SA SULOD sang isa ka semana, makaduha nga naglampas sa 100 mark ang bag-o nga kaso sang COVID-19 sa syudad sang Iloilo.
Samtang ginasulat ini nga balita ang pinakamataas nga na-record amo ang 116 sadtong Huwebes, Mayo 27, kag ang 101 sadtong Meyerkoles, Mayo 26. Samtang nagdangat naman sa 92 ang mga nagpositibo nga empliyado sang City Hall. Sa nakaligad nga isa ka semana naga-daily average ang syudad sang 71 ka kaso kada adlaw.
Sa sulod sang isa ka adlaw nakabaton man ako sang duha ka mga mensahe nga nagahingyo sang bulig nga mapakuha sa ambulansya ang ila himata nga positibo sa COVID-19. Masobra sa duha ka adlaw ang ila paghulat agud kuhaon ang ila pasyente. Nagahibi na nagapalangurog ang tingog samtang nagapangayo sang bulig.
Gilayon ako nakig-angot kay Mr. Jeck Conlu agud mapalambot ang impormasyon kag nagpasalig sya nga kuhaon ang tawo sa pihak sang ila limitasyon. Ang iya pasalig, bisan ma-delay kuhaon gid nila. Kag matuod nakuha gid man ang isa. Apang may isa pa nga wala nakuha.
Mahangpan man naton ang sitwasyon bangud indi lang isa kundi madamo ang nagakinahanglan sang ila sebisyo. Dugangan pa nga may nagapositibo man sa ila opisina.
Apang ang indi ko mahangpan bangud may nagasulod nga impormasyon nga sa isa ka barangay sa Jaro, may tawo nga nagpositibo apang ang iya pamilya nga close contacts nagalagaw kag nagatagay pa. Ang sitwasyon kaangay bala nga normal lang ang kabuhi sa ila. Wala kahadlok, wala sang kabalaka.
Ano ang rason ngaa nagaamo ang mga tawo sini? Wala nagapati sa COVID-19? Wala nagataha sa gobyerno? Gusto lang magpadayaw? Ukon simple lang nga ungo gid ya ang ila utok?
Kun sang una nagaduha-duha pa kita sa kamatuoran sang coronavirus, subang wala ka na sang rason pa nga magpangduhaduha. Maaathag na ang sitwasyon nga nagakapatay ang tawo.
Mahimo indi ka pa makabatyag bangud wala mo ini naagyan pa, ukon bisan imo himata wala man natapikan pa. Pero indi na paghulata nga masunog ka antes maghambal nga mahapdi gale ang paso. Buot ko hambalon, indi na paghulata nga matapikan ka sa COVID-19 antes ka magsiling nga matuod gale.
May kakulangan man ang atun gobyerno apang indi ini ti-on nga magrebelde. Ti-on ini nga magbulig. Ang imo simple nga pagtuman sang mga protocol tuman na nga kontribusyon para sa sosyodad.
Kun indi ka makabulig, palihog indi ka na lang magpasaway-saway!/PN
