By ROBERTO ‘BERT’ LADERA
NAGLIPAS na ang panahon sang sagunson kag hinali nga pagluntad sang brownout sa syudad sang Iloilo. Nangin kabahin na lamang sang mga dulumdumon ang panahon nga madamo sang mga establisemyento komersyal ang nagpanirado bangud sa tuman ka lawig nga brown-out.
Wala na sang nagluntad nga sitwasyon kon sa diin madamo nga frozen foods ang indi mapuslan, mga ice cream nga natunaw kag ginahipsan nga minilyon nga kapyerdihan sa negosyo bangud nga apektado sang brownout.
Nagsulod ang MORE Power sa sitwasyon bilang manughilot sa mga balingag nga Sistema, bilang doktor nga nagabulong sa sitwasyon kag manugsalod sang mga yamo kag reklamo sang mga konsumidor sang kuryente.
Gin-agwanta ang kahimtangan. Ginplastar ang plano kag gintrabaho sing husto. Nangayo sang lima ka tuig nga plaso agud nga mahatag ang alibyo sang sitwasyon. Nangin mahugod sa pagtrabaho tubtob nga nakita ang pag-imprubar sa ila serbisyo.
Matuod nga isa sa nagahatag sang kabalaka sa pumuluyo amo ang masami nga pagluntad sang brownout, naagyan ang ginatawag nga rotational brownout ukon kag iban pa nga sistema lamang nga maserbisyuhan ang tanan.
Sadto, nangin sablag sa pagsulod sang mga negosyo ang problema sa kakulang sang suplay sang kuryente kag ang tuman ka mahal nga sukkot sini. Nagpang-alang-alang ang mga investor sa kahangawa nga indi magmadinalag-on ang ila nga Negosyo.
Apang, ang tanan nga pag-antus may katapusan. Amat-amat na nga nasolusyunan ang problema kag naghagan-hagan ang pagsakripisyo sang mga pumuluyo.
Isa sa daku nga hangkat sa MORE Power nga madula ang kahangawa sang pumuluyo sa problema sa brownout.
Ginpahayag ni Mr. Roel Castro ang President kag CEO sang MORE Power nga sang sila ang nagsulod sa syudad sang Iloilo daku nga hangkat sa ila ang ini nga kabalaka sang mga Ilonggo kag iya mismo Nakita sa survey sadto nga ginaproblema gid sang mga pumuluyo ang masami nga pagluntad sang brownout kag ang kalidad sang serbisyo sadto.
Kon pamangkuton ang mga pumuluyo sa subong nga panahon, wala na sa listahan ang brown out nga isa sa mga nagapanguna nga ginakabalak-an sang mga Ilonggo.
Paagi sa paghimakas sang MORE Power, nalab-ot ang target nga mahagan-hagan ang pagluntad sang brownout kag patimaan man sang mas maayo nga serbisyo para sa mga pumuluyo.
Apang, wala diri nagadulog ang pagpangita pa gid sang dugang nga pagpaimprubar, dapat mas may labaw pa gid sa sini nga sitwasyon sa karon. Suno kay Mr. Roel Castro ang President kag CEO sang MORE Power nga wala sila nagadulog kag pamatuod diri ang madamo nga mga ginaobra ang MORE Power kag mga pag-imprubar nga ila ginapatigayon para nga mas masiguro ang suplay sang kuryente sa mga konsumidor ilabi na nga madamo sang investors nga nakalinya nga nagalantaw sa Iloilo bilang ila investment destination nga makahatag sa ila kinahanglanon nga kuryente.
Madamo sila sang naislan nga mga gabok nga poste, naislan nga mga daan nga linya sang kuryente. Madasig ang ila pagresponder kon may brownout, kon may sunog, kon ginsalakay ang poste, ukon ginsagairan ang linya sang kuryente.
Namedyusan nila nga mapanubo ang balayran sa kuryente kag masami nga nagapangita ang paagi kon paano mamentinar ang manubo nga presyo kag kon paano pa gid mas mapanubo ang presyo.
Ginatarget ini sang MORE Power sa tuig 2025. Ini ang handom ni Mr. Roel Castro. Luyag niya nga mas makahatag sang kalipay kag kasulhay sa mga konsumidor. Luyag niya nga mas mapanami pa gid ang ila serbisyo sa mga pumuluyo.
Suno sa iya, sa tuig 2025 wala na sang natalana nga brownout nga nagalawig sang 12 ka oras, indi pareho sang nakalipas nga lima ka tuig nga halos kada semana, kon Sabado kag kon Domingo.
Sa pagsulod sang Pebrero 2025, mabuhinan na gid ang brownout kag kon may yara gid man sang magaluntad ini bangud sa maintenance na lamang kag indi na tuman ka lawig.
Gina-amat-amat lang ang pagpaimprubar agud nga malikop ang tanan. Kon magbuylog ang pumuluyo paagi sa paghimo sang mga bagay nga indi makasablag sa tayuyon nga suplay sang kuryente, malikawan gid ang pagluntad sang brownout.
Dapat untatan na ang pagpangunyadi sang kuryente gikan sa poste agud malikawan ang sunog kag agud maproteksyunan ang mga linya sang kable. Dapat nga maghimakas sa pagpatakod sang kaugalingon nga metrohan. Malapit sa peligro ang masami nga nagasingit sang kuryenye sa poste.
Lauman naton ang mas matawhay nga calle real nga hilway sa nagasambod, nagaluyloy, kag gumon nga mga linya sang kuryente bangud sa ginapatuman nga proyekto sang MORE Power nga ilubong sa idalom sang duta ang ini nga mga linya sang kuryente.
Medyo magasto, medyo mahal ukon nagakinahanglan ang daku nga kantidad agud matigayon ang paglubong sang mga linya sang kuryente apang ang balik sini sa aton amo ang manami nga lalantawon. Wala sang sablag sa pagpanglakaton kag sa paglantaw sa mga manami nga edipisyo kag mga lugar.
Gamay nga pagpasensya kag daku nga pag-ugyon ang mahatag naton sa MORE Power agud nga maibalik niya sa aton nga mga konsumidor ang mas masanag nga tuig 2025. (bertladera@gmail.com/PN)
