Ni Cyrus M. Garde
Syudad sang BACOLOD – Gindalahig sang iloy ang iya tatlo ka tuig nga bata sa paghikog kon sa diin nasapwan na lang ang ila mga bangkay sa room 20 sa ika-tatlo ka panalgan sang Pension Bacolod nga nahamtang sa 11th Street, Shopping Center sining syudad pasado alas-12 sang udto kahapon.
Ang bata nakita nga nagadupa sang iya may laslas nga kamot sa ibabaw sang katre, samtang ang iloy nasapwan nga nagakabit sa shower room gamit ang nylon sa iya liog.
Ginkilala ni P/Inspector Stephen Boniba, hepe sang Police Station 2, ang iloy nga si Leah Segovia Cañete, 34 anyos kag nagapuyo sa iya ugangan sa Brgy. Lopez Jaena, sa banwa sang Murcia, Negros Occidental.
Ang bata amo naman si Hannah Kate nga manog-apat na tani ka tuig sa Sept. 27.
Sunu sa pahayag sang bayaw ni Leah, naghalin sila sa Murcia sang iya bata pasado alas-cinco sa hapon sang Huwebes agud magbakal sang gatas apang wala makapauli. Sang amo man nga adlaw, ginpahayag nga nakabaton si Leah sang P3,000 halin sa iya bana nga si Joebert nga naga-obra bilang security guard sa Cavite.
Dayon nga gin-texan sang bayaw ang iloy ni Leah nga si Luz Segovia sa Brgy. Vista Alegre, Syudad sang Bacolod kon didto nagkadto ang mag-iloy pero wala man.
Sandig naman sa imbestigasyon sang mga pulis, ang mag-iloy nagsulod sa Pension Bacolod alas-6:40 sang Huwebes sang gab-i.
Kahapon, Biyernes, asta lang tani alas-12 sang udto ang mag-iloy sa pension house pero wala sila maka-cehckout. Rason nga nagkadto ang room boy nga si Froilan sa ila kwarto agud magpamangkot kon ma-extend sila, apang wala sing may nagsabat.
Gamit ang yabi, ginbuksan ni Froilan ang kwarto kag amo na lang ang iya kakibot sang nakita ang bangkay sang mag-iloy.
Base naman sa ocular inspection sang Scene of the Crime Operatives (SOCO) sang Negros Occidental Police Provincial Office sa pagpamuno ni Chief Inspector Ramonit Javier, nakarekober sila sang isa ka blade kag nylon nga higot.
Samtang, sang gin-interbyu naman ang iloy ni Leah, siling sini may ginabatyag nga nerbyos ang iya bata kag indi ini makatulog.
Samtang ginasulat ini nga balita, siling naman ni SPO3 Arlene Torendon, acting head sang Women’s and Child Protection Desk sang Bacolod City Police Office, ginaipa-idalom sa post-mortem examination ang mga bangkay para mahibaluan gid ang kabangdanan sang ila kamatayon./H
