AMAT-AMAT na nga naapresyar sang mga pumuluyo ang presensya sang moderno nga mga salakyan nga nagataris sa dalanon sang syudad sang Iloilo kag bisan sa pila ka bahin sang probinsya.
Madamo ako sang nakita nga pasahero nga mas ginapili nila nga magsakay sa moderno nga salakyan tungod nga mabugnaw ukon may aircon kag kombenyente ang pagpungko sang pasahero.
Matuod nga indi mabudlay magsaka tungod nga indi ka na magduko kag wala sang tuhod nga masagairan bangud nga masangkad sa sulod, ilabi na kon wala masyado sang pasahero.
Mapilitan ka lamang nga magtindog kon puno na ang pulungkuan kag kon nagadali ka nga magpauli.
Makasiling kita nga mas mahal ang plete kaysa sa tradisyunal nga jeep apang ang imo idugang nga pila ka pesos may kabaylo nga kombenyente sa imo pagbiyahe.
Kon nagakinot ka kag daw namahalan ka sa plete sa moderno nga salakyan, mas pilion mo ang tradisyunal. Apang sa panahon nga nagabalas ang pasahero sa dalan kag nagapa-una-una lang sakay kon may bakante, indi ka na makapili kon tradisyunal ukon moderno tungod ginaduso ka na sang imo tuyo nga makasakay kag makapauli.
Wala sang may mahimo ang pasahero kon nagadali siya nga makapauli, kon ano ang makalabay nga bakante amo na lang ang iya nga sakyan.
Ang bentaha sa moderno nga salakyan tungod may konduktor nga amo ang nagapanukot sa mga pasahero. Indi kaangay sa tradisyunal nga jeep nga pasahero ka na mangin konduktor ka pa bangud sa naandan nga pagduhol sa plete. Ang indi ko maagwantahan tungod nga may mga pasahero nga maduhol lang sang plete nga daw kaangay may suluguon sa sulod sang jeep. Indi sila kahibalo magpalihog kag magpasalamat.
May pasahero man nga yara sa likod sang driver apang indi magdahu sang plete tungod wala nakabati may earphone sa dulunggan ukon nagapamati ang sonata, may indi gid magduhol tungod natamaran.
Mabudlay sa tradisyunal nga jeep kon may dala ka tungod ayawan ka panigal-ot nga makasaka kag mabudlay sa kada pasahero. Apang sa moderno nga salakyan, may espasyo kag makaplastar ka gid sing maayo.
Natalupangdan ko man nga may estratehiya man ang mga kooperatiba nga magpakigsugilanon sa mga establisemyento ukon sa mga mall nga dira sila maka-park kag maghulat sang mga pasahero antes maglarga. May padulungan na ang mga pasahero kag ang ini nga terminal sa mall bentaha man sa mall mismo tungod nga kon magbakal sang ila kinahanglanon ang mga pumuluyo, may mas malapit nga mall na sila nga makadtuan kag indi na sila pagkapuyon sa pagbarakintol sang ila mga pinamakal.
Nagalaum kita nga indi maglisa sa maayo nga tinutuyo ang moderno nga salakyan sa pagserbe sa mga pasahero. Kag, kabay pa nga may supisyente sila nga sensilyo agud nga makambyuhan nila ang 25 sentimos, 50 sentimos, ukon 75 sentimos sang mga pasahero ilabi na nga may layi kita tuhoy sa husto nga pagkambyo ukon ‘exact change’.
Indi kita malipat nga may layi nga Republic Act 10909 ukon ang The Exact Change Act. Dapat masolusyunan sang kooperatiba kag sang ila konduktor ang problema sa sensilyo kag paghatag sang husto nga kambyo sang ila pasahero.
Subong man, nagalaum kita nga madugangan ang mga yunit sang moderno nga salakyan agud mangin supesyente sa kadamuon sang mga pasahero.
Indi na mabudlayan ang mga pasahero nga nagapauli kon gab-i tungod nga may iskedyul ang biyahe sang moderno nga salakyan. Bentaha ini para sa mga nagakagab-ihan, kaangay sang mga nagatrabaho sa call center, tungod may yara sila sang masakyan kag mas barato ang plete kon ikumparar sa sukot sang traysikol.
Yari kita sa panahon nga may nagapili pa sa tunga sang mahal nga plete batok sa kakombenyente.
Magadikta ang panahon kag mas pilion sang pasahero ang kombenyente bisan mahal ang plete kaysa sa tradisyunal nga jeep nga ginakuhit ka sang iban nga pasahero agud magdahu sang ila plete kag iduhol mo ini sa driver.
Kabay nga hakson sang tradisyunal nga jeep ang mga pagbag-o kag mag-upod sa sitwasyon kag magpakigbahin diri agud nga mangin tayuyon ang ila palangitan-an kag indi sila mahul-an.
Hangpon lang nila nga nagahandom man ang mga pasahero nga indi mabasa sang ulan ukon maagsikan sa sulod sang jeep kag indi mainitan tungod may aircon ang salakyan.
Mas mahal ang bili sang mangin kombenyente apang ini ang ginapangita sang tanan kabaylo sang pila ka piso, kag kon wala na sang opsyon sa ulihi, sa moderno nga salakyan sila ang magakomporme. (bertladera@gmail.com/PN)
