MADAMO na sang mga plano ang ginpungkuan, ginpasad kag ginlauman nga matigayon para sa kasulhayan sang ilig sang trapiko sa mga dalanon sa syudad sang Iloilo apang ang iban sini ang sa gihapon nagapabilin nga damgo kag wala pa sang katumanan.
Apisar sang sini nga pagkaatrasar, pagpabuyan-buyan sang mga nagadumala sa syudad, apang wala naga-untat ang mga may katungdanan sa paghatag sang solusyon sa sini nga palaligban.
Ginaduso naman nga kakason ang mga ‘isla’ sa rotunda sang atubang sang kapiltyo agud nga maghawan kag mabuhinan ang kaguot sang trapiko.
Ginatun-an man ang pagpatuman sa palaabuton sang Advance Traffic Management System ukon ATMS kag may mga napatigayon na nga ‘traffic count’ ukon pag-isip sa kon pila ka salakyan ang nagalabay sa isa ka tion sa isa ka dalan ukon sa sanga sang dalan.
Gintuad ni Jeck Conlu ang tagpamuno sang Public Safety and Transportation Management Office ukon PSTMO nga ang pagtuon ang 80 poryento na nga nakumpeto ilabi na sa bahin sang technical kag engineering design.
May mga cctv camera nga ipahamtang agud mamonitor ang bulyada sang trapiko, ang nagalapas sa patakaran kag kon may magluntad nga aksidente sa mga dalanon, kag ang footage gikan sa kamera anga makita man sa command center.
Mahapos nga matumod kag madakpan ang mga nagalapas sa kasuguan sa trapiko nga wala sang traffic aides nga nagadumala sa mga dalanon.
Manami pamatian nga may plastado nga plano para sa pagpasulhay sa ilig sang trapiko sa syudad. Makita ini sa mga mayor nga dalanon kag may mga pagbag-o nga matalupangdan sa tion nga maumpisahan na ang pagpatuman.
Apang dapat man nga ipatudok sang gobyerno sang syudad sa mga barangay officials nga may obligasyon man sila sa ilig sang trapiko sa ila nasakupan nga mga lugar.
Indi masakop sang syudad ang tanan nga dalan sa kabarangayan sa pagpahamtang sang sini nga proyekto bangud sa limitasyon sang pondo, apang ang mga opisyales sang barangay mahimo makapatuman sa ila lugar sang mga patakaran sa trapiko.
Dapat mga opisyales sang barangay may kaugalingon man nga mga ordinansa agud madisiplina ang mga naga-park sa kilid sang dalan, sa mga nagatalyer sa kilid sang dalan nga nagatumpok ang mga salakyan, ang mga sikad nga nagasinumbali kag wala nagapahigad, kaangay man sa mga traysikol nga nagapahala lang sang ila paglarga sa dalan.
Mas manami kon magsibu ang tanan, alalangay, dululungan sa pagpatuman sa mga patakaran sa trapiko.
Tion na nga magmuklat naman sang ila mata sa kamatuoran ang mga oipsyales sa barangay kag indi pagtugutan nga himuon nga pribado nga parkingan ang kilid sang dalan, nga dapat may regulasyon para sa mga nagabiyahe sang trayskad kag traysikol kag patakaran kon paano gamiton sang husto ang dalan nga wala sang masablag mga mga motorista.
Angay kag dapat man nga ipakita sang pumuluyo ang ila disiplina sa kaugalingon, ang pagbuylog sa komunidad kag ang pagrespeto sa mga otoridad kag sa gobyerno.
Ang mas maayo nga pagdumala sa trapiko ang nagadepende sa mga opisyales ilabi na sa pagpatudok nga ang dalan para sa tanan./PN
