ANG ining pamangkot (sa aton titulo) nahimo naton tungod bisan ang Korte Suprema nagasayop man. Napamatud-an ini mismo sang Korte Suprema sa pag-“reverse” sini sang pila ka desisyon paagi sa Motion for Reconsideration.
In fact, gintagaan si Sereno sang 15 ka adlaw agud maka-file sang Motion for Reconsideration pagkatapos sang desisyon sang Korte Suprema sadtong Mayo 11 nga nagpatalsik na sa iya.
Indi ta lang mahibal-an ugaling kon ma-file gid man siya sing MoR. Basi indi man kon gapati siya kag ang iya kampo nga kansar lang ang MoR kay “biased” kag luto na ang panghuna-huna sang anom nga nagboto kontra sa iya.
Nalutos matuod si Chief Justice Maria Lourdes Sereno sa iya quo warranto nga kaso, 8-6, apang para sa kampo ni Sereno kag sang iya mga supporter dapat nagdaug ang iya kaso.
Ina kon nagpa-inhibit ang anom ka associate justices sunu sa panawagan ni Sereno. Kon wala ang anom, ang botohay kuntani 2-6 pabor kay Sereno.
Apang wala gid ang anom nagpa-inhibit. Nag-insistir gid sila nga indi sila “biased”, ukon wala sing ginaapinan, kag maboto sunu sa matarong nga paghusga sa quo warranto petition kontra kay Sereno. Ginsiling pa nila nga wala sing basehan ang pagpa-inhibit sa ila kag “speculation” lang ini ni Sereno.
Tungod sini, naglaum pa ang iban nga basi mapadaug pa si Sereno sa quo warranto nga kaso nga gin-file ni Solicitor General Jose Calida kontra sa iya.
Pero, kansar lang ang ila paglaum. Sa gihapon ang anom sa walo nagboto gid kontra kay Sereno – Associate Justices Teresita Leonardo-de Castro, Diosdado M. Peralta, Noel Tijam, Francis Jardeleza, Lucas P. Bersamin kag Samuel Martires.
Nagpabilin sila nga matig-a sa ila “unfriendly” nga panindugan sa House Committee on Justice sadtong gina-“hearing” ang “impeachment” nga kaso sang Chief Justice kag sa iban pa nga okasyon.
Ang anom naman nga nag-oponer amo sanday Associate Justices Antonio T. Carpio, Presbitero J. Velasco, Estela Perlas-Bernabe, Alfredo Benjamin Caguioa, Mariano C. Del Castillo, and Marvic Mario Victor Leonen.
Gin-athag nila nga ang pagpatalsik gid kay Sereno tungod sa alegasyon nga wala siya maka-file kag wala pag-sumite sang iya Statement of Assets, Liabilities and Networth (SALN) indi matarong.
Ang isa, si Associate Justice Carpio, nanindugan gid gani nga indi “proper” ang pagpatalsik kay Sereno paagi sa quo warranto. Para sa iya, ang makapatalsik gid lang kay Sereno amo ang impeachment trial sa Senado tungod impeachable officer siya.
Ang isa pa gid sa mga Associate justice, si Caguioa, nagsiling nga indi matarong ang pagpatalsik kay Sereno tungod gid lang sa alegasyon nga wala siya naka-file kag naka-sumite sang iya SALN sadtong propesor pa siya sa UP-Diliman.
May pagkaham-ot pa gani si Caguioa sa pagsiling: “Kon isa sa amon nag-kopya halin sa isa ka seatmate kag nangin justice sang Supreme Court, siya gali puede ma-remove tungod sa lack of integrity kay nag-cheat siya sadtong yara pa siya sa kolehiyo.”
Ang desisyon sang walo, sa kabug-usan nga 14 ka associate justices, kontra kay Sereno isa matuod ka “fatal” nga desisyon. Ina tungod paagi sa quo warranto napatalsik si Sereno, samtang dapat siya husgahan sang “impeachment court” sang Senado.
In fact, indi na kinahanglan ang “impeachment trial” sa Senado, sunu kay Senador Lacson, kay na-dismiss na si Sereno bisan na gid lang sa paghatag respeto sa Korte Suprema bilang pinakamataas nga hukuman sang pungsod.
Tungod sini, ano na lang ang pulos sang poder sang Senado kon puede man lang gali mapatalsik ang Chief Justice sang Solicitor General? Nagagwa nga mas mataas pa ang poder sang SolGen sa Senado nga gintagaan poder sang Konstitusyon sa pagpatalsik sang mga “impeachable officer”.
***
SORRY sa indi hungod nga error sa aton kolum sadtong Mayo 11, 2018 parti sa produksyon sang bugas sang Pilipinas sadtong 2017 nga ginkuha naton sa press release sang Philippine Rice Research Institute (PhilRice) sadtong Pebrero 2018.
Indi 16.2 metrica tonelada lang gali ang produksyon ta sang bugas, kundi 16.2 ka milyon tonelada, kag indi lang 13.1 MT ang aton “consumption”, kundi 13.1 ka milyon tonelada. Sori gid. (w_mateojr@yahoo.com/PN)
