SA KARON nga panahon sang COVID-19 pandemic, ang tawo napun-an man sang kahayanghag.
Ang may ihibalo sa dalit sang virus nagahalong. Ang alang-alang ang ihibalo nagasala-sala sa kakulba, samtang ang mga pobre espirito, abi nila indi sila maduktan sang sakit.
Ang covonavirus nga nagatuga sang sakit, tama ka makalalaton apang indi man makamamatay kun wala ka sang iban nga balati-an.
Bisan makalalaton, apang mahapos man malikawan. Ini kun sundon naton ang minimum health standards nga ginapatuman nga amo ang pagsoksok sang facemask, paghugas sang kamot, pagtabon sang baba kun nagapanghatsi ukon nagaubo, kag kun kinahanglan maggamit sang face shield ilabi na kun indi makadistansya sang duha ka metros sa iban nga tawo.
Ang masami nga pamangkot, sa public place lang bala kita dapat mag-facemask ukon mag layuanay? Indi na bala ini pagsundon sa balay?
Kun basehan natun ang pagsulondan, kun sa diin ka man dapat may mask gid kag may physical distancing. Nga-a? Ini bangud nga indi natun masigurado kun sin-o ang positibo, sin-o ang indi. Indi man natun mabahibaluan nga kun ara kita sa gwa sang balay, wala nakatapik sa atun lawas ang virus.
Buot silingon samtang kita ukon sin-o man nga katapo sang pamilya nagaggwa kag nagakadto sa pampubliko nga lugar, dapat gid kita mag-mask bisan sa balay. A carrier ukon nagadala sang virus wala man nagapili kaangay sang iya nga tapikan.
Subong nga wala sang kasiguraduhan ang tanan, dapat kita nga maghalong. Indi magkakulba kay ang kakulba nagatuga sang pagsalangisag. Kun may ginabatyag, ipahibalo sa pinakamalapit nga bulolngan.
Importante man nga mangin tampad kita sang atun status. Indi pagtaguon ang atun history sang pagbyahe, tawo nga nasumalang ukon nakasugilanon kag iban pa. Ini nga mga bagay importante para sa atun gobyerno agud mangin epektibo ang mga lihok kontra sa pandemya.
Mangin responsable sa kaugalingon, sa pamilya kag sa atun panimalay.
Pabakuron ang lawas paagi sa paglikaw sang mga bisyo, magkaon sang masustansya nga pagkaon kag mangin aktibo ang pagginawi.
Ang sakit wala sang may ginapili, gani tagsa-tagsa na lang sa paghalong sang kaugalingon./PN
