MALAWIG na ang kampanya kontra sa ilegal nga druga kag tubtob subong padayon ang paglagas sa mga nagaduso sini sa palibot.
Halos kada adlaw may yara sang ginalunsar nga operasyon ang aton kapulisan batok sa ilegal nga druga. May bag-o nga mga personalida, may magagmay kag dalagku nga transaksyon, kag may mga bag-o lang nakagwa sa karsel bangud nga nag-agom sang plea-bargaining agreement apang liwat naman nga nadakpan bangud nga imbolbado naman sa pagbaligya sang ilegal nga druga.
Kon lantawon naton ang sitwasyon daw kaangay sang sapat – ido man ukon manok – dakpon kag ikurong, pagnakawa sa kurungan liwat nga lagson naman agud nga ibalik sa iya kurungan.
Wala katapusan ang cycle sang gwa-sulod sa prisuhan sang mga imbolbado sa ilegal nga druga. Pananglit nga may matumba sa ila, may yara naman sang nagabulos tungod nga wala sang katahap ukon kahadlok sa ila ginapangatubang nga sirkumstansya.
Sadto, isa ka sachet ukon pakete ukon likit lang ang marekober sa mga nagabakal kag nagausar apang karon tuman na ka damo kag halos minilyon na ang balor sang marekober nga suspected shabu gikan sa mga madakpan.
Ginreport sang Police Regional Office 6 nga ang isa ka semana nila nga anti-illegal drugs operations sa bug-os nga rehyon nakarekober sang kapin sa 4,711 ka gramo sang suspected ‘shabu’ nga nagabalor sang 32.1 million pesos, kapin sa 1,050 ka gramo sang marijuana nga nagabalor sang 126,000 pesos kag nakadakop sang 73 ka mga suspek. Isa lang ini ka semana, umpisa Marso 8 tubtob 14 sini nga tuig 2025.
Ginasugid sa datus nga ang probinsya sang Iloilo amo ang may pinakadaku nga balor sang narekober nga illegal nga druga. Suno sa Iloilo Provincial Police Office, naglab-ot sa 21.12 million pesos nga balor sang illegal nga druga ang ila nakumpiskar.
Nagasunod diri ang syudad sang Iloilo nga may madamo man sang narekober. Suno sa Iloilo City Police Office, kapin sa 5.53 million pesos ang balor sang ilegal nga druga ang ila narekober.
Nagakatingala kita kon ngaa nagailig nga daw tuburan ang pagsulod sang ilegal nga druga sa syudad kag probinsya sang Iloilo.
Kuntani, dapat ginatultol ang ginhalinan sini, tumuron kon sin-o kag sa diin ang source agud matapna ang paglapta sini sa Iloilo.
Kahibalo man ang tanan nga sa mga pantalan sang roro nagasulod ang ilegal nga druga apang ngaa daw wala sang mabaskog nga lihog agud matapna ini kag agud nga indi makasulod diri sa aton.
Matuod nga may Task Force Puerto kita apang kabus sila sa kinahanglanon nga makaaway sa pagsulod sang ilegal nga druga. Maka-angkab sila apang wala nagadulot tungod nga wala sang ngipon.
Sang san-o pa nakatikma sang dalagku nga bulto sang ilegal nga druga ang mga pantalan?
Panahon na nga liwat nga hibaluon kon ano ka epektibo ang mga ginduso nga solusyon sa sini nga problema. Tukibon kon diin ang diperensya kon ngaa padayon nga nagasulod ang ilegal nga druga.
Maathag man, kon nakasulod buot-silingon nga may alagyan.
Kinahanglan naton sang kongkreto kag epektibo nga solusyon agud nga indi na madugangan ang magausar kag magabaligya sang ilegal nga druga, Dapat matapna ang pagduging sang mga adik ukon kuging agud nga mapabilin ang kalinong kag katawhay sang komunidad.
Nagalaum kita nga may epektibo nga pamaagi nga himuon ang aton mga otoridad agud nga matapna ang pagdata sang ilegal nga druga kag mahagan-hagan ang mga nagakaulamid sa sini nga lihok.
Pinakaulihi nga insidente nga nagtublag sa aton amo ang paghimulos kag pagpatay sa Slovakian nga si Michaela Mickova, 23-anyos, didto sa isla sang Boracay.
Maathag man nga ang nga suspek may record angot sa ilegal nga druga sang tuig 2024.
Bisan paano may epekto ang ini nga hitabu sa turismo sang Boracay Island. Makapatagam ini sa iban nga mga turista. Magaserbe ini nga tap-ing sa maanyag nga nawong sang sini nga doog.
May pila man ka mga insidente nga imbolbado ang mga kuging ukon nakagamit sang ilegal nga druga nga nagluntad sa aton palibot. May mga kabataan nga ginahimuslan kag ginapatay.
Manami lantawon ang istadistika nga madamo sang nadakpan nga drug pusher, madamo sang nakumpiskar nga illegal drugs, kag marumpag nga drug den. Apang mas manami kon matawhay ang aton komunidad, kon wala sang kakugmat samtang nagalakat sa dalan, ilabi na sa tion sang kagab-ihon.
Liwaton ko, makapoy ang maglagas sa mga nagaduso sang suspected shabu. Mas maayo nga indi na pagsudlon lamang nga may lagson nga ilegal drugs.
Panahon na nga imprubahon ang sistema sa pag-away sa ilegal nga druga. (bertladera@gmail.com/PN)
