MASUBO ang 2019 para sa mga manunudlo. Ini banghud nga 11 na ka manunudlo ang napatay sa nagkalainlain nga aksidente diri sa syodad kag probinsya sang Iloilo.
Pinakaulihi diri ang kamatayun sang walo ka manunudlo nga kalakip sa mga nalumos sang naglugdang nga tatlo ka mga pumpboats sa Iloilo Strait.
Ang walo ka mga manunudlo amo sanday Ma. Zeny Anilao, Lynlyn Janolino, Ivy Grace Labordo, kag Maria Emilie Legarda sang Lambunao National High School (LNHS) sa banwa sang Lambunao kag ang ikalima amo si George Buenavista sang Agcuyawan Kalsada Elementary School sa banwa sang Barotac Nuevo. Sila nga lima nagakuha sang graduate courses sa Guimaras State University kag pauli na tabok sa Iloilo sakay sang M/B Jenny Vince sang natabu ang trahedya.
Samtang ang tatlo amo ang mga Filipino nga manunudlo nga nagatudlo sa United Arab Emirates (UAE) nga nagbakasyon lamang sa pungsod. Ginkilala ang mga ini nga sanday Jaquelyn Alferez, Andrew Valenzuela kag Eden Perales. Ang tatlo nagbakasyon lamang sa Guimaras bilang kabahin sang ila tradisyon kada tuig nga nagabisita sa mga tourist destinations sa pungsod.
Matandaan nga napatay man sadtong Hunyo ang mag-asawa nga sanday Joe Marie kag Alnie Dinah Osano sang nabungguan sang sports car samtang nagatabok sa Diversion Road. Hunyo 28 sang nabungguan man sang pick up si Elsie Bertiz, 74 anyos, retired teacher kag pumuluyo sang Barangay Palanguia, Pototan, Iloilo.
Matuod gid nga masubo ini nga tuig sa mga manunudlo. Nagbuhis sila sang kabuhi sa mga aksidente nga bunga sang pagka-iresponsable sang tawo ukon ahensya sang gobyerno.
Madamo pa kuntani sila sang mapaalam nga kabataan kag maubayan padulong sa masanag nga palaabuton. Apang gin-utas ini sang mga trahedya nga mapunggan kun ang mga tawo kag ahensya sang gobyerno responsible lang sa ila tagsa-tagsa nga katungdanan.
Masubo nga hitabu ini para sa mga nagasalig sa sining mga manunudlo. Pila ayhan ka tawo ang nagasalig sang ila pagtuon kag bisan pa sang ila pagkaon sa sining mga manunudlo?
Kabay nga hatagan sang nagakaigo nga bulig sang gobyerno ang ila mga himata. Indi lang matapos sa pagbisita kag pagpasalig. Indi lang matapos sa pikpik sang abaga kundi dapat mahatagan sila sang bulig santo man sa kun ano ang nagkadapat kag bisan pa nga labaw sa kun ano ang sarang mabulig.
Ang antun mensahe sa mga manunudlo, maghalong sa tanan nga ti-on. Unahon ang kaluwasan sang kaugalingon, labaw sa tanan./PN
