UNA sa tanan, luyag ta tamyawon ang aton Manunubos nga si Hesukristo sing “Happy Birthday!” sa adlaw nga Disyembre 25.
Tungod wala ini mamitlang sa Bibliya, may nagakalain-lain nga pagpati kon san-o gid natawo si Kristo. May gapati nga dapat sa Setyembre 11. Luyag man sang iban hiwaton ini sa Enero 6. May gapati man nga sa Disyembre 25 gid, nga ginasunod sa karon sang Simbahan Catolica sumugod pa sadtong tuig 336 A.D.
Well, katoliko ang amon pamilya gani gina-selebar namon ang pagkatawo ni Kristo sa Disyembre 25, nga Christmas Day kon tawgon naton sa karon. Ang Christmas season gasugod gani sa Oktubre diri sa Filipinas.
Sa wala gapati sini, masiling lang naton nga indi man kinahanglan mag-selebrar sang birthday sa petsa gid sang pagkatawo.
Sa masami, luyag ta ibutang ini sa adlaw kon diin madamo sang aton mga himata kag mga abyan nga makatambong, katulad sang Sabado ukon Domingo nga wala sing ubra ang kalabanan. Kon kis-a, luyag ta pa gani idungan ini sa iban nga importante nga kahiwatan. Indi bala?
***
Masakit nga “pamaskwa” ang naangkon sang mag-iloy sa kamot sang wala konsyensya nga pulis, si Staff Sergeant Jonel Nuezca, sadtong balaan pa nga adlaw sang Domingo, Disyembre 20, sa Paniqui, Tarlac.
Diyablo seguro ang nagahari sa iya sadto kay bisan sa adlaw sang Diyos amo pa sina kalain ang iya ginhimo.
Tiniro patay sining sungayan nga pulis ang mag-iloy pagkatapos nga nagpuis sila sang sitahon sang pulis ang anak sini tungod sa pagpalupok sang kawayan nga kanyon sa atubangan sang balay sang mag-iloy.
Ginkilala ang mag-iloy nga sanday Sonya Gregorio kag ang anak sini nga si Frank Anthony Gregorio. Una gintiro ang iloy sing duha ka beses sa likud sang ulo. Gindason si Anthony sa ulo man samtang ginakup-an sang iloy.
Indi man masiling nga nag-depensa lang sang iya kaugalingon ang pulis kay wala ang mag-iloy bisan lipak nga dala agud bisan hampakon lang siya.
Ibutang ta pa nga nainsultuhan ang pulis sang mag-iloy sa ila pagpuis, rason bala ina agud tiruhon patay gid ang mag-iloy? Pulis siya nga ang obligasyon amo ang mag-protejer sa mga pumuluyo. Kag kon makapatay gid man ang pulis, ina kon sa akto lang nga self-defense. Gali berdugo siya sang mga pumuluyo!
Pero, ngaa ayhan nabuhat niya ato? Nakatugda ang iban nga daw gapakita ining pulis sang culture of impunity, ukon untouchable siya nga indi makapanabat sa iya kasaypanan.
Tungod ayhan ini kay ginpasalig ni Presidente Duterte ang mga pulis nga kon makasala, bisan pa kon makapatay sila sa gyera kontra droga kag mga kriminal, nga yara siya nga magadepensa sa ila?
Siling sadto ni Presidente Duterte: “I told you do not destroy my country because I will kill you!” Sa aton pa, “Indi ninyo paghalitan ang mga pumuluyo kay pamatyon ko kamo!”
Ginsiling man niya sa mga pulis: “Kon maghana sa pag-gabot sing armas tiruhon nyo dayon. In fact, kon delikado ini sila nga personalidad tiruhon dayon bisan wala pa gahana sa pag-gabot sang ila armas!”
Tungod sining pinangbungat ni Presidente, sunu sa mga human rights advocates, ini ang rason nga madamo nga drug suspects ang nagkalamatay nga wala na nakalab-ut sa husgado. Gintawag nila ining pinatyanay nga extra-judicial killing, ukon pagpamatay nga wala sing due process nga ginapatuman sang kasuguan sa tanan, kriminal ka man ukon indi.
***
Gaatubang karon si Nuezca sang duha ka counts of murder sa pagpatay sa mag-iloy.
Nangayo sing pasaylo si Nuezca, pero ginbalewala ini sang pamilya. Hustisya ang ila ginapangayo kag mapatawad lang nila siya kon makapanabat na sang iya kasal-anan sa bagay nga silot.
Ang pagpangayo sing kapatawaran nagakinahanglan sang sinseridad. Kon wala sini, bisan ang Diyos indi makapatawad sa imo. Kag kon napatawad ka na gid man, kinahanglan man ang kabayaran pa sa kasal-anan bag-o lubos ka batunon sa Langit. Isa ini ka importante nga rason kon ngaa may Purgatoryo sa pagtuo sang mga katoliko.
Maayo na lang seguro sa kay Nuezca nga direkta lang magpangayo sing kapatawaran sa Diyos, magbaton sang bagay nga silot, kag kon kulang pa nga mabayaran ini sa mga maayo nga buhat kag dapat sabton pa sa Purgatoryo sa pihak nga kinabuhi./PN
