KINAANDAN na nga problema sang syudad sang Iloilo ang krisis sa tubig ilabi na kon panahon sang tinginit kag kon maninit ang tubod sang tubig sa mga gripo gikan sa Metro Iloilo Water District (MIWD).
Nagapangaman ang tanan sa sini nga krisis kag nagamonitor man ang MIWD sa kadalumon kag kabastante sang tubig gikan sa Maasin, apang indi malipod nga sa tagsa ka mag-abot ang panahon sang tinginit nakondisyon na ang pinsar sang tanan nga basi kulabuson kita sa suplay sang tubig.
Ang kahangawa sang tanan ang mas nagatuyom ilabi na kon may mga lugar sa pila ka bahin sang pungsod ang nagaagunto sa sini nga problema, ilabi pa gid kon may palaanggiran kita nga mga dalagku nga syudad nga nagaproblema sa tubig.
Siling nila, ilug-uligan lang kita kag mas ginapapag-on naton ang aton panimuot nga may magaluntad gid nga krisis sa tubig kag agud nga magamit sang gobyerno sang syudad ang bahin sang pondo nga napain para sa kalamidad.
Indi na kita bag-o sa sini nga deklarasyon bangud sadtong tuig 2007 gindeklarar ang “State of Imminent Calamity” kag sang 2009 ginpaidalom man sa “State of Water Crisis” ang syudad sang Iloilo.
Sadtong Abril 21, 2015, gindeklarar man sang konseho nga ipaidalom ang syudad sa “state of imminent water crisis.”
Maathag nga indi na kita bag-o sa sini nga palaligban, may mga eksperyensya na kita kag mga nabakal nga kagamitan. May mga ideya na kita kon paano masolusyunan kon kulangon gid man sang tubig ang syudad.
Apang, dapat mga hibaluon sang tul-id kon bala matuod nga may problema sa suplay sang tubig. Dapat hibaluon kon diin nga barangay ang may problema sa tubig. Indi matago nga madamo sang barangay sa syudad ang wala pa sang linya sang tubo gikan sa MIWD kag ang problema sa tubig ang matag-adlaw na nila nga palaligban kag indi na sila estranghero sa sini nga problema.
Ang isa ka kinaiya sang matuod nga lider amo ang pag-akto sa isa ka bagay antes mangin isa ka daku nga palaligban.
Apang sa sini nga punto, dapat maathag ang mga rason kag balasehan bangud may nagagiya nga kasuguan antes ideklarar nga may krisis sa tubig.
Magaugyon ayhan ang mga punong barangay sang mga apektado nga barangay? Magaupod ayhan ang mga barangay council sa sini nga katuyuan apisar nga kahibalo ang tanan sang lakat sang pamulitika sa syudad sang Iloilo.
Kuntani indi paghigkuan sang pulitika ang masinaw nga katuyuan sa paghatag sang solusyon sa problema sa tubig. Kuntani ang maga-uyat sang pondo para sa pagpatigayon sang bidding para sa suplay sang tubig ang indi masilaw sa kwarta kag ginansya.
Indi na naton pagsuliton pa ang mga nagliligad nga kontrobersya sa krisis sang tubig. Dapat wala na sang isyu nga magtuhaw nga may ginpaboran nga supplier sang tubig. Dapat sundon ang ginasiling nga kalidad sang tubig, nga mainom, kag indi lubog kag tuman kamahal sang presyo.
Nagalaum kita nga wala sang negosyante nga magtuhaw sa city hall sa tion nga ideklarar gid man ang krisis sa tubig. (bertladera@gmail.com/PN)
