GINMANDO sang aton gobyerno nga sarhan ang tanan nga mga buluthuan sa pungsod sugod sadtong Marso 2020 tubtub Oktubre 2020, pagkatapos nga gin-deklarar na sang World Health Organization ang COVID-19 pandemic.
Pagkatapos sadto, sang amat-amat na maglaka ang panglaton sang COVID-19, gintugutan na ang distance learning, ukon ang online learning sa mga estudyante nga may magamit nga computer kag paagi sa mga delivery modules sa mga estudyante nga wala sini, nga ang resulta ginabalik sang mga ginikanan sa mga manunudlo.
Sang ulihi gintugutan na ang blended option, kon diin ang estudyante makasulod na sa eskwelahan sa pila ka adlaw sang five-day school days kag pagtuon sa iban nga inadlaw paagi sa online learning ukon sa paggamit sang learning modules.
Gintugutan naman sang gobyerno sugod sang Setyembre 20, 2021 ang in-person schooling sa bug-os nga five-day school days sa mga low-risk nga mga lugar.
Samtang, ang iban nga schools nagapatuman pa sang blended learning nga gamit ang modules kag distance learning tubtub Oktubre 31, 2022.
Finally, sugod sadtong Nobyembre 2, 2022, ang tanan nga public kag private schools gintugutan na mag-transition sa 5 ka adlaw nga in-person nga mga klase.
***
Napatuman naman ang full implementation sang K-12 curriculum – Kindergarten tubtub Grade 10 plus Junior HS (Grade 11) kag Senior HS (Grade 12).
Ginpatuman ini sugod sadtong School Year (SY) 2016-2017 nga lakip ang nagapasakop sa Alternative Learning System, pagkatapos ginsugdan anay ang implementation sang Grade 11 sa 33 ka pilot public schools sadtong SY 2012-2013.
Galaum ang Dept. of Education (DepEd) nga ang K-12 graduate sa Senior High School (Grade 12) indi lang ready agud pagpadayon sa kolehiyo kundi agud maka-ubra dayon, kon luyag nila, sa fields of Agriculture, Electronics kag Trade ukon Entrepreneurship, sunu sa technical/vocational career track nga ginpili nila sudlan.
***
Gipirmahan ni Secretary of Education kag VP Sarah Duterte-Carpio ang DepEd Order No. 034, series of 2022, nga nagapatuman sang bag-o nga school calendar para sa SY 2022-2023 nga nagatalana sang pagsugod sang klase sa Agosto 22 tubtub sa pagtakop sini sa Hulyo 7, 2023.
Nangin kontrobersyal ugaling ini tungod sa sina nga schedule may klase pa sa summer months sang Marso, Abril kag Mayo.
Nagsugod na gani ang mga reklamo sang mga estudyante (lakip gani sang mga manunudlo), labi na gid sa bahin sang public schools sa elementarya kag hayskul, tungod sa sobra kainit kag kagin-ut sa palibut nga bisan ang mga bentilador ang ginahuyop mainit nga hangin. May gin-report na gani nga nose-bleeding, sakit sang ulo, kabudlay sang pagtuon, kag iban pa nga ginabatyag.
Okey lang sa mga private schools nga aircon ang mga kwarto. Apang sa mga public schools, ahay daw mga pinunubol!
Lately, ang heat index nagdangat na, sa siyudad sang Iloilo, sa 42 degrees Celsius. Sobra kataas nga hilanat ini kon nagamasakit ka!
Napilitan na gani ang iban nga mga manunudlo nga dalhon ang mga estudyante sa gwa sang lagwerta sang eskwelahan kon diin may landong sang mga edificio ukon mapasilungan nga kakahuyan.
Tungod sini, naggwa ang mga panawagan nga ibalik ang daan nga bakasyon sang mga estudyante sa summer months sang Marso, Abril kag Mayo.
Personally, sugot gid kita nga ibalik ang bakasyon sang mga estudyante sa summer months. Una, tungod naandan na naton ini – estudyante, manunudlo, mga empleyado sa upisina, kag bisan sang mga trabador sa construction kag mga kargador sa piyer nga nagapati-al sa init apang kahibalo magpaumpaw sang init sa ila pagpahuway, padayon nga pag-inom sang malamig nga tubig kag pagsuob sang putos sa ulo kag long sleeve nga bayo bilang depensa sa init. Sa kadam-an, okey bisan mag-exercise pa gani sa gwa bag-o 10 a.m. tubtub 3 p.m. kon san-o masingkal na ang init.
In fact, kahibalo ang tanan kon paano ma-enjoy sang mga estudyante ang ila bakasyon sa summer time sa mga parke kag mga baybayon agud magsinadya kag kon diin nga mga lugar nga makalagaw-lagaw sila agud magpalamig kag mag-take sang masulod sa ila tiyan nga makapalamig sa ila, katulad sang malamig nga softdrinks, ice cream ukon halo-halo.
Samtang, segurado ko gid nga indi maka-enjoy ang mga estudyante sang ila bakasyon sa binulan nga mabagyuhon sa Hulyo tubtub Agosto. Paano ka abe matuod maka-enjoy kon may bagyo, pagbinaha-baha, landslide, kag may storm surge ukon pag-awas sang suba lapit sa inyo puluy-an? Binulay-og ina ya nga kaisipan, kon si Pedro pa, ang magsiling nga maka-enjoy ka sa binagyuhon nga panahon./PN
