
ANG tourism industry naghina gid sing labi tungod sa Covid 19 nga nagpakunol sang panghulag sang mga tawo sugod sadtong una nga binulan sang 2020.
Indi lang sa pagpadayon sang negosyo, pagpangita sang trabaho, kag bisan sa pagpatuman sang mga obligasyon kag serbisyo sang gobyerno.
In fact, naapektuhan gid sini ang ekonomiya sang bug-os nga kalibutan. Kag indi manegar nga daku gid nga halit ang natuga sini sa turismo.
Tungod sa kulba sa Covid 19, nagkunol ang mga byahe sa tunga sang mga pungsod kag dira mismo sa kada pungsod. Paagi sa eroplano man, tren, kag iban pa labi na gid ang naga-cross border.
Masakit batunon, pero madamo nga mga tourism establishment kag travel agencies ang nagpaloy-paloy ang negosyo. Namilagpilag man ang nabilin sa minilyon nga mga empleyado nila sadto.
***
Sa pagkalma na sang pagpanghalit sang Covid 19 sa sige pang-bakuna kag padayon nga health measures, of course, kinahanglan mapabalik na sing husto ang kapagsik sang turismo.
Apang ang bag-o bala nga tourism slogan sang pungsod sa idalom ni Presidente Marcos Jr. ang bagay nga sabat sa pagsanyog na sang aton tourism industry?
Ining bag-o nga tourism slogan amo ang “Love the Philippines”. Ginbulos ini sa “It’s more fun in the Philippines” sa panahon ni Presidente Aquino tubtub sa panahon ni Presidente Duterte, nga nagsalig gid sa mabungahon nga epekto sini sa aton turismo.
Upod kita sa pagpati sang duha ka presidente nga mas makagalanyat gihapon ang “It’s more fun…” sangsa “Love the Philippines”.
***
Sa pagbaligya sang turismo sa mga bisita, foreigner man ukon local folk, importante nga masabat ang ila “expectations” nga mag-enjoy sa lugar nga luyag nila kadtuan, ukon diin man nga makumbinse sila sang tourist agency.
“Mag-enjoy ka!” siling gani sang sexy nga kasumpong sa poker ni James Bond sa pelikula nga Golden Eye pagkatapos lutuson siya ni Bond sa sugal nga Lucky 9 sa casino.
Sabat ni Bond: “Amo gid man ina ang akon motto sa kabuhi: Mag-enjoy!”
Of course, interesado ang sin-o man nga luyag mag-turista nga mahibal-an ang kinaiya nga kultura, sa kabug-usan, sang local folks nga makadtuan, ang pinasahe nga mga bagay sa palibut, kag mga kahiwatan kag adventure nga ginapasalig sang slogan nga “Love the Philippines”. Apang ina kon mahimo gid nila ang tanan nga ini!
Ang slogan nga “It’s more fun in the Philippines” wala nagapasalig nga ini tanan ma-enjoy sang mga turista. Kay imposible ini!
Ang ginapasalig lang sini ang luyag lang nila ma-enjoy sa partikular nga lugar nga kaya sang ila badyet.
***
First impression is lasting! Importante sa isa ka nagaplano sa pag-tourist visit sa isa ka lugar ang una niya ma-expect halin sa sugid sang iban…kag sa tourism slogan mismo!
Halin dira makalaum na siya mag-enjoy sa iya pagbisita sa ina nga lugar sa bulig na sang travel agency kag sang tourist guide.
Tungod sini dapat maathag sa tourism slogan mismo kon ano ang ma-expect niya sa iya pagbisita.
Maathag ini sa mensahe mismo sa slogan nga: “It’s more fun…”. Indi ini maathag sa “Love the Philippines”.
Sa nasiling ta na sa ibabaw, indi tanan nga talan-awon ukon buluhaton sa kaladtuan nga lugar ang ma-enjoy sang turista nga ginatanyag sang “Love the Philippines”.
Isa pa, ngaa “piliton” ta gid ma-love ang Filipinas sang foreign tourists kay lain man ang ila pungsod nga dapat ma-love gid nila? Labi na gid kon magsulod sa ila pensar ang madamo nga malaw-ay nga hitabo diri sa pungsod.
Matuod, madamo man nga bagay nga ma-love sang mga turista sa pila ka aspeto sang Filipinas, pero indi sa kabug-usan kay dapat natuon lang ini sa ila kaugalingon nga pungsod.
Samtang maathag ang mensahe sang “It’s more fun…” agud mag-enjoy lang ang mga turista sa ila lang maluyagan kag kaya sang ila badyet.
Basi gusto man lang nila mag-enjoy sing swimming sa isa ka matahum nga beachline diri kag magpaayaw-ayaw lagaw sa maputi kag malawig nga baybayon sini. Basi luyag lang nila mag-bakasyon sang pila ka adlaw ukon binulan pa gani sa isa ka malinong kag matahum nga beach resort. Ukon mag-experyensya sang nature living (eco-tourism) sa isa ka ligwa nga isla. Etcetera.
Ang pasalig nga “more fun” lakip man dira ang pasalig sang security kag pag-amlig sa ila ikaayong lawas labi na gid kay nagaluntad pa ang Covid 19 sa bug-os nga kalibutan.
Gani, sa “It’s more fun in the Philppines” pa kami gihapon!/PN