NAGAUSOY na kita sa banas padulong sa bag-ong tuig. Tuman ka bug-at sang aton gin-abaga nga mga sirkumstansa nga naghatag gid sa aton sang daku nga palaligban kag kahangawa.
May mga higayon nga luyag na naton magsungka sa hangkat sang sitwasyon. Nagakalugaw-an kita kag halos magluhod ang aton ispirito bangud sa mga pagtilaw nga aton ginaatubang.
Sa una nga habyog sang hitabu, daw mapuklid kita sa aton ginatindugan. Nagabatyag kita sang kahadlok kag kabalaka kon ano ang aton mangin kahimtangan sa palaabuton. Nagabalang-balang kita kag nagapangita sang masapnayan agud nga indi kita mamusdo sa aton ginatindugan.
Sa sini nga sitwasyon, imo makita ang matuod, ang suod, ang hapaw, kag umalagi nga mga abyan. Ang kada isa magatukal sa ila alukaba depende sa kadalom sang ila pagkabalaka sa imo kahimtangan.
Apang, bisan ano pa nga sitwasyon ang aton ginaabaga sa karon indi kita dapat magdumot ukon magpahigot sa sini nga kahimtangan. Yara sa aton ang gahum sa paghukas sa sini nga kadena nga nagabalighot sa aton paminsaron. Mahimo naton ini paagi sa pagtulok sa palaabuton kag indi na magpatublag sa landong sang nagliligad.
Nagatindog kita sa ganhaan kag handa nga mag-abi-abi sa pagsulod sang bag-o nga tuig. Sa pagbukas sang sini nga ganhaan dapat nga mangin mamag-an ang aton pagtikang paagi sa pagbilin sang aton mga hibubun-ot, kaugot, kag pagdumot sa magabiya nga panahon.
Kaangay ini sa akon natalupangdan sang makita kag masugilanon ko sang damlag lang si Police Major Charlie Sustento. Makita sa iya nawong nga nagapokus na siya sa iya palangabuhian bilang isa ka sibilyan. Mas nanamian na siya sa pangabuhi sang isa ka sibilyan kaysa sa bilang isa ka pulis.
Tuman ka daku nga unos ang nagtublag sa iya karera bilang pulis. Nagdedikar siya sa iya propesyon kag madamo sang naagom nga pagkilala kag nangin talalupangdon ang iya nga mga hinimuan.
Apang nag-abot ang daku nga delubyo, kaangay sang daku nga balud nga naghampak sa iya. Ginguyod siya sang sirkumstansya palayo sa pangpang kag gindala sa tunga sang palaligban. Nagkapa-kapa siya agud nga indi malumos tubtub nga may yara sang mga abyan kag kakilala siya nga nagtinguha nga siya ang mabatak sa iya kahimtangan.
Sa karon, nakabalik na ang iban sini nga kaupdanan sa serbisyo nga nalakip sadto sa kaso. Sa iya bahin, luyag niya nga maglawig pa siya sa iya kahimtangan sa karon bilang sibilyan bangud mas naandan na niya kag naka-adjust na siya.
Kon may mga nabuligan ka sadto, may yara man sang magabulig sa imo. Ini ang nakita ko sa iya nawong sa karon, madamo sang nabalaka kag nagaulikid sa iya. Mas masaku na siya sa iya palangabuhian, sa iya negosyo, kag halos ginakalimtan na niya ang balud nga nagsalyada kag nagpaapok sa iya sa sini nga kahimtangan.
Wala sang sirkumstansya nga makapapukan sa tawo nga ginpanday sang panahon. Mas nagapag-on siya samtang ginabakol sang balud. Mas nagatuon siya kon paano sakyan ang balud para sa iya pabor kag agud nga indi siya malunod.
Ginhimo ko nga palaanggiran ang natabu kay Police Major Charlie Sustento kag kon ano ang iya ginahimo sa karon agud nga mabatak ang iya sitwasyon kag ang pagbiya sa landong sang nagliligad agud nga maatubang ang daku nga oportunidad sang palaabuton.
Kuntani kaangay sa iban sa aton, kalimtan na ang nagliligad, indi kita magpahigot agud nga mas malayo ang malab-ot sang aton pagtikang. Mabudlay magpangabuhi nga nagalukdo sang kaugot kag pagdumot. Gina-okupar sini ang aton pinsar kag balatyagon kag indi kita makapaminsar sang mas maayo nga dapat buhaton.
Yara sa aton ang gahum sa pagkakas sa kadena sang nakalipas. Yara sa aton ang higayon sa paghakus sa tan-ay sang palaabuton.
Mangin mamag-an ang aton pagtikang sa pagsug-alaw sa bag-o nga tuig kon ibilin naton ang aton ginalukdo nga kalain sang buot. Kita mismo ang nagapaantus sa aton kaugalingon bangud kita mismo ang nagaguyod sini.
Sa pihak sang mga panghangkat sang nakalipas nga tuig, bangud sa pandemya, sa kapuraot sang pangabuhi, sa natublag nga edukasyon, sa mabudlay nga pagsinarayo kag sa pamahog sang virus, yari kita sa gihapon nga nahatagan sang higayon nga masug-alaw ang bag-ong tuig. May dala ini nga daku nga paglaum agud mas mapatin-an naton ang aton kabuhi.
Yara gid sa aton ang pagpili sang husto nga disposisyon sa kabuhi. Yara sa aton desisyon kon magpabilin kita nga ulipon sang nagliligad ukon mangin hilway gikan diri agud aton maatubang ang masanag nga bwas-damlag.
Mas manami gid magtikang kon ang kada tapak sang aton tiil tuman gid ka mag-an. (bertladera@gmail.com/PN)
