Long weekend

[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]

[av_heading heading=’ LABAY MAN AKON ‘ tag=’h3′ style=’blockquote modern-quote’ size=’30’ subheading_active=’subheading_below’ subheading_size=’15’ padding=’10’ color=” custom_font=”]
BY RUNJI JAMOLO
[/av_heading]

[av_textblock size=” font_color=” color=”]
Monday, September 4, 2017
[/av_textblock]

[av_textblock size=’18’ font_color=” color=”]
NAKAMUTIK bala kamo nga sang naligad nga napulo ka adlaw (humalin sadtong Agosto 25 tubtub kahapon Septiembre 3), tatlo ka adlaw lang ang official work day?  Ina iya ang para sa mga kinaandan nga naga-observe sang five-day work week ukon Lunes tubtub Biernes nga pagtrabaho.

Nagsugod yadto sang Agosto 25, sang ginhatagan sang Malacañang sang isa ka adlaw nga special nonworking holiday ang Ciudad sang Iloilo nga nagsaulog sang ika-80 nga Charter Day.

Sunod nga duha ka adlaw – Sabado kag Domingo (Agosto 26 kag 27) kag ang Lunes nga Agosto 28 piesta opisyal bangud National Heroes day.

Tatlo ka adlaw ang trabaho – Martes, Mierkoles kag Huebes… kag nag-holiday naman kita.  Special non-working holiday sang Septiembre 1 bangud “Eid’l Adha.”

Ang Eid’l Adha isa sa mga “most revered observance” sang mga Islam.  Bisan mayoriya sang mga Filipino mga Romano Katoliko, ang nasambit nga adlaw isa ka pagkilala sang selebrasyon sang aton mga kasubong nga Filipino Muslims.

Ginsundan ini sang Septiembre 2 kag 3 – kinaandan nga Sabado kag Domingo.

Gani, duha ka long weekend ang nagtimbang sa tatlo ka adlaw lang nga pagtrabaho sang nagligad nga semana.

Ang “long weekend” amo ang weekend nga indi magkubos sa tatlo ka adlaw ang kalawigon, bangud sang public holiday nga natuon sa Biernes ukon sa Lunes.

Kon madumduman pa ninyo, sadtong si Pangulong Gloria Macapagal-Arroyo pa ang nagapungko sa Malacañang, ginpanugyan niya ang “long weekend strategy” para sa promotion sang tourismo agud may kahigayunan nga makabakasyon sang malawig ang magpamilya.  May mga kahigayunan sadto nga ginasaylo niya ang mas temprano o pagpaatrasar sang holiday para hungod nga maglapit sa Sabado o Domingo – regular holiday man o special non-working holiday.

May mga iban nga nagkontra sadto nga lihuk… apang kon sa English pa, “water under the bridge” na ina karon.

Indi malayo nga mangin malaba ang aton nga weekend bangud ginaduso karon sa Kongreso ang “four-day work week.”  Nagakahulugan nga apat na lang ka adlaw ang pagtrabaho.

Aprobado na sa ikaapat nga pagbasa sa manubo nga panalgan sang Kongreso ang House Bill 6152, nga nagapahanugot sa mga kompaniya nga palip-uton sa apat tubtub lima ka adlaw ang pagtrabaho sang ila mga empleyado sa normal nga 5-6 ka adlaw.

Magakahulugan nga magasobra sa walo ka oras ang pagtrabaho tagsa ka adlaw.

Ang tagduso sang hagna nagapangatarungan nga ang nasambit nga lihuk makahatag sang kahigayunan sa mga trabahador sang tuman nga panahon upod sa ila pamilya magluwas nga malubad man sini o mahaganhagan ang problema sa traffic.

Diri naman kag nagsugod ang pagbinangigay sang mga nagapabor kag sang mga indi maluyag sini nga lihuk kasubong sang grupo sang mga negosyante.  Ang debate sa tunga sang sector sang mga mamumugon kag sang grupo sang mga employers.

May mga grupo man nga nakakita sini nga kahigayunan sa pagpalab-ot o paghatag sang “child care” ukon pagbantay sa mga tigulang sa aton mga puluy-an.

Lakip sa mga disbentaha nga nakit-an amo ang pagbuhin sang inadlaw sa serbisyo sang  mga ahensya sang gobierno – kasubong sang mga pag-follow up sang mga papeles o pagkuha sang mga dokumento.  Ang “long weekend” ukon ang “four-day work week” magakahulugan sang pagbuhin sang mga inadlaw sang serbisyo sang government agencies.

Paano na lang kon kinahanglan, ang pag-process sang death certificates? Hulaton naman ang tatlo ka adlaw agud mahulag ang papeles, por ehemplo, sa mga magakinahanglan sang ayuda.

Amo man ang kabudlayan para sa mga tawo nga naglapas sang kasuguan.  Ang long weekend o ang shortened work days magakahulugan sang indi magkubos sa tatlo ka adlaw nga indi makapahamtang sang pyansa para sa temporaryo nga kahilwayan ukon ang pagkahunong sa bilangguan sang mas malawig-lawig nga tiempo.

Kami sa media, daw indi man makaginansya sa long weekend.  Bangud ang balita wala nagapili sang adlaw o oras.  Kon maglupok ang balita, long weekend man o indi… bangon sa higdaan kag derecho sa pag-estorbo sang mga tiliman-an./PN
[/av_textblock]

[/av_one_full]