NATAPOS na ang sarswela kag moro-moro, may gindeklarar na nga nagdaug nga kandidato, may naghibi kag nanugon, may malas-ay ang yuhum kag sa nagdaug may nagaplano na nga siya ang pagasukton.
Makasalakaw man nga hambalon nga ang SK Federation election sa syudad kag sa mga kabanwahanan ang nalikupan sang maitom nga handom sang mga salawayon, kabalan, kag wala sang patugsiling nga mga pulitiko.
Apisar nga may bag-o na nga kasuguan, ang SK Reform Act, apang sa gihapon sila ang nagadinamak sa luyo sang kasuguan, padayon nga gina-insulto ang layi, kag ginalutakan ang nawong sang katarungan.
Ginatun-an sang mga gung-an nga pulitiko kon sa diin dapit ang litib sang layi, kon sa diin nga bahin ang mahuyang, kon sa diin may ligya nga pwede sila makahampang. Naglataya sila sa kurit, nagahalong nga indi matabis. Ginhimo ang tanan nga padugi, bisan pa dinamak kag malaw-ay sa panulukan, nga sa ila pagpati wala nagasupak sa kasuguan. Maathag nga basta indi makasupak sa layi, ila nga himuon bisan pa nga kwestyunable sa moralidad.
Makaluluoy lamang ang mga kabataan, mga lanubo, nga ang iban sa ila mga propesyunal na, padayon nga ginai-impluwensyahan sang mga salawayon nga mga tigulang nga pulitiko.
Bisan pa nga nagapanginwala ang mga kabataan nga sila ang gina-intrahan apang maathag naman nga sila ang ginatipon sang mga alipores sang pulitiko, ginapakaon, ginahatagan sang kwarta kag gina-alungay agud nga mangin kahimbon nila.
Kahibalo kita nga wala sang may magaaku, wala sang may magapamatuod nga sila ang ginasakdag sang mga pulitiko ukon mga tawo nga may interes sa pulitika nga gamiton sila sa palaabuton nga midterm elections.
Kahibalo man kita nga mabudlayan ang DILG sa paghatag sang balor sa sini nga mga sugilanon bangud mismo ang mga natungdan ang nagapanginwala kag kon may yara man sang nagalapta sa social media nga mga hitabu kag kon wala sang pormal nga reklamo ukon may magapanindugan, magapabilin ini tanan nga huring-huring lamang.
Bulahan ang mga lugar nga ang mga pulitiko nagpahimunong, wala nagtusmaw sang ila mga kamot, kag wala nagpabati sang ila nga ngurob.
Apang, paano naman ang kadungganan sang mga nagdaug nga mga SK Federation president sa ila tagsa ka lugar nga ginsuportahan kag gin-impluwensyahan sang pulitiko ang ila kadalagan? Paano sila magabayad sang ila kabalaslan? Tubtub san-o sila magahandu lamang sa mga instruksyon sa ila? Paano nila bugtuon ang kadena nga nakaangkla sa ila nga tiil?
Nareporma na ang Sangguniang Kabataan, paagi sa pagligwat sa mga edad, sa mga patakaran, kag sa paghatag sa ila sang mas mabug-at nga katungdanan. Natigayon nga nareporma paagi sa bag-o nga kasuguan, apang ang mga kabangdanan sa pagbag-o ang nagapabilin nga mabudlay ligwaton.
Maislan man ang ngalan ukon maligwat ang kaundan sang kasuguan, apang ang mga motibo, mga padugi kag sistema sa pulitika ang magalamon sa sini nga kasuguan.
Ang naagom nga numero sang boto sa kadalag-an indi makagarantiya sang lubos nga pagsuporta sang nasakupan.
Mabudlay maglakat sa dalan kag magpangamusta sa nasakupan nga may mantsado nga kadalag-an. (bertladera@gmail.com/PN)
