NAKABATON sang pagdayaw gikan sa United Nations Development Programme ukon UNDP ang pinakauna kag mapuslanon nga ordinansa nga ginduso ni 4th District Board Member Rolando Distura.
Nagpadala sang sulat si Selva Ramachandran, Resident Representative sang UNDP, kay Governor Arthur Defensor, Jr. sadtong Deciembre 6, 2022.
Gintalupangod sini ang pagkapinasahi sang Iloilo Provincial Government sa tanan nga nagaduso kag nagasakdag sang Renewable Energy.
Gindayaw sini ang IPG sa pagpasar sang I-PORE tungod pinakauna ini sa pungsod Pilipinas kag nagalaum sila nga magaserbe ini nga ‘excellent example’ para sa tanan nga mga local government unit.
Nahibaluan nga gin-aprubahan sadtong Agosto 30, 2022 sa 9th Regular Session sang 14th SP ang Provincial Ordinance No. 2022-277 nga may tigulo “AN ORDINANCE PROMOTING THE DEVELOPMENT, UTILIZATION, AND COMMERCIALIZATION OF RENEWABLE ENERGY RESOURCES, ILOILO PROVINCIAL ORDINANCE FOR RENEWABLE ENERGY (I-PORE), APPROPRIATING FUNDS THEREFORE, AND FOR OTHER PURPOSES”.
Ang malip-ot sini nga tigulo amo ang “ILOILO PROVINCIAL ORDINANCE FOR RENEWABLE ENERGY ORDINANCE OF 2022 (I-PORE 2022)” nga ang author kag sponsor amo si 4th District Board Member Rolando Distura kag co-sponsor sanday Vice Governor Christine “Tingting” Garin, 3rd District Board Member Jason Gonzales, 1st District Board Member Marcelo Valentine Serag, kag 4th District Board Member Domingo Oso, Jr.
Ginkilala sang UNDP kag DOE, paagi sa special citation, ang Iloilo Provincial Government bangud sa paghimakas sini nga maduso ang pagtin-ad, paggamit, kag komersyalisasyon sang Renewable Energy paagi sa Iloilo Provincial Ordinance for Renewable Energy (I-PORE) nga gin-author kag gin-sponsor ni 4th District Board Member Rolando “Rolly” Biaca Distura.
Katuyuan sang sini nga I-PORE 2022 nga matumod kag mabenepisyuhan ang mga renewable energy, indi lamang ang solar kag wind energy kundi lakip man ang biomass, hydro kag iban pa nga kuluhaan sang enerhiya para sa padayon nga pag-umwad sang Iloilo.
Nahibaluan nga may mga ospital na nga nagakwa sang kuryente gikan sa solar energy kag target man sini nga makabenepisyo sa palaabuton ang mga buluthuan, mga institusyon sang gobyerno kag sa ulihi lakip na ang tagsa ka panimalay.
Kinahanglan nga mapahagan-hagan ang carbon footprints kag agud indi kita lubos nga magsandig pa sa fossil fuel, ilabi na nga masami nagasaka ang presyo sang gatong.
Ginadayaw sang UNDP ang pagpakig-partner sang Iloilo Provincial Government sa ila, sa DOE, kag sa Global Environment Facility (GEF) paagi sa Development for Renewable Energy Applications Mainstreaming and Market Sustainability (DREAMS) project agud mahatagan sang katumanan ang 75kW Iloilo Provincial Hospital Rooftop Solar PV Project.
Importante ang ini nga proyekto tungod makahatag ini sang istable kag tinlo nga enerhiya sa ospital nga nagaserbe sa masobra 409,000 ka panimalay kag diri man nahamtang ang molecular laboratory nga yara sa fontline sang probinsya sa COVID-19 pandemic.
Sadtong Enero 2022, nakumpleto sang IPG ang Iloilo Provincial RE Plan (IPREP) nga nagaplastar sang mga programa kag aktibidades agud nga mapapag-on ang pagpatuman sang RE sa probinsya.
Sining Agosto 2022, angot sa IPREP, bangud sa kakomitido sang IPG, natigayon nga mapasar sang 14th Sangguniang Panlalawigan ang Iloilo Provincial Ordinance for RE (I-PORE) nga nagasaad sa alokasyon sang fiscal resources gikan sa iya tuigan nga badyet.
Pinakauna ini sa Pilipinas kag dapat magaserbe bilang excellent example para sa iban pa nga mga LGU.
Sadto pa man, kilala na ang kinaiya ni Board Member Distura sa pagdihon sang mga ordinansa nga una kag mapuslanon, nagapaminsar siya kag nagatuon kon paano makabalay sang mga ordinansa nga may epekto para sa kaayuhan sang mga Ilonggo.
Masangkad ang eksperyensya kag paghangop ni Distura sa panghimanwa kag pagserbisyo sa mga pumuluyo, ilabi na nga malawig ma ang iya pagserbe bilang alcalde sa banwa sang Dumangas.
Ang bulan sang Deciembre ginadumdom bilang National Energy Consciousness Month, bulan man ini sang paskwa kag piyesta sang mga regalo.
Makabig ini nga regalo ni Board Member Distura kag bug-os nga 14th SP sa pagpamuno ni Vice Governor Christine “Tingting” Garin ang I-PORE 2022 bangud daku ang mabulig sini sa pumuluyo sa probinsya sang Iloilo kag makapasiguro sang masanag nga palaabuton nga matin-ad nga pagpangabuhi.
Lauman naton ang masunod nga mga ordinansa nga iduso ni Distura may angot sa sini nga nasambit nga ordinansa. Magasangkad ang serbisyo para sa tawo, mas may dugang nga ihibalo ang pumuluyo kag lauman na ang pagsakdag sang mga pumuluyo sa adbokasiya sang probinsya tuhoy sa renewable energy. (bertladera@gmail.com/PN)
