MAINIT ang sugilanon sang pagpabakuna kontra COVID-19 subong. Lakip na ang isyu kun bala hilway sa katalagman ang pagpakuna, makapugong bala sang paglaton sang virus ang bakuna, ukon ini bala ginapahanugotan na sa pungsod?
Ini nga mga palamangkutanon sang mga Filipino wala pa lubos nga nasabat sang gobyerno. Ngaa man?
Maathag nga gusto pa gani magpalusot sang bakuna gikan sa China nga wala sang pahanugot gikan sa Food and Drug Administration.
Kun ini nga mga palamangkutanon waay pa masabat, mapabakuna ka bala?
Sigurado ako nga kun indi ka magpamalibad, may kakulba ka magpatublok sang dagum sang bakuna.
Ngaa dako ang isyu sa pagsalig sang tawo sa gobyerno sang Pilipinas?
Ayhan nakabugtaw na ang mga Pinoy nga sa madamo nga pangako sang mga politiko, halos wala gid sang may natuman?
Ayhan nakabugtaw na ang kadam-an nga tanan kita biktima sang pagpalapaw lang?
Sa pagtuon matuod man nga ang bakuna ukon bisan ang bulong wala sang perpekto nga epekto. Indi kita makalaum sang 100 percent nga efficacy sini sa atun lawas ukon depensa. Mas labaw na gid kay bag-o pa lamang ang bakuna para sa COVID-19.
Ayhan, kinahanglan sang gobyerno maghatag sang maathag nga sabat sa tanan nga palamangkutanon sang mga Filipino. Indi lang pagsabton ang mga isyu sang inabugado kag tratuhon ang mga Filipino nga daw kulang sang tinun-an kag kinaalam.
Mentras indi makahatag sang maathag nga sabat ang gobyerno sa kahangawa sang mga tawo, indi mapilit nga magpatublok ang mga Filipino.
Kadamo man abi sang mga isyu sa gobyeno nga nakaapekto sa kredibilidad sang mga ara sa poder. Mga isyu sang korapsyon nga kun kaalyado ang naulamid, ginapangapinan pa.
Sin-o man ang magsalig nga maathag ang korapsyon sa isa ka opisina, apang ang mga bitik nga tawo sa gobyerno amo ang ginapabugal nga ginkakas sa serbisyo.
Ano abi ang pagtupong sang isa ka tesorera sang barangay nga ginpahalin bangud sa ginaalegar korapsyon sang sa binilyon ka pesos nga nadula sa PhilHealth nga ginaapinan pa ang mga naulamid?
Isyu lang sang pagsalig ang upang sini nga pagpangbakuna sang gobyerno. Kun makita sang tawo nga masaligan ang gobyerno, wala na sang magpamalibad kun ano man ang ila himuon.
Ibalik ta ang pagsalig sang tawo sa gobyerno agud mangin matalunsay ang pagpatuman sang ano man nga programa para sa tawo.
Sa liwat, teh mapabakuna ka?/PN
