MASAKIT nga madulaan sang trabaho ilabi na kun madamo sang nagasalig sa imo kada adlaw.
Sa isa ka pamilyado nga tawo, kalbaryo ang magtulok sa imo pamilya ilabi na sa imo kabataan kag asawa nga nagahangla bangud wala ka sang mahatag sa ila.
Pinakamasakit sa akun sang nadulaan ako sang trabaho sa akun pinakauna nga regular nga kumpaniya. Bisan pa nga malip-ot lang ang akun pagtrabaho sa sulod sang halos tatlo ka tuig, masakit gihapon sa dughan nga talikdan ang kumpaniya nga imo una nangin kuluhaan sang palangabuhian.
Nagadugang pa gid sa kasakit kag kabug-at sang dughan ang pagtalikod sa mga katrabaho kag nangin abyan na sa kumpaniya. Ugaling nahangpan man natun kun sa masami ang kumpaniya nagapangita sang pamaagi kun sa diin sya makakinot agud makapadayun sa operasyon.
Ang mas masakit pa gid kun ang kabangdanan nga ikaw nawad-an sang trabaho kahimuan sang gobyerno. Gobyerno ang kabangdanan nga magauntat sang operasyon sang isa ka kumpaniya. umpaniya nga nabiktima sang kapintas kag dalit sang politika.
Ang natabu sa ABS-CBN isa ka dako nga paandam sa tanan nga ara sa industriya. Bisan sin-o man ang nagapungko sa Malacañang dapat indi gid pagpaakigon kay ang gamay nga problema padakuon agud may kabangdanan nga ang kumpaniya patyon.
Ayhan ang mga negosyo sa utilities kaangay sang tubig kun alang-alang lang ang paningkamot sang mga tag-iya, siguro ang iban nasarado na. Bisan ang Meralco kag Maynilad sa Manila kun alang-alang lang posible nga nanghimos naman pauli ang ila mga empliyado.
Sining panahon sang pandemya, mabudlay mawad-an sang trabaho bangud halos tanan nga kumpaniya wala sang hiring bangud apektado man ang operation. Ining mga empliyado sang ABS-CBN nga tubtob na lamang sa katapusan sang Agosto ang ila trabaho, paano ayhan sila makakita sang iban nga ulobrahan?
Paano ayhan sila makatibawas sa dalimuos nga ila atubangon?
Apisar nga dako man ang ihatag nga separation pay sa ila, apang ano ayhyan ka lawig ang pahanunot sang kwarta kun ikaw may ginabuhi nga pamilya? May sinuptan man ang iban, apang pila gid ayhan?
Masakit gid para sa ila nga madulaan sang trabaho bangud ang estado nga amo pa kuntani ang magapangapin sa ila sa abuso sang mga manggranon nga tawo, amo pa ang nag-utod sang ila paglaum sang masanag nga palaabuton.
Masakit batyagon apang kinahanglan nga atubangon! (jpranco1975@gmail.com/PN)
