Wala sang malain sa paghandom, wala sang malain sa pag-ilog sa mga bagay nga ginakabig nga inspirasyon.
Nangin inspirasyon sa bisan diin man nga lugar sang pungsod ang natabu nga pagpanglimpyo sa isla sang Boracay kag Manila Bay nga sa una nga paglantaw isa ka imposible nga handom apang natigayon kag nangin ehemplo sang tanan nga lugar.
Kaangay sang iban nga mga nagadumala sa ila nasakupan, handom man ni Mayor Jose Espinosa III nga matinluan ang baybayon sang Arevalo agud nga mapanumbalik ang mga kinasadya sang magpamilya nga nagapaligo sa ‘villa beach’ nga wala sang kabalaka sa mangin negatibo nga epekto sa ila panit sang tubig-dagat.
Nagplano na ang city government nga maghiwat sang cleanup drive sa sina nga lugar agud nga masuguran ang pagpaninlo kag mapatudok sa mga pumuluyo nga dapat amligan ang baybayon kag mismo ang ila ugsaran.
Luyag sini nga updon ang mga empleyado sang city hall agud nga ipakita ang ila determinasyon nga matinluan ang baybay paagi sa ila nga cleanup drive kag pagpaligo sa dagat.
Nagtuhaw ang madamo nga reaksyon, ilabi na ang mga nagapang-alang-alang sa katinlo sang baybay, sa mga yadtong nabalaka sa kon ano ang matabu sa ila nga panit kag ikaayong-lawas.
Nangin mapag-on naman ang panindugan ni City Adminitrator Atty. Hernando Galvez nga matinlo ang baybay kag may mga kilala siya nga nagapaligo, may malabayan siya nga nagapaligo nga mga pumuluyo kag ginakabig niya nga wala nagagwa sa opisina ang nagsiling nga mahigko ang baybay.
Kuntani antes sila nagpuis kon matinlo ukon mahigko, dapat ila gin-usisa kon bala may pinakaulihi nga datus ang Environmental Management Bureau sang DENR-6 kag kon ano bala ang estado sang baybay nga ginaplanuhan nga pagapaliguan.
Kada isa sa ila nagsandig sa ila kaugalingon nga eksperyensya kag kinaalam, ang isa nagsandig sa iya nga nakit-an kag ang isa naman nagsandig sa datus nga iya nadumduman.
Wala man nagakahulugan nga matinlo na ang baybay kon may pila ka tawo nga nagapaligo. Ayhan ang iban sa ila wala sang ihibalo sa ginatawag nga fecal coliform concentration sa tubig kag wala sang ideya kon ano ang halit nga matuga sa ila nga panit ukon ikaayong-lawas.
Mas nagakadapat nga magbasa sila sang Water Quality Monitoring Report sang DENR-EMB-6 agud mas mabakod ang ila argumento kag balasehan kon bala angay nga paliguan ang baybayon sa distrito sang Arevalo.
Maayo lang kay nagligwat ang paminsaron sang alkalde kag nagsiling nga siya lang anay ang maligom kag desidido siya nga himuon ini sa masunod nga inadlaw.
Nakamarasmas siguro ang alkalde nga dapat usisaon anay ang baybay kon matuod nga matinlo ukon mahigko kag indi siya dapat magpadasu-dasu sa iya nga desisyon lamang nga mapahibalo niya sa tanan nga suportado niya ang lihok ni Presidente Rodrigo Duterte.
Posible nasanagan siya nga ang madamo sang pamalay sa palibot kag halos kalabanan nagagamit sang basin ukon basin diin lang makabuslog sang ila higko.
Siguruhon gid dapat sang alkalde nga indi siya maghinulsol kon siya ang magakapa-kapa sa baybay sang Arevalo. (bertladera@gmail.com)/PN
