Mabudlay seguro ipatuman ni tsip ang indi pagpangerida sang pulis

“UNFRIENDLY” nga meter reading sang PECO. Wala gid man kami sing reklamo sa Panay Electric Company (PECO) tubtub sang sining ulihi lang.

Maasikaso man ang PECO, labi na gid sa pagpanguna ni Engr. Randy Pastolero sa amon problema sa suga diri sa amon ginapuy-an sa tupad sang Panay News Compound sa PODCO, Q. Abeto St., Mandurriao.

Isa lang ka tawag kay Engr. Pastolero ara dayon ang PECO trouble shooting team. Tungod sini, natun-an na namon nga kilalahon siya nga isa ka suod nga abyan nga masaligan sa pagbulig sa amon problema sa kuryente diri.

Wala man kami sing reklamo sa amon meter reading tubtub sa sining ulihi lang, kay ang pagbalyar sang reading indi gid man daku, kag kon nagasaka nagapanaug man.

Sining ulihi ugaling, sobra-sobra na gid ang pagsaka sang amon PECO bill. Indi na “friendly”!

Ang ulihi namon nga monthly bill, nga due date sa Hulyo 2, 2018 naglab-ut sa P2,555.63. Na-shock kami sini, kay samtang halos amo-amo man pirme ang amon konsumo sa kuryente ining monthly bill nagpasaka sang amon balayran sa P1,285.73 base sa nagligad nga bulan namon nga bill nga P1,269.90!

Ang ining  saka sang amon bill (P1,285.73) sobra ini sa isa ka bulan namon nga bill (P1,269.90) sang nagligad nga billing notice. Imposible!

Bayaran namon ining ulihi nga bill (P2,555.63), apang UNDER PROTEST! Kag ma-file na kami sang formal nga reklamo sa PECO.

***

Sa aton panahon karon nga madamo sang aton mga pulitiko ang may “mistress” ukon kerida, isa ka talagsahon nga kaisug matuod ang panindugan ni PRO-6 police director Chief Superintendent John Bulalacao batok sa pagpangerida sang mga pulis.

Ining panindugan ni PRO-6 tsip iya ginpabutyag sa pahayagan sang Panay News sa pahina 4 sang isyu sini sadtong Hunyo 16, 2018.

Sunu sa iya, samtang  “private matter” ini sang mga pulis, ini nagapakamalain sang imahen sang kapulisan sa kabug-usan.

Ginapadumdum pa gani niya sila sang “ethical standards” para sa mga pulis.

Ining ethical standards, siling niya, gasakop sang “morality, judicious use of authority, justice, humility, orderliness, and perseverance.”

“Actually,” sunu gani sa iya, “meron din silang magiging kasalanan sa ating batas at sa Diyos. I do not encourage them to have extra marital affairs dahil hindi maganda sa imahe nga atong PNP.”

In fact, samtang wala man niya ginhinambit ini, ang ining “extra-marital affair” sang mga pulis dapat galakip man sang mga kababainhan sa kapulisan.

Ina tungod indi lang ang mga may asawa nga pulis ang nagapangerida; ang pulis nga babaye puede man nga magpangerido.

Isa ka balita diri mismo sa rehiyon sadtong nagligad nga pila ka bulan nagpahayag sang kaso sang isa ka pulis nga babaye nga gin-akusar sang iya bana nga OFW sa iya pagpangerido sa kapareho nga pulis nga may asawa man gani.

Talagsahon ini nga kaisug matuod ang ining panindugan ni Chief Supt. Bulalacao batok sa pagpangerida sang mga pulis.

Ina tungod posible nga indi mauyunan ini sang mga mas mataas pa sa iya sa gobyerno, nga may mga kabit (kerida ukon kerido).

Ang pila sa ila gani ginapabugal pa nila sa pagpahayag sa publiko nga may kerida sila.

Tungod sini, posible nga hingabuton siya sining mas dalagku nga mga pinuno sa gobyerno kag basi itapok siya sa malayo nga lugar sa Pilipinas sa diin indi siya mabatian kag mabusalan ang iya baba nga indi makapalapnag sining iya panindugan.

Basi masaklaw sila sa sining iya panindugan, luas lang kon kabalan kag madamol sila sang guya ng indi magpa-apekto sa kon ano man nga pagpakamalain sa ila.

Kon indi gani sila (ining mas dalagku sa gobyerno) magpa-apekto, sin-o ayhan sa mga tinawo ni Tsip Bulalacao ang magasunod sa iya pangabay nga likawan ang pag-pangerida?

Daw wala seguro. “Gapangerida gani ang mga pinaka- boss, kami pa?” ang laban-laban  masiling nila sa sining pangabay ni Tsip Bulalacao.

Itugyan na gid lang naton seguro ining problema sa ginluiban nga asawa ukon bana.

Tsip, diri ka na lang seguro tutok sa pagpatuman sang kasuguan sa human rights kag due process nga gina-reklamo batok sa mga pulis, indi lang diri sa pungsod kundi bisan pa sa iban nga pungsod kag bisan sa United Nations. (w_mateojr@yahoo.com/PN)