GILAYON nga kamatayon gikan sa atake sa korason ang masami sa mga tawo nga wala naga-ehersisyo.
Suno sa bag-o nga pagtuon nga ang aktibo nga lifestyle naangot sa mas manubo nga tsansa nga mapatay gilayon gikan sa heart attack. Ang heart disease amo ang nagapanguna nga kabangdanan sang kamatayon sa bug-os nga kalibutan kag ang pagtapna sini ang isa ka major public health priority.
Suno ini sa pagtuon nga ginbalhag sa European Journal of Preventive Cardiology nga isa ka journal sang European Society of Cardiology (ESC).
Nabalhag sa dokumento ang daku beneficial impact sang physical activity sa pagtapna sang heart disease kag gilayon nga kamatayon sa populasyon. Ang pagtuon nagpokus sa epekto sang aktibo kag indi aktibo nga lifestyle tuhoy sa pag-angkon sang heart attack.
Gingamit sang mga manugpalawsaw ang datus gikan sa 10 ka European observational cohorts lakip ang mga healthy participants nga may baseline assessment sang physical activity kag ang mga participants suno sa ila weekly level sang leisure-time physical activity bilang sedentary, low, moderate ukon high.
Gin-adjust man ang analysis para sa edad, sex, diabetes, blood pressure, family history sang heart disease, pagpanigarilyo, body mass index, blood cholesterol, pagkonsumo sang alcohol kag socioeconomic status.
Suno sa study author nga si Dr. Kim Wadt Hansen sang Bispebjerg Hospital, Copenhagen, Denmark nga ila natukiban sa pagtuon ang gilayon nga survival benefit kon may physical activity antes pa man ang heart attack.
Ginsiling sini nga bisan ang gamay nga lang nga leisure-time physical activity ang may mahatag nga benepisyo batok sa makamamatay nga heart attacks.
Gindugang sini nga ang ila pagtuon mabaskog nga nagasuporta sa mga rekomendasyon tuhoy sa semanal nga physical activity sa mga healthy adults nga nasaad sa 2016 European
Guidelines on cardiovascular disease prevention in clinical practice.
Ang guidelines nagarekomendar nga ang healthy adults sa tanan nga pang-edaron ang magahiwat sang kapin sa 150 minutes kada semana nga moderate intensity ukon 75 minutes kada semana sang vigorous intensity aerobic physical activity ukon ang equivalent combination sini.
Ginpabutyag ni Dr. Hansen nga madamo sang mga pamaagi nga mangin physically active nga gamay lang ukon wala gid sang gasto. Ang ila pagtuon nagahatag sang rewards sang pag-ehersisyo bisan pa nga kinahanglan ang dugang nga ebidensya para diri.
Sa sini nga panahon sang pandemya, bisan pa ang iban ang indi masyado makalagaw bangud sa quarantine apang dapat may mga pamaagi kon paano maka-ehersisyo sa sulod sang balay. Indi kinahanglan nga may kagamitan gid kaangay sa gym. Kinahanglan lang nga maglantaw sa website kon paano hiwaton ang simple nga ehersisyo nga wala nagakinahanglan sang kagamitan.
Luyag naton ipahangop nga kon ginapaidalom sa quarantine ang isa ka tawo, wala nagalahulugan nga kaon kag tulog lang ang iya obrahon. Kinahanglan ang physical activity agud nga magpagsik ang dugo, agud nga mag-sirkular ang dugo sa lawas, agud nga masunog ang cholesterol kag balhason agud nga mangin mamag-an ang lawas.
Tilawan ang mag-jumping jack, jog in place, stretching, push-up, kag iban pa nga hilukuton nga wala nagakinahanglan sang gasto.
Katuyuan man sini nga mangin masaku ang isa ka tawo kag indi magpaminsar sa iya kahimtangan ukon masubuan bangud sa sitwasyon tuga sang pandemya.
Kon mapagsik ang lawas, mangin maayo man ang kahimtangan sang paminsaron nga magaresulta naman sa ginatawag nga overall well-being sang isa ka indibidwal.
Kon indi mahimo ang matag-adlaw nga pag-ehersisyo, himua ini bisan isa ka bes sa isa ka semana. Dapat ehersisyo nga makahatag sang relaxation sa lawas kag wala nagaresulta sa tuman nga kakapoy ukon negatibo nga epekto sa lawas.
Buligan naton ang aton kaugalingon kon paano makalikaw sa dugang nga peligro samtang nagapakig-away kita sa pandemya.
Natabunan sang COVID-19 pandemic ang iban pa naton nga health concerns kag nagpokus kita sa kon paano awayon ang pandemya. Nagresulta man ini sa iban pa nga palaligban kaangay sadto sa kaso sang mental health kon sa diin madamo sang indibidwal ang naghikog sa syudad kag probinsya sang Iloilo.
Ini man ang rason kon ngaa ginahatagan naton sang igtalupangod ang ini nga topiko agud makapahanumdom sa tanan nga may iban pa nga dapat atendiron magluwas sa COVID-19.
Kinahanglan naton nga maghimo sang istratehiya kon paano mag-away sa pandemya nga wala nagatuga sang dugang nga huol sa aton ikaayong-lawas.
Magpabalhas agud sa pat-ud nga kamatayon makaluwas. (bertladera@gmail.com/PN)
