PADAYON nga nagasaka ang kaso sang COVID-19 sa probinsya sang Iloilo. Nagatublag ini sa Iloilo Provincial Government kag nangin higayon sa padayon nga pagpangita sang solusyon kon paano mapahagan-hagan ang sitwasyon.
Gindesisyunan sang Iloilo Provincial Government, sa pagpanguna ni Gov. Arthur Defensor Jr., nga ipatuman ang border control sa kada banwa sa bug-os nga probinsya agud nga malimitahan ang hulag sang tawo, ilabi na kon indi man gid tuman ka importante ang ila tuyo; ginpatuman ang liquor ban agud nga wala sang may mag-inom-inom nga isa sa ginalantaw nga kawsa sang madasig nga paglaton sang virus; kag ang temporaryo nga pagpasirado sa mga resorts, inland man ukon beach, sa kaangay man nga katuyuan.
Nagpanawagan man si Vice Gov. Christine “Tingting” Garin sa mga punong barangay, kapulisan kag mga alkalde nga hugot nga ipatuman ang mga ordinansa sang probinsya, ilabi na ang pagsuksok sang face mask kag ang pagsunod sa social distancing. Labaw pa diri, ginapangayo man sini ang pag-ugyon sang pumuluyo sa pag-away sa pandemya. Ginahingyo sini ang tagsa ka indibidwal nga mangin responsable bangud responsibilidad sang kada isa ang mag-away batok sa pandemya, kag yara sa kada indibidwal ang lyabe agud matapna ang paglaton sang virus.
Angot sini, nagpasar si Ex-Officio Board Member Dorothy Paes, ang President sang Liga ng Barangay Provincial Federation, sa 93rd Regular Session sang 13th Sangguniang Panlalawigan ng Iloilo sang resolution nga may tigulo “A Resolution Urging All Punong Barangays, Local Chief Executives & Provincial Director of PNP in the Province of Iloilo to Strictly Enforce the Guidelines Issued by the Inter-Agency Task Force (IATF) of the Implementation of Minimum Public Health Protocols and the Prohibition/Limitation on Mass Gatherings in Their Respective Area of Responsibility to Contain the Spread of COVID-19.”
Ginhatagan man sang igtalupangod ni 3rd District Board Member Matt Palabrica nga iya naobserbaran nga madamo sang punong barangay ang indi makasaway sa ila pumuluyo ukon ginakapan-kapan lang ilabi na sa mga namatyan kag madamo sang mga nagapanahor. Indi masunod ang social distancing sa pila ka lamesa nga may nagasugal kag indi malikawan ang pagtumpok sang mga tawo.
Natalupangdan man ang pag-inom-inom sa bilasyunan ukon sa himatayan, nga kinaandan na nga ginahimo sang pumuluyo, nga ginalantaw nga amo man ang rason sang madasig nga paglaton sang virus.
Nagapati si 2nd District Board Member June Mondejar nga natahap ang mga punong barangay magsaway bangud basi mabutang alang-alang ang ila liwat nga pagpapili sa ila barangay. Ginduso sini nga hingyuon ang mga hepe sang kapulisan sa kada banwa nga hugot nga ipatuman ang mga ordinansa.
Samtang, si Ex-Officio Board Member Ramon Sullano, ang Interim President sang Philippine Councilors League -Iloilo Chapter, nga dapat hingyuon ang director sang Iloilo Police Provincial Office tuhoy sa pagpatuman sang minimum health protocol nga amo ang magahatag sang direktiba sa iya mga hepe sa kabanwahanan.
Bangud sa sini nga deliberasyon, natigayon nga mapasar ang resolution kag ginalauman nga ugyunan sang tanan agud nga mapahagan-hagan ang kaso sang COVID-19 sa probinsya sang Iloilo.
Kutob sang Hunyo 1, 2021, alas 12:00 sang udto, kapin na sa 7,940 ang total COVID-19 confirmed cases sa probinsya sang Iloilo suno Iloilo Provincial Health Office.
May nagdugang nga 144 ka bag-o nga kaso, kapina sa 1,432 ang active cases kag may 190 na nga napatay.
Sa kabug-usan nga 7,940 ka kaso, ang 190 ukon 2 percent ang napatay; 1,432 ang active cases ukon 18 percent kag 6,318 ukon 80 percent ang nakarekober.
Sa bahin sang kategorya, kapin sa 86 percent ukon 6,841 ang local cases; 742 ukon 9 percent ang locally stranded individual (LSI); 271 ukon 4 percent ang returning overseas Filipino (ROF); kag 86 ukon 1 percent ang authorized person outside residence (APOR).
Sa bahin sang average cases per day, sadtong Enero may 21; 29 sang Pebrero; 30 sang Marso; 22 sang Abril; kag 59 sang Mayo.
Base sa sini nga mga datus, nagakaangay lamang nga ang kada isa indi na dapat magpasaway ukon sawayon pa, kundi dapat magmato-mato na lamang sa pagtuman sa minimum health protocol agud nga mapangapinan ang kaugalingon batok sa virus, kag agud nga mapangapinan ang mga kaupod sa sulod sang balay kag sa bug-os nga komunidad.
Indi lamang virus ang aton ginaaway. Nagapakig-away man kita nga bag-uhon ang aton gawi, naandan, kag mga pagpati bangud diri nagakabuhi ang virus,diri nagalaton ang virus.
Ligwaton naton ang aton gawi kag sundon naton ang dikta sang panahon agud makapangibabaw kita sa sitwasyon.
Dapat mangibabaw sa kada indibidwal ang pag-amlig sa kaugalingon, ang pagkabalaka sa kasilingan, kag pagbalikid sa komunidad.
Yara sa kada isa sa aton ang lyabe sa kadalag-an batok sa COVID-19. Kita ang naga-uyat kag kita man ang nagahimulat. Nasandig sa aton kaugalingon ang aton mangin palaabuton. Nasandig sa aton pag-ugyon ang kadalag-an nga makalampuwas sa sini nga pandemya. (bertladera@gmail.com/PN)
