MASUBO gid ang nadangtan sang aton mga kasimanwa sa Guimaras kag sang mga kaupdanan nila sa mapintas nga hitabo sa Iloilo Strait sadtong Sabado, Agosto 3.
Tatlo gid ka motorbanca ang nagkulob sa tunga sang lawod sadtong adlaw. Duha ini ka insidente. Ang una sadtong mga 12:30 p.m. PM ginkakulob halos dungan sang duha ka motorbanca nga gabyahe halin sa Buenavista pakadto sa Iloilo City. Ang ikaduha natabo sang mga 3:40 p.m. sang magkulob man ang isa nga nagabyahe naman halin sa Jordan padulong sa Iloilo City.
Sunu sa Philippine Coast Guard, may 86 tanan ka pasahero ang tatlo ka motorbanca, apang 75 lang ang nahingadlan sa manifesto sang byahe. Lakip seguro dira ang mga tripulante (crew) kag boat captains.
Ang duha sa manifesto nag-confirmar nga wala madayon ang ila pagbyahe, sunu sa kay Iloilo City Disaster Risk Reduction and Management Office (DRRMO) chief Donna Magno. Ang isa ginhingadlan kay Wilson Mateo sang Pandaraonan, Nueva Valencia, nga basi hinablos ko pa sa pakaisa.
Sa report diri sang Panay News, isyu sang Agosto 6, upod sang Iloilo City Hall Press Corps (ICHPC) Exclusive, 28 na ang reported dead kag anum ang missing pa. Ang ICHPC nagpahayag man nga mga 52 ang survivors.
***
Sadtong Sabado wala sing Signal No. 1 nga bagyo kag wala man sing Gale Warning, gani kampante ang tanan nga wala sing malain nga matabo sa ila pagbyahe sa Iloilo Strait.
Apang natabo ang wala ginpaabot – ang hinali nga pagwaswas sang “squall”, nga sunu sa Pagasa (Philippine Atmospheric, Geophysical and Astronomical Services Administration) may dala nga fuerte ka baskug nga hangin, hinali nga pagdalagku sang balod kag pagbubu sang mabunok nga ulan.
Amo man ini seguro ang ginatawag sang mga sakayanon sa Guimaras nga “pugada”, nga masami nagakatabo kon habagat sa bulan sang Hunyo tubtub Setyembre.
Samtang, ginapaimbestigar pa sang mga otoridad kon ano gid ang natabo, kon sin-o ang pwede mabasulan, kag kon ano pa ang kakulangan sang PCG sa ila rescue operations.
***
Indi matuod halandumon ang maabtan sing mangitngit nga panahon sa lawod, katulad sang akon na-eksperyansyahan.
Nakaagi ako kapan upod sang duha pa ka mananagat nga nagapanonton sa gab-i lapit sa ginaagyan sang mga barko sa tunga sang Guimaras kag Oton sa Iloilo, nga mga tatlo ka milya halin sa Guimaras.
Gin-abtan kami sing pugada. Nabalian kami palo sang layag kag nakapan gid sang sudlon sang dalagku nga balod. Nag-medya-bela kami kag sige lang ang limas tubtub nakaabot nga luas sa sulod sang Lawi.
Naabtan man kami sang pugada sang isa ko ka tiyo samtang nagapanagat sa sini man nga panagatan.
Nag-pugada kag nagsige pa gani ang paglain sang panahon sang sina nga gab-i. Duha kami ka sakay, kag nagdesisyon magpauli ang isa nga malapit lang sa amon kag nagsinggit pa: “Pauli na ta, bagyo na ini!”
Dugay ang pamensar sang tiyo ko kon ano ang himuon kay duha gid lang kami sa de-bela nga sakayan nga ang timbangon para sa duha ukon tatlo sa amo nga kahimtangan sang panahon.
Nag-desidir ang tiyo ko: “Bahala na, hulaton ta lang nga magpuas ang pugada”. Mga duha seguro ka oras ang tumbu-tumbu namon sa dalagku nga balod, nga nagapangamuyo lang nga tani indi mabogtu ang amon ankla kay mas delikado pa ang amon madangtan. Na-survive namon ini kag nakapauli. Maayo lang kay may hulik kami nga isa ka tangigue agud isud-an.
Sadtong naga-ubra pa ako sa isa ka inter-island nga barko sa tunga sang Bacolod kag Manila – isa ako ka freight/passage clerk nga ang trabaho tabuk-tabuk sa Manila kag Bacolod – naabtan man kami sing pugada samtang nagapatabuk na sa Antique.
Gamay gawa ang amon barko, gani napilitan kami manago sa pwerto sang Bohol. Mga a las dos na sa kaagahon sang makasulod kami sa pwerto sang Bohol.
Of course, pila man ako ka beses naabtan sang pugada samtang gapanakayon sa Iloilo Strait. Salamat wala kami maano.
Well, ining mga experiencia ko sa lawod indi ko gid malimtan. Ugaling, daw wala gid ako kadudlaan! Kon ako liwat gabakasyon, masami man ako gihapon nga naga-upod sa pagpanagat sa malayo nga kalalawran bisan may dala pirme nga kulba. Kon ngaa, ambot a! (w_mateojr@yahoo.com/PN)
