NATULTULAN bala ninyo ang “Guanco River” diri sa siyudad sang Iloilo?
Kon wala pa, amo ini ang extension sang Guanco St. (pakadto sa Muelle Loney) nga karon ginatawag sang madamo diri nga Guanco River tungod lubog ini sa tubig sa sulod na sang pila ka adlaw.
“Guanco Lake” gani ang tawag sang iban sini tungod yara ini sa dalanon nga wala lutsan pagwa sa sagad ula sang ulan diri.
Sadtong ugto sang Lunes sang nakasaboy kita sa upisina sang isa ka abyan diri, lapit sa tuhod ang dalom sang tubig diri nga halos malapawan na ang sidewalk.
Nagtuhaw ini kuno sang pila ka adlaw nga nagligad sang nag-ula ang Department of Public Works and Highways (DPWH) sang semento sa parti sang dalan, nga gina-repair sini, sa bibi sang Iloilo Pier malapit sa drainage pagwa sa Iloilo River halin sa Guanco Street.
Law-law nga trabaho matuod! Ang buho lang kuno sang poste ang gintampukan, ang ila ya gintampukan pati na ang alagyan tubig sang drainage pakadto sa Iloilo River.
Pero, basi mapasenyahan ta man ang DPWH (kon ila gid man trabaho ini) tungod galalain na sila sa madamo nga reklamo sang mga pumuluyo.
Man, daw ginapabay-an lang nila ang dapat madasig nga trabaho sa dalanon sang mga lay-ud nga mga kontraktor.
***
Siling sang National Food Authority (NFA) maganubo na ang bili sang commercial rice tungod sige na ang pagpasulod sa merkado sang mga NFA rice halin sa Thailand kag Vietnam.
Maganubo na ini kuno sang mga P1 tubtub P2 ang kada kilo samtang sige na ang pagbakal sang aton pumuluyo (tag-lima ka kilo lang kada adlaw) sang NFA rice sa tag-P27 tubtub P32 ang kada kilo, depende kon sa diin ginadala ini sang delivery.
Aba, Indi matuod ina a! In fact, bisan diin nga balita mamati (ukon magtan-aw sa TV) ang mga pumuluyo amo man gihapon ang bili sang mga commercial rice. Ang manubo nga bili yara gihapon sa P42 tubtub P45 kada kilo.
Nagmahal pa gani kuno ang ining NFA rice sa pila ka lugar tungod sa kadugay sang pagdiskarga sang NFA rice sa mga pantalan. Tungod kuno sa malain nga panahon. Tuod?
Samtang, isa ka negosyante sa bugas ang nagsiling nga basi indi na nila mapanubo ang bili sang commercial rice. Ina tungod mahal ang bakal nila sini. Halos man gani sila maka-ganansya kuno sa pagbakal sini sa mangunuma sang tag-P25 kada kilo.
Pero, indi ta pagbasulon ang mga mangunguma nga nagahingamu man gani makaganar sing maayad-ayad halin sa mga private traders.
Basulon ta ang gobyerno nga halos makabulig sa pagpa-ayad sang pangabuhi sang mga mangunguma. Maayo pa ang private traders kay nagahatag sang maayo nga kita sa mga mangunguma. (w_mateojr@yahoo.com/PN)
