[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’LABAY MAN AKON ‘ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
BY RUNJI R. JAMOLO
[/av_heading]
[av_textblock size=” font_color=” color=”]
Bukas nga sulat para kay Mayor
DEAR Mayor Jed Patrick E. Mabilog,
Panginbulahan bisan pila na ka adlaw nga nagligad ang imo kadlawan.
Nag-agi lang nga daw sa wala matalupangdan ang imo birthday karon nga tuig bangud ginpakamaayo mo nga “low key” lang ang selebrasyon. Indi kasubong sang nagliligad nga kompeleto sang fanfare, ang kaadlawan mo karon nga tuig imo ginsaulog paagi sa Santos nga Misa kaupod ang mga mahugod mo nga sumalakdag, kaabyanan kag imo pamilya.
Kon sabagay, pagusto ka kon paano mo saulugon kay ang nagligad nga tuig daw somersault ang kahalimbawa apang maduagon.
Ang nagligad nga isa ka tuig sang imo kabuhi nangin masalimoot apang puno sang pagpanghangkat nga imo man nalampuwasan “with flying colors.”
Upod sa imo kadalag-an bilang “world mayor” ginpakilala mo sa kalibutan ang syudad sang Iloilo. Sang gintawag ikaw nga “drug protector”, upod man sa imo nga nagkahanusbo ang mga Ilonggong syudadano.
Pero bangon, Mayor, magsaulog ka kay bisan sang pila ka setback, ang nagligad mo nga tuig may madamo man nga kadalag-an.
Livable City. Ang Iloilo City ginkilala nga numero uno sa napulo ka livable cities sa bilog nga pungsod. Sunod lamang ang mga syudad sang Metro Cebu, Bacolod, Davao, Roxas, Makati, Cagayan de Oro, Puerto Princesa, Baguio kag Quezon City.
Nominasyon sa Lee Kuan Yew World City Prize 2016, kag madamo pa nga iban kon nga-a gina amag sang mga tourista kag investors ang dakbanwa.
Sang nagligad nga tuig, ang syudad upod sa probinsya nagpanagbalay sang Iloilo leg sang Asia-Pacific Economic Cooperation (APEC) Summit. Pila ka high-level meetings ang natigayon kasubong sang Small and Medium Enterprise (SME) ministerial meeting sadtong Septiembre 21 tubtub 25; ang Senior Disaster Management Officials Forum (SDMOF) sang Septiembre 22 tubtub 23 kag ang Food Security Week (High Level Policy Dialogue on Food Security and the Blue Economy and Related Meetings) halin sang Septiembre 28 tubtub Oktobre 6. Sang Hulyo pa sina nga daan may panguna na nga meeting nga ginpangatubangan.
Indi hamak nga pagpanghanda kag plano ang ginhimo para sa madinalag-on nga pagpanagbalay. Ikaw bilang pinuno sang isa ka LGU nga ginhiwatan sang international event nagseguro nga ang tanan nga bagay maatipanan.
Ang una nga hangkat amo ang venue sang mga sinapol sa Iloilo Convention Center nga natublag pa ang timetable bangud sa pag-question nga nakalab-ot pa sa Senado sa alegasyon nga overpriced. Nahibaluan naman sang tanan nga imo yadto nalampuwasan bangud ang mga importante nga meetings ginhiwat sa ICon.
Ang nagligad nga tuig nangin dako nga hangkat sa imo labi na sadtong 45 ka adlaw nga kampanyahanay sa handum mo nga masugpunan pa ang imo pagpangalagad sa syudad. Wala tuo ang mga isyu nga ginhaboy sa imo sang mga kasumpong mo sa politika apang daw nagtupa lang yadtong mga pagpakamalaot sa imo lideratura sa bungol nga dulunggan sang kadam-an nga mga syudadano sang liwat nga ginhatagan ka nila sang fresh mandate para magpabilin pa sang isa pa gid ka term sa city hall.
Halos 75 porsiento sang actual voters sang Iloilo City ang nagsakdag sa imo bisan sang mga pagtampalas kag akusasyon kontra sa imo pagkatawo. Magluwas sa ginbayaran nga mga pagwaragwag politika, indi man malipod ang nagalinupad lang nga akusasyon sa imo sa social media sa mga alegasyon sang imo kahilabtanan sa mga drug lords nga kuno ang imo kampanya gingastuhan sang drug money.
