila ginareklamo sadto.
Gali kay sa pagbalik sang pagluag sang restriction angot sa pandemic nagdamo na ang mga pasahero kag wala na sila kinahanglan magsugat kag magdul-ong pasahero pakadto kag paggwa sa mga puluy-an dira.
Kon matuod, violation man bala ini ang indi pagbaton sang pasahero sang mga taksi samtang pwede man nila mahimo. Indi bala Mr. Land Transportation Office?
Kag ano ayhan ang penalidad diri sa GDR Taxi kon magreklamo ining mga pumuluyo? Nga daan luyag na magreklamo sang pila ka mga pumuluyo sa LTO parti sini nga problema nila sa GDR Taxi.
Sa karon, makalilibog pa gihapon ang sitwasyon sang P680-M nga Ungka Flyover II, nga nagaangot sang Iloilo city kag banwa sang Pavia.
Duha ka bulan kag tunga pa lang nga nagamit ini sang nakita diri ang mga litik (cracks) sa pila ka bahin sang flyover nga nakahatag alarma sa mga nagaalagi dira nga mga salakyan.
Ang pagpanayasat sang rehiyonal nga upisina sang DPWH nagpakita nga ining mga cracks tuga gali sang pag-usmod (vertical displacement) sa bahin kon diin nagatindug ang pila ka haligi (pile post) sini.
Gani gindesisyunan na nila nga ipasara anay ang flyover sugod sadtong Setyembre 18 agud malikawan ang padayon nga pag-usmod sini.
Samtang nagdulot na ini sang pagginutok sang trapiko sa kilid sini nga pwede anay maagyan.
Problema pa ugaling kay sa kadugay nga pagtuon sang regional office sang DPWH indi pa maseguro sini kon ano ang pag-solbar sa problema. In fact, tubtub sining Disyembre, mga tatlo ka bulan na ang nagligad, indi pa makasiling ini kon ano gid ang ila bagay himuon.
Tungod sini gani, ang Pavia municipal council nagpasar na sing resolution sadtong Disyembre 12 agud ma-imbestigaran na ining problema sang DPWH Central Office.
Wala kita nagapakanubo sang abilidad sang DPWH-6 kag sang contractor sini nga International Builders Corp. (IBC) agud masolbar ining pag-usmod sang flyover.
Matuod, sandig sa research naton, malawak gid man ang pwede maproblema nila sa pag-resolbar sa sining problema. Madamo sing rason kon ngaa natabo ining pag-usmod sang flyover.
Indi lang kay kinahanglan dugangan ang haligi (pile post), kay basi lain man ang problema. Nga daan ang problema yara sa idalom duta nga indi makita sang “naked eye” sang mga engineer.
Posible ang problema tungod kay nag-collapse ang ginatungtungan nga duta didto sa idalom sang pile. Posible man ang problema sang alignment sang mga structural parts sang flyover. Posible man nga tungod mahuyang ang nagahugot nga semento (concrete). Kag ang madamo pa nga rason angot sa structural procedure, sa kabug-usan.
Ang napaligban sang mga pumuluyo ugaling kon ngaa kadugay gid madiskubrihan ang problema agud matagaan na ini sing solusyon. Mga expert man bala ang mga engineers sang DPWH? Ti ngaa indi pa matultulan ang problema sa sulod na sang tatlo ka bulan kag matagaan na sing solusyon?
Samtang sige ang pag-antos sang mga pumuluyo sa gaproblema na nga trapiko sa kilid sang flyover.
Kinahanglan pa bala naton mag-hire ang isa ka structural consultancy firm nga mas makasarang agud mapadale ang solusyon sa problema nga ini sang flyover?
Nagapin-ut na gani ang dughan sang madamo sa ila pag-ugtas sa daw wala katapusan nga pagdiskubre pa lang gani sang problema! /PN
