GABUYLOG kita sa kasubo sang pamilya ni former Mayor kag Congressman Arcadio Gorriceta sa iya pagtaliwan sadtong Hulyo 2. Isa siya ka maayo nga abyan, nga gapadumdum sa aton nga wala sing imol kag manggaranon sa pag-enjoy upod sa isa ka tasa nga kape.
***
Isa ang Sweden sa walo ka pungsod sa Uropa nga nagahatag sing “most generous” welfare programs sa iya pumuluyo. Kalakip diri ang Belgium, Italy, Denmark, Austria, Greece kag Germany.
Indi lang ini nagahatag sing nagapanguna nga kaseguruhan sa pangabuhi sang mga pumuluyo paagi sa unemployment benefits, employment services, job guarantees, starter jobs kag sang European Social Fund.
May ara man diri sang low-cost housing, child-support payments, child-care subsidies, mandatory four-week vacation sa workers, unemployment insurance, kag dugang nga old-age pension benefits.
Ang tanan nga pumuluyo, kubos man ukon may ikasarang, benepisyado man sang Swedish health care nga ginagastuhan mayormante sang gobyerno.
Libre man diri ang pag-eskwela sa kolehiyo kag unibersidad.
Tungod sini, wala kita makita sing problema kon istriktuhon man nga ipatuman ang mga health protocols agud malikaw ang mga pumuluyo sa Covid-19 paagi sa lockdown, quarantine, kag iban pa nga measures.
Wala man gani kita makita nga problema kon indi mapatuman ang National State of Emergency nga labag sa ila konstitusyon kay may lokal man nga measures nga pwede ipatuman.
Katulad sang pagdumili sa mass gathering sang sobra 50 ka tawo, ang pagpatuman sang physical distancing kag hygienic practices katulad sang handwashing kag indi pagtandug sang kamot sa ilong, baba kag mata.
Ugaling lang kay ang pagpatuman sini sang subong nga gobyerno sunu lang sa “civic responsibilities” sang mga pumuluyo.
So, ang nagakatabo nga pagusto ang mga pumuluyo sa kon ano ang luyag nila himuon. Bukas man ang madamo nga restaurants, bars, shops kag retail stores, beaches kag parks nga may dalagku lang nga pahibalo (posted sign) katulad sang “Please Observe Physical Distancing” (sa Swedish nga pulong).
Kon may “pagdumili” man, katulad sang “Stay at Home”, ginapaagi lang ini sa mga incentives kasubong sang extended paid leaves para sa mga ginikanan.
***
Sang sining ulihi lang, ang Sweden may 65,000 na ka kaso sang Covid-19 kag 5,200 ang napatay – nga pinakataas sa bug-os nga kalibutan. Mga 8% ini, samtang ang gakapatay sa iban nga pungsod mataas na ang 3%.
Nagahingyu na gani karon ang mga kontra partido sang gobyerno sini agud imbestigahan ining madasig nga pagsaka sang mga kaso kag sang nagkalamatay sa Covid-19, nga ginareklamo man gani sang World Health Organization./PN
