MAKAPANAGANG na sing lubos batok sa African Swine Fever ang mga nagapangapin sa probinsya sang Iloilo matapos nga ginpasar ang ordinansa nga ila magamit agud mangin mas mabakod kag may salandigan sa pag-away sa makahalalit nga virus sa mga baboy.
Ginahulat sang Provincial Veterinary Office kag iban pa nga mga opisina sa idalom sang Iloilo Provncial Government ang ordinansa agud lubos nga mapangapinan ang probinsya sang Iloilo batok sa pagsulod sang ASF.
Makabig nga nakabatyag sang ‘sigh of relief’ ang 13th Sangguniang Panlalawigan ng Iloilo matapos nga mapasar ang ordinansa paagi sa liderato sang bise gobernador kag pagbuylog sang mga katapo sang Provincial Board.
Ginpahayag ni 3rd District Board Member Matt Palabrica nga napasar na ang ordinansa nga magadumili sa pagsulod sang livestock transport carriers kag hog vans nga wala sang disinfection certificate kag iban pa nga mga produkto kaangay sang boar semen, pork kag pork products, kag mga produkto nga may lakot nga karne sang baboy gikan sa iban nga lugar nga ginadudahan nga kontaminado sang African Swine Fever.
Nagpasar sila sang ordinansa, bisan pa nga may Executive Order na nga ginapatuman si Gov. Arthur Defensor, Jr. paagi sa Provincial Veterinary Office, agud mas mapabakod ang pagbantay batok sa pagsulod sang ASF.
Isa sa mapag-on nga component sang ordinansa amo ang pagtumod sa mga ‘prohibited acts’ agud makontrol ang pagsulod sang African Swine Fever kag isa diri amo nga gina-require ang mga magasulod nga transport carriers ukon hog vans nga dapat may disinfection certificate ukon ASF-Free Certificate gikan sa ila ginhalinan
Gina-require man sang ordinansa ang mga eroplano ukon barko nga magpresentar sang certificate nga ang ila ginakonsumo nga baboy para sa ila mga empleyado ukon pasahero ang nagikan sa mga lugar nga hilway sa kontaminasyon, ukon gindeklarar nga ASF-free ang ini nga mga produkto sa nakalipas nga 24 ka oras.
Indi dapat pag-i-dispose ang ila leftover ukon mga bilin nga pagkaon nga may pork ukon pork products sa pantalan ukon sa airport sang Iloilo kag dapat idispatsar ini 30 metros ang kalayuon ukon mas malayo pa gikan sa pantalan.
Dapat may foot bath sa entrance kag exit sang sakayan ukon eroplano kag ang mga produkto nga ginabakal sa online nga may lakot nga pork kag pork products ang ginadumilian man nga makasulod sa probinsya sang Iloilo kag dapat nga may certificate nga ASF-free ukon ideklarar nga wala sang kontaminasyon sang ASF.
Gintukod man ang ASF Task Force kag may ginpasad nga apprehension team ukon hubon nga magapangdakop kag ang ordinansa naghatag gid sang unto ukon ngipon agud makapangdakop sa mga nagalapas.
May poder ang Iloilo Provincial Government nga magkumpiskar ukon magpabalik sa mga produkto nga ginapatihan kontamido sang ASF, sa pag-dispose sa mga nakumpiskar nga produkto kag ang pagmulta kag paghatag penalidad sa mga maglapas sa ordinansa.
Ang barko ukon eroplano nga nagkarga sang pork products nga kontaminado sang ASF ang may salabton sa idalom sang kasuguan, ilabi na kon wala nila gintsekyar sa ila ginhalinan ang ginkarga nga produkto nga ginbakal sa online platform.
Ang Provincial Ordinance No. 2021-250 may tigulo “An Ordinance Banning the Entry of Livestock Transport Carriers and Hog Vans to the Province of Iloilo Without Disinfection Certificate and/or African Swine Fever-Free Certificate From the Point of Origin or Port of Exit and Live Pig, Boar Semen, Pork and Pork Products Including Food Items Containing Pork Originating From Manufactured and/or Processed in Areas Affected by African Swine Fever (ASF), as Declared by the Department of Agriculture (DA), and Providing Funds Thereof.”
Ang author sang ordinansa amo si 3rd District Board Member Matt Palabrica samtang co-author naman sanday Vice Governor Christine “Tingting” Garin kag 4th District Senior Board Member Rolando Distura kag sponsor naman sang ordinansa ang chairman sang Committee on Agriculture nga si 2nd District Board Member Rolito Cajilig kag co-sponsor si 3rd District Board Member Jason Gonzales.
Dapat gid nga pangapinan ang bilyon ka pesos nga balor sang hog industry sa probinsya sang Iloilo. Angay nga proteksyunan ang mga mangunguma bangud kon maapektuhan sila, magabatyag man ang mga konsumidor ukon magamahal pa sing lubos ang bili sang karne sang baboy.
Kinahanglan ang kooperasyon sang kada isa agud nga matapna ang pagsulod sang ASF kag mapabilin nga hilway sa sini nga halit ang bug-os nga Western Visayas kag igaduso man ni Palabrica ang resolusyon nga nagahingyo sa iban pa nga mga probinsya kag mga syudad sa Region 6 nga magpasar man sang kaangay nga ordinansa agud masigurado nga indi makasulod ang ASF sa bug-os nga rehiyon. (bertladera@gmail.com/PN)
