(Continued from Nov. 10, 2022)
PAGLAPAS man sa ordinansa ang atrasado nga pagreport kag pagpalapta sang indi matuod nga impormasyon tuhoy sa ASF. Paglapas man kon balabagan ang mga otoridad kag wala nagasunod, kon indi magpasugot sang farm inspection kag paghiwat sang surviellance. Pagbaligya sang hot meat ukon wala permiso sa kilid sang dalan, ginadumilian man.
Mahimo nga ma-transport ang baboy sa red area basta ang iya padulungan didto lang man sa red area. Pwede pa makanegosyo sang baboy sa pink area apang dapat may Hog Transport Pass ukon HTP.
May multa, revocation sang business permit, pagkumpiskar sang items, pagkapriso, kag pag-impound trak ukon angkar-angkar sa sin-o man nga magalapas sa ordinansa.
Luyag sang 14th SP nga buligan ang gobernadora paagi sa pagbutang sang ngipon sa mga executive order nga gin-isyu sini.
Labaw sa ordinansa nga dapat tumanon, dapat mangibabaw man ang konsensya kag kooperasyon sang pumuluyo. Ginapangabay sa mga nagasagud kag backyard raisers nga dapat sila na mismo ang mag-bio security sa ila barangay.
Kon namutikan nga nagabatyag ang baboy, may mga sintoma, dapat magreport gilayon sa mga otoridad agud nga maatipan sang mas temprano.
Dapat mga mag-ugyon kita kag indi pagpabay-an nga maglapta pa ang ASF virus tungod ang tanan apektado. Kon maapektuhan ang hog industry, apektado ang tag-iya nga nagasagod, ang nagabaligya sang karne, ang nagabaligya sang pansit ukon batchoy ukon mga kalan-an, ang alkansiya nga mabuka tungod wala na sang ganaron gikan sa baboy para bakal sang kinahanglanon sang mga estudyante sa ila pagtuon lakip na ang ila nga pagabalunon, apektado man ang mga nagabaligya sang feeds sang baboy, kag ang buhis ukon arkabala nga ginabayad sa banwa.
Kahibalo kita nga sa karon padayon pa nga nagapanalupsop sa kabanwahanan ang ASF virus bangud bisan may border control checkpoint nga ginapahamtang apang may nagalusot sa gihapon ukon may mga wala disiplina nga manugsagud sang baboy.
Untatan na ang pagpalusot tungod mangin mitsa ini sang padayon nga paglaton sang virus. Indi manami nga likupon sang ASF virus ang bug-os nga probinsya bangud lang sa kadalok sang iban nga tawo sa maganar nga ginansya.
Dapat nga hugton sang mga LGU ang pagbaligya sang karne kag dumilian gid ang pagbaligya sa kilid sang dalan.
Ang ASF virus wala sang bulong kag wala sang bakuna. Ang solusyon amo ang disiplina kag pag-ugyon sang kada isa. Dapat mag-ulikid kag magkabalaka kag ipaiway anay ang dikta sang daku nga ginansya.
May higayon pa nga masalbar naton ang hog industry kag matapna gilayon ang paglaton sang ASF virus diri sa aton paagi sa mabinatyagon nga pag-ugyon. (bertladera@gmail.com/PN)
