INDI dapat matublag ang mga empleyado sang city hall sa mga ginbungat ni Congressman kag Mayor-elect Jerry Treñas nga iya kasuhan ang mga empleyado nga nag-intra sa pagkampanya pabor sa iya bilas nga si Mayor Jose Espinosa III sang nakaligad nga piniliay.
Kahibalo kita nga madamo sang mga nagahutik dulunggan ni Treñas, ilabi na ang nagapanigal-ot sa iya kilid, agud nga makapakita man sang ila abilidad, ginapalanog sa trumpa ang ila nga pagbulig sa kandidatura agud nga makakwa sang kabaylo sa tion nga makapungko na sa pwesto.
Indi na lipod sa tanan nga madamo sang luyag man makapwesto sa city hall, nakita nila ang daku nga ganaron kon yara sila sa linyada sang naga-uyat sang gahum, kag nagapanginam-kinam sila sa masagamsaman nga benepisyo kon nagapungko na sa pwesto.
Matuod nga nakabungat si Treñas nga iya papilion ang mga natungdan nga iya ginpangmitlang nga mag-resign ukon iya nga kasuhan bangud sa pagpasilabot sa kampanya paagi sa paggamit sa resources sang syudad.
Ginpangtumod sini sanday Jojo Castro, Sports Development Officer V; Moises Salomon, Sports Development Officer III; Phil Barcelona, officer-in-charge sang Barangay Affairs; Felix Muchada, Executive Assistant for Security; Dr. Bernard Caspe, City Health Office head; Engr. Bobby Dumanil, Task Force Anti-Squatting and Illegal Structures (ASIS) head; Engr. Bobby Divinagracia, City Engineers Office (CEO) head; Jason Gregorio, Local Youth Development Office (LYDO) head; Juncae Manikan, Local Civil Registrar head; kag Eireen Manikan, assitant tourism officer.
Namitlangan man sanday Retired Police Major Dionisio Duco, Vincent Dela Cruz, Piper Billones, Melvin Sorongon, kag Jun Carl Espinosa Maderable.
Matuod nga may mga yara sa listahan nga nakabungat sang mga masakit nga tinaga, nagtamay, nagpakamalaut kag naghikay sa iya. Nakatuga sila sang pilas sa iya balatyagon kag napagkit sa iya pang-ino-ino ang mga tinaga nga daw sa labaha ang katalom.
Apang may mga tawo man nga nagtuman lang sang ila katungdanan, nangin masinulundon sa nagadumala sa syudad kag bilang ila lider sa city hall.
May mga pila sa ila ang biktima sang intriga kag kahikaw sang iban nga luyag makaangkon sang espasyo sa city hall. Ginpakalain nila ang iban agud nga sila ang matalupangdan kag mahatagan sang posisyon.
Sa nasiling ko na, indi dapat magkabalaka ang iban sa ila nga nagtuman lang sa ila katungdanan. Kaangay man nga kon sa sina nga panahon si Treñas ang yara sa pwesto nga indi nila mabalibaran kundi tumanon man ang iya nga luyag.
May mga empleyado dira nga madugay na nga kilala si Treñas. Nangin kabahin sila sang kadalag-an kag kadungganan sang city hall. Mas kilala sila ni Treñas kaysa sa mga intrigero kag mga mahikaw nga nagaduhol sang makagalaba nga sugilanon sa dulunggan ni Treñas.
Mas kilala ni Treñas ang pila sa ila. Madugay na sila nga nag-updanay sa trabaho. Natilawan na sila sang panahon kag pagpanghangkat sang mga sirkumstansya apang nagpabilin nga mabakod ang ila pagtamdanay.
Sa likod sang mga makatulublag nga pahayag ni Treñas, mas talalupangdon ang iya nga pagka-maluluy-on kag pagka-mahinagpanon. Madugay na siya sa pulitika kag kahibalo siya nga dapat indi magtuga sang kaaway kundi dapat pamuraon ang mga kahimbon. (bertladera@gmail.com/PN)
