MATINGIL sa dulunggan ang kada adlaw nga pagtalakay sang mga isyu natuhoy sa mga kontrobersyal nga ginpamakal sang city government nga drone, mga salakyan kag iban pa.
Wala na naganuto ang mga nagadumala sa syudad kon paano malikawan nga mangin kwestyunable ang ila mga akto. Dapat paminsaron sang mga opisyales sa syudad kon paano makalikaw sa mga pangpangduha-duha kag malisya.
Indi malikawan nga may mga empleyado sa gobyerno nga nagabantay lang sang higayon kon paano makapamentaha nga makaalgo gamit ang ngalan kag kainosente sang iban nila nga kaangay nga mga empleyado.
Madamo na sang transaksyon ang naglanog nga napun-an sang kontrobersiya sadto pa man. May ginakwestyon nga transaksyon sa pagbakal sang wheel clamps para sa clamping ordinance; may kwestyon sa pagbakal sang mga traffic lights; may kwestyon sa pagkontrata sang mga manok para sa palangabuhian sang mga pigado; kag karon kwestyunable naman ang mga ginpamakal nga salakyan, drone kag iban pa nga kagamitan.
Wala kwestyon kon ang mga head of office sang kada departamento sang city government ang nagahingyo para sa ila kinahanglanon agud nga mas mapaayo ang ila pagserbisyo sa pumuluyo, kon makabulig ang isa ka bagay agud nga magsulhay ang ila trabaho kag mapadasig ang pagserbisyo sa tawo.
Ginpaagi man ang tanan sa proseso, ginsunod man ang tanan nga patakaran apang basi may nagalaktaw kag may yara sang nagapalapaw agud nga makakagat sang makahililo nga mansanas.
Ginaganyat naton ang mga negosyante nga magpahamtang sang ila negosyo sa syudad agud nga magpagsik ang ekonomiya, agud nga makahatag sang trabaho kag agud nga mag-umwad ang pangabuhi sang mga Ilonggo. Apang, kon sa city hall ka magtransaksyon magabatyag ka sang kahangawa bangud basi ang imo negosyo maguba kon ini ang mabutang sa kontrobersiya bangud sa pagpamentaha sang mga daluk sa kwarta.
Nagalaum kita nga sa pagsulod sang bag-o nga pagdumala ni Mayor Jerry Treñas madula na ang kahangawa sang mga negosyante tuhoy sa madangatan nga kontrobersiya. Kuntani indi maliwat pa ang mga padugi nga makamantsa sa maanyag nga dagway sang pang-gobyerno sang syudad sang Iloilo.
Kuntani mahatagan sang update ang mga pumuluyo sa kon ano na ang natabu sa mga imbestigasyon nga ginhimo sadto nga tubtub sa karon wala mahibaluan kon ano na ang nadangatan, kon nayab-ukan na ang papeles, kon natampukan na ang papeles ukon wala na sang gana sa papeles.
Dapat ipabatyag sang nagadumala ang iya maisog nga panindugan sa pagpatuman sang kasuguan, patas nga pagtratar, alalangay nga paglantaw sa tanan kag pasabton kon sin-o man ang may salabton sa idalom sang kasuguan.
Dapat mapanas na ang panahon sang kabalaka, dapat dulaon na ang transaksyon nga may kahangawa. Himakasan sang bag-o nga administrasyon nga ibalik ang pagsalig sang mga negosyante sa city government kag ipasiguro nga wala sang resulta nga may kontrobersiya ang kada transaksyon nga matigayon.
Untaton na naton ang pagpangunyadi sa kaban sang syudad. Dapat magtrabaho ang mga empleyado nga tampad kag may dignidad kag wala nagapabulag sa inggat sang pilak.
Tion na nga sikwayon ang pagpatigayon sang makatalagam nga transaksyon sa city government. (bertladera@gmail.com/PN)
