MAY BASEHAN ang pagpatuman sang Department of Education sang random (indi kabug-usan) nga drug testing sa mga estudyante sa high school (Grade 7 tubtub Grade 12) diri sa pungsod.
Ginsuguran ini sang school year 2018-2019, sunu sa order sang DepEd nga ginlagdaan ni Education Secretary Leonor Briones, sang magdata na gid ang kaso sa ilegal nga droga sa mga kabataan.
Ang pila gani ka mga estudyante nadakpan indi lang sa pag-ruru sang ilegal nga droga; drug pusher pa ang iban.
Sa Estados Unidos, laban sang nagabisyo sa droga mga linghod nga nagapang-edaron sang 18 tubtub 20 anyos. Kag bisan man seguro sa iban nga pungsod, lakip ang sa aton. Sa masami, nahuyugan sang mga kabataan diri sa Estados Unidos ang recreational marijuana kag ecstacy, tungod burubarato gawa ang bili.
Ang marijuana gani pwede mabakal diri sa Pilipinas sing wala pa P20 kada gramo, nga kon shabu kag cocaine ang gamiton nagabili na sing linibu kada gramo.
Indi ini katingalahan tungod sa sini nga pang-edaron ang mga kabataan mahuyog gid sa pagpangalipay ukon recreational activities.
Kag tungod man sa ila huyog sa pag-eksperimento, madali sila matentar sa paggamit sang mga recreational drugs agud lubos ang ila kalipayan sa ila ginabuhat tubtub nga malulong na gid lang sila sa makahalalit nga droga.
Natural nga ugali ini sang mga kabataan sa diin man nga pungsod ukon kultura tungod sa kabaskug nga ganoy sang ila naturalisa.
Sa karon man gani, lihok man sang aton gobyerno ang mag-subject sa drug test sang mga empleyado, lakip na ang mga opisyales sa gobyerno kag mga pulis kag soldado naton.
***
GASADYA na gid ang kampanyahanay sa eleksyon 2019, labi na gid diri mismo sa Iloilo.
Sige ang waswas ni Boy kay Gov. Defensor sa kuno mga anomaliya nga nagakatabo sa capitol, nga ginasabat man ni gob nga may kaham-ot pa. Indi kuno mapatihan si Boy kay ang pagpang-isyu niya kontra kay gob tungod lang sa bayad sa iya.
Indi man kuno gani ang mga supporter ni gob maka-intiendi kon ngaa si gob ang iya gina-atake kay indi man si gob kandidato. Madalom ini nga pagdala sing isyu nga indi ma-intiendihan matuod sang aton ordinaryo nga pumuluyo.
May luyag man magsabat sang ginapabugal ni Congresman Ferj Biron nga maalam siya kag madinalag-on sa negosyo. Halin man siya sa imol nga nag-milyonaryo, siling pa gani niya.
Kon si Ibrahim pa, si Biron gapasanyog sang cheaper medicine, pero paano abe siya nag-milyonaryo kon barato man lang nga bulong ang iya negosyo. Segurado indi sa barato nga bulong. Basi kon sa diin, siling ni Ibrahim nga nagayumo-yumo. (w_mateojr@yahoo.com/PN)