Samtang ginapanindugan mo nga yadto lunsay mga false accusations, nadutlan ka gihapon sang mga patupatu tubtub nga nagbugtaw na lang ang mga Ilonggo (kag ang bilog nga nasyon) sang nalawagan ang imo ngalan nga yara sa listahan sang mga alkalde nga ginakuno-kuno suportado sang mga drug lords.
Gilayon mo nga ginpadulungan ang Campo Martin Delgado matapos sang imo paathag sa mga telebisyon, waragwagan kag pahayagan. Bisan nga imo gina-protest ang paglamita sang imo ngalan, imo man gindiretsuhan ang Campo Crame bilang pagsunod sa mando sang Presidente.
Seguro gid man, nasobrahan ang imo paghatag sang pagtamod sa mga bagay para sa ikatin-ad sang ekonomiya sang syudad kag pagpahamtang sang maayo nga infrastructure nga imo naligaan ang iban pa nga mga tulumanon kasubong sang pagtapna o pagkunol sang pagsulod sang illegal drugs sa imo area. Pero indi bala nga ang operation kontra illegal drugs tulumanon sang mga police operatives sang PDEA kag sa buylog sang local nga kuerpo sang polisiya?
Ginbasul ka nga wala sang hinimuan bisan nga regular mo nga ginasapol sa mga katapo sang Iloilo City Peace and Order Council (CPOC) kag sang Iloilo City Drug Abuse Council.
Natural lang nga atubangon mo ini tanan kay ikaw ang amay sang syudad pero kon kaisa masiling mo nga unfair kay ikaw ang paborito nga subject sang mga komentaryo sa mga waragwagan.
Batuna, Mayor, ang amon pagpanginbulahan kay bisan nga dugmok na ang imo spirit, padayon mo nga ginatib-ong ang kawsa sang mga Ilonggo sa mga programa nga para gid sa ila – sa kalinong kag katawhayan, sa kabuhian, sa ikaayong lawas kag iban pa.
Siguro, kinahanglan mo tun-an ang hampang nga diplomasiya para mapahayag mo ang imo kaugalingon kag ang mga programa sang banwa nga indi matublag sang mga pagpakamalaot sang traditional media kag social media. Sa traditional media, may sagapon ka pa nga alibyo. Sa social media, medyo mabudlay pero malagas gid ang mga nagapakamalaot sa imo paagi sa ila mga pagpatalang.
Samtang kinamatarung sang tagsa ka banwahanon ang pagpabutyag sang ila hibubun-ot o pagpamangkot, amon ginapasalig nga kinamatarung mo man ang pagsabat…ugaling indi ka dapat mapikon kay nahibaluan man sang kadam-an ang imo mga maayo nga hinimuan.
Dako ang mahimo sang media kon imo mapaathag sa ila ang imo paino-ino bangud kon padayon mo sila likawan, padayunon man sila sa pagpangsita. Ini imo mahimo kon makuha mo ang pagkalma bisan pa sang mga adversarial nga mga pangutana. Seguro tun-an mo nga mangin kalmante sa pagsabat kag painstakingly ipa-intiende sa mga katapo sang media kay ina ang palaagyan mo sa imo mga constituents.
Indi ikaw Superman, Mayor, nga unlimited ang superpowers. Tawo ka man nga nagabatyag kag nagaugtas. Magpalayo anay. Magpahuway-huway. Mag-distancia apang sa makadali lang, ha? Dako ang imo nga ginsumpaan nga tulumanon nga ang mga Ilonggong syudadano imo nga tatapon.
Indi kasubong sang kadam-an, indi ikaw ordinaryo nga tawo, Mayor, gani natural lang nga ginabantayan ka bilang sa public official. Sobra naman ugaling ang iban kay daw personalan na.
Ang media indi pangontra kundi tagbantay sang banwa.
Bantayi ang imo ginalingkuran kontra sa mga tawo nga nagahulat lang nga ikaw mabihangan.
Indi pagsapaka ang mga nagataghul sa higad kay kon matabo, indi ka gid maka-derecho sa imo pagapadulungan.
Take comfort kaupod sa imo pamilya, sa imo mga abyan, sa mga tawo nga imo ginasaligan.
Dako ang aton pasalamatan sa bugay sang nagliligad – masakit man o matam-is. Bangon lang kag magpadayon, Mayor, tubtub sa masunod mo nga kaadlawan. – RUNJI R. JAMOLO/PN
[/av_textblock]
[/av_one_full]
