TION na nga hatagan sang katumanan ang madugay na nga plano nga ipakay-o ang mga merkado sang syudad sang Iloilo. Pagpakay-o nga indi lang hampol-hampol, kundi pagkakay-o nga may daku nga pag-umprubar agud nga mas makagalanyat sa mga bumalakal kaangay sadtong una nga mga panahon nga mas ginapili nga kadtuan sang nagapanindahan.
Pila na ka administrasyon ang nagplano nga ipakay-o ang Iloilo Central Market. Pila na ka laragway ang ila gindihon agud nga ipakita ang perspektibo sa kon ano ang mangin dagway sa tion nga matapos ang proyekto.
Madamo na sang sumpakilay ang natabu. May kaso na nga nagdangat sa korte bangud may nagapamalabag.
May mga grupo nga luyag ipatuman ang plano, may grupo naman nga nagakahangawa sa ginaplano bangud nagapati nga sila ang maalimunaw sa merkado.
Apisar nga madugay na ang plano para sa merkado, apang talalupangdon nga masami ini nga ginahatagan sang pagtamod kon nagahilapit na ang eleksyon. Kaangay ini sang maranhig nga nagabangon-bangon kag dawa ini mahim-os. Gina-ukay ang merkado, gina-uyog, gina-ayag, ginapulsuhan ang ila suporta kon sa diin sila nga kandidato nagalinya.
Kuntani sa sini nga higayon, ang ini nga plano ang matigayon. Kuntani indi na pagdabukan sang pulitika kag dapat wala na sang sugilanon kon sa diin sila magalinya ukon magasuporta nga kandidato. Indi naton pagtugutan nga mangin pulitikado ang aton pagpalakat sa mga merkado, sa pagtratar sa mga nagabaligya kag sa paghatag sang katumanan sa proyekto.
Kon matigayon, ini isa ka mnami nga legasiya nga mabilin sang mga nagadumala sa syudad. Ang mga matag-as nga edipisyo nga nagtindog sa distrito sang Mandurriao ang ginapanag-iyahan sang mga negosyante kag indi ina makabig nga iya gid sang syudad nga proyekto.
Dapat may yara sang mapabugal nga edispisyo kag pag-imprubar nga himuon ang city government sa iya kaugalingon nga paghimakas. Pagpakay-o sang mga halos nalipasan na sang panahon kag higayon. Pagtukod sang mga istruktura nga angay kag mabenepisyuhan sang mga tawo kag indi bangud lang sa ambisyon kag gamiton nga puntos batok sa mga kasumpong sa pulitika.
Agud nga indi magkahangawa ang mga market vendor, dapat suguran na ang paglista sa ila nga maplastar sa kon sa diin sila nagapwesto nga kiosko kag kon sin-o ang naga-okupar sa sina nga kiosko.
Dapat may polisiya nga ipaathag antes suguran ang pagkay-o, samtang ginakay-o kag pagkatapos makay-o, kon paano ang ila pagbaligya kag kon sa diin sila temporaryo nga ipahamtang. Hatagan man sila sang pasalig kag kasiguruhan nga may yara sila sang kiosko nga mabalikan sa tion nga mahuman ang merkado.
Madamo man sang magapamalabag apang dapat tumanon sang syudad ang iya plano. Plastaron ang mekanimso, ang padugi, ang proseso sa atubang sang tanan nga manugbaligya agud nga mapanas ang ila kahangawa paagi sa pagpaathag sa ila sa katuyuan kag madangatan sang merkado.
Dapat mapatud-an sang syudad nga wala sang mantsa kag malisya ang iya plano nga pagpatuman sang proyekto. Indi magpatublag sa dikta kag taghol sang luyag magdominar sa merkado.
Tion na nga ibalik ang kaanyag kag ang bugal sang markado nga merkado nga Iloilo Central Market./PN
