NAKADUMDOM bala kamo sang hampang nga lisik-lisik?
Ini ang hampang nga may tawo nga ginahaboy sang bola kag kun maigo sya naman ang taya. Ini amo ang dodgeball Pinoy-style.
Pero ginagamit man ini nga tinaga sa tawo nga wala nagasabat sa pamangkot ukon isyu. Ang sabat likaw-likaw kag wala sang direkta nga pag-atubang sa palamangkutanon.
Ini karon ang paglaragway naton kay Mayor Jose Espinosa III. Lisik-lisik sa sabat sa isyu sang pulitika. Bisan pa nga ginabanatan na sya sang pangontra wala gid nagabirada sa ila. Ngaa ayhan amo ini ang diskarte ni Espinosa? Ngaa nagalisik-lisik lang sya sa isyu?
Pila na ka semana sang ginsiling ni suspended congressman Jerry Treñas nga gusto nya magbalik bilang alkalde sa syudad pero tubtob subong wala pa sang sabat si Espinosa sa plano sang iya bilas. Stratehiya lang ayhan nila ini? Ukon may tuhay nga plano ang alkalde?
Kunsabagay ara sa bentaha si Espinosa subong. Sya ang alkalde kag nagauyat sang poder labaw sa mga kapitan nga karon da madikta pa sa iya kun ano ang padalaganan sa May 2019 elections.
Ano gid bala ang iya plano? Madalagan mayor ukon congressman?
Kun magpadalagan si Espinosa bilang alkalde sang syudad, may bentaha man sya. Bisan pa nga ginasiling sang kampo ni Treñas nga mahuyang ang alkalde apang masiling kita nga pamatyagan lang nila ina kay sang una wala gid nagapa-interview si Espinosa kag halos wala man nagapanaog sa kabarangayan.
Pero nakahibalo bala kamo nga sa malawig na nga panahon hipos lang si Espinosa pero madamo na sang nakabaton sang wheel chair kag crutches ang mga PWD (persons with disabilities) diri sa syuydad? Buot silingon madugay na malapit sa tawo ang alkalde.
Subong nga si Espinosa na ang alkalde, ang magsiling nga mahuyang sya sala nga pagpati. Pano nangin mahina si Joe III kun ang tanan nga programa sang syudad ti-on nya nga mapatuman? May mga pagbag-o pa sya nga ginapatuman kag mas tuman sya ka personal kun mag-atubang sa tawo.
Bisan nagalisik-lisik man si Joe pero matyag ko may ara gid sya naplastar na nga plano. Kun ano, bantayan nyo! (jpranco1975@gmail.com/PN)
