WALA sang tinago ang kalibutan nga indi mabuyagyag sa paglipas sang panahon.
Wala sang bato nga nalubong sa balas ang indi maglutaw sa pagkaykay sang balud.
Wala sang likom nga indi matukiban bangud nagapangita ini sang paagi agud nga mabuyagyag ang kamatuuran.
Kaangay ini sa natabu sa isa ka building sa Barangay Bolilao, Mandurriao nga ginatukod sa karon kon sa diin may nahulugan sang pulley nga isa ka bata kag nautod ang iya nga tiil kag makatilingala lamang bangud nga yara siya sa lugar nga indi dapat para sa mga kaangay niya kag para lang sa mga trabahante.
Gin-usisa sang Department of Labor and Employment ang lugar sang konstruksyon antes pa man sila makasugod sa ila pag-obra kag nakita nga halos plastado man ang mga kinahanglanon nga papeles rason nga sila ang ginhatagan sang pahanugot nga makasugod sa pagtrabaho.
Nakalipas ang panahon kag sadtong Abril 5 natabu ang insidente sang pagkahulog sang pulley. Liwat nga ginlantaw ang ila pamaagi sa pagtuman sa mga pagsulundan kag didto nakita sang DOLE nga plastado ang papeles apang kulang sa implementasyon.
Namutikan man nga wala pa sang building permit apang nagasugod na sa pagtukod sang ila proyekto kag madamo sang mga bagay nga wala nagahilituhog ilabi na ang papeles kag ang realidad sa pagpatuman sang proyekto.
Wala ginpauntat sang DOLE ang konstruksyon bangud sa ila liwat nga pag-inspeksyon nakita nga plastado na ang tanan kag ang bata nga biktima ang indi trabahante kundi nagsulod lang sa building sa wala nahibaluan nga rason.
Gindemalas liwat ang building bangud nga ang tuhay nga kontraktor para sa pagpahamtang sang glass panel ang nagkaproblema naman sang nahulog ang glass panel kag nahulugan ang duha ka kotse sa idalom nga naga-park.
Liwat nga gintsekyar kag mismo ang Public Safety and Transportation Management Office sang City Government ang nagrekomendar sang work stoppage order sa kontraktor kag sa tag-iya sang building.
Madamo sang kapaltahan nga nagtuga sang aksidente. Ang ila mga ginatabunan nga sayop ang ginabukad sang wala ginalauman nga mga hitabu.
Nagtumar sang interes ang city council paagi kay Councilor Joshua Alim nga usisaon ang nasambit nga bagay kag hibaluon sa mga natungdan nga mga talapuanan kag mismo sa kontraktor kag sa tag-iya sang building ang mga proseso sa pagkwa sang mga dokumento kag sa ila pagsugod sa konstruksyon santu sa papeles nga ila gina-uyatan.
Maathag nga wala nagahilituhog ang lakat sang papeles sa lakat sang konstruksyon. May yara sang nagabali sa patakaran, may yara sang nagapangisog sa pagtiko sa pagsulundan lamang nga matigayon sa madali nga panahon ang paghuman sang proyekto.
Mas talalupangdon nga nagakinot ang kontraktor sa mga resikitos nga ginapatuman sa iya ilabi na sa bahin sang ‘occupational safety and health standards’ bangud wala sang mga tinawo nga naga-uyat sang katungdanan para sa kaluwasan sang mga trabahante sa tion nga may matabu nga insidente.
Kuntani mamgin responsable man ang City Engineer’s Office sa pagdampig sa interes sang pumuluyo bangud nga ini nga mga hitabu ang indi matukiban kag mabukaran lang kon may masamaran. (bertladera@gmail.com/PN)
