NAGPUAS na ang aso, maaathag na ang panulukan, may yara na sang ginproklamar kag may yara na sang nalugaw-an.
Matapos ang siyam ka adlaw sang opisyal nga pagpangampanya, nakahusgar na ang tawo sang ila mangin lideres sa tagsa ka barangay. Matapos ang masandukot nga pagpangamustahanay, pagkumbinser, pagyuhum, kag pagtamyaw, nagbunga ang ila paghimakas kag ang mga nagdaug ang makatulog na sang mahamook.
Bisan pa sang pila ka insidente sang pagpamakal sang boto, apang may mga lugar man, nga likom sa ihibalo sang tanan, nga nagaluntad ini apang wala lang nagtribukaho sa kadamuan. Nagahipos lang ang nagaduhol sang kwarta kag nagayuhum man ang nagadahu sini rason nga wala sang gahod ang paglakbay sang kwarta nga papel gikan sa palad sang kandidato padulong sa palad sang botante.
May nalutos sa kadalag-an kay may nalutos sa kahul-anan bangud sa ila ginprerara nga pondo sa pagpamakal sang boto. Mahimo nga nakaimpluwensya ang kwarta kag napamatian sang botante ang hutik sini rason nga nagdaug ang may ginpain nga pondo para sa tagsa ka botante.
Madamo sang mga pamilya ang nagbahin-bahin, may mag-abyan nga nagsipakanay, may mga magkakilala nga wala nagsapakanay bangud sa umalagi nga piniliay sa barangay.
Pagkatapos sang proklamasyon sang nagdaug, magahulat pa sang panahon antes ang pilas nga natuga sa balatyagon sang kada isa ang mahimo nga magpali, agud nga liwat nga magbalik ang ila normal nga pagsinarayo kag kinaandan nga pagtamdanay.
Nagpuas na ang aso, nagtakop na ang proseso, nagtakop na ang isa ka pahina sang kasaysayan sa piniliay kag ang iya nga pagtakop mangin panugod naman sang mas masangkad nga piniliay sa palaabuton nga 2019.
Madamo sang palamangkutanon kon paano nakatipon sang daku nga pondo ang mga kandidato sa barangay. Makatilingala kon ngaa kinahanglan gid nila nga maggasto agud nga makwa ang pwesto kag mas makatilingala kon ngaa ang mga pulitiko ang nagatusmaw sang ila mga tudlo sa proseso sang piniliay sa barangay paagi sa pagsakdag sa ila nahamut-an nga kandidato.
Nahawanan na ang dalan kag maathag na ang mangin padulungan. Tion na nga kamangon sang mga pulitiko ang mga bag-o napilian nga mga lideres sa tagsa ka barangay agud nga mapaidalom sa ila impluwensya kag mangin kabahin sang ila pundasyon para sa palaabuton nga 2019 nga eleksyon.
Maathag nga may mga pulitiko nga nagsakdag sang ila kandidato sa likom nga paagi agud nga ila mangin salandigan sa ila paglunsar sang kandidatura. Ginkapitalan nila sang kwarta kag risgo agud masiguro nga mangin madinalag-on sa ila katuyuan sa palaabuton nga eleksyon.
Pamatian naton sa masund nga inadlaw kon paano nila tipunon kag impluwensyahan ang mga bag-o napilian nga mga opisyales sa barangay, kon paano nila ilaon sa mga makagalanyat nga promisa kag pagtawtaw sa ila sang mga programa kag proyekto.
Kaangay sang mga manok, sila ang pagabuburan. Kaangay sang mga baboy sila ang bahugan.
Nasiling na sa hurubaton, ‘ang naga-isahanon nga alagyan padulong sa tagipusoon sang tawo amo ang paagi sa iya sulok-sulok.’
Nagatamwa na ang 2019 elections, magabukas ini paagi sa pagtakop sang piniliay sa barangay. (bertladera@gmail.com/PN)
