INDI magkabalaka bangud matinlo kag masaligan ang mga karne nga ginabaligya sa mga merkado sa syudad sang Iloilo.
Ginpasalig ni Jose Ariel Castañeda ang tagpamuno sang Local Economic and Enterprises Office sang city government nga 80 tubtub 90 porsyento nga matinlo kag luwas ang mga karne nga ginabaligya sa mga merkado sang syudad sang Iloilo.
Ginhimo sini ang pahayag matapos nga makakumpiskar sang 40 ka kilo sang karne sa Iloilo Terminal Market nga ilada na ukon indi na angay pa nga konsumuhon sang bumalakal bangud nga makatuga na sang peligro sa tawo.
Naglibot ang National Meat Inspecion Service upod ang opisina sang LEEO agud nga tsekyaron ang kalidad sang mga karne nga ginabaligya diri sa syudad sang Iloilo.
Nagrason ang nagabaligya nga wala nila mamulalungan nga naglain ang karne bangud posible nga nag-brownout kag wala natapat sa sulod sang freezer rason nga nagmenyar ang iya kalidad.
Kunsabagay, aton paminsaron, indi madula ang kaangay sini nga mga hitabu sa merkado ilabi na kon wala nagahatag sang daku nga pagtalupangod ang mga nagabaligya sa kalidad sang karne nga ila ginaplastar sa mga lamesa sang ila pwesto sa merkado.
Tion na ang ipatudok sa ila ang husto kag nagakaangay nga pag-atipan sa mga karne nga ila ginabaligya kag pagtudlo sa ila kon paano mapabilin ang kalidad, katinlo kag luwas nga karne.
Panahon naman nga tun-an kon ano kadamo ang konsumo nga karne sa syudad sang Iloilo, ukon ang ginakonsumo sang mga hotel kag mga restaurant, kag ginabaligya sa mga mall ukon grocery stores.. Hibaluon kon sa diin sila nagakwa sang karne, kon sa sulod ukon sa gwa sang syudad.
Pamangkuton man ang mga manugkarne sa mga merkado sang syudad kon ano man kadamo ang ila mapaubos nga karne sa tagsa ka adlaw bangud diri sa ila nagabakal ang mga nagabaligya sang inasal kag mga naga-karinderya.
Kon mahibaluan ang mga sabat ukon datus sa sini nga palamangkutanon, makapaminsar ang city government kon diin kutob ang ikasarang sang ihawan sa gina-demand nga karne sa syudad sang Iloilo sa kada adlaw.
Matumod kag may balasehan kon bala dapat nga pasangkaron pa ang ihawan ukon mag-agda sang mga investor agud nga mapun-an ang indi masarangan sang gobyerno.
Paagi sa sini nga pagtuon, matumod kon sa diin nagakwa sang karne ang iban nga konsumidor kag matumod kon bala luwas ang ila ginakwaan sang mga karne.
Ginasiling nga masobra sa duha ka tonelada kada adlaw ang ginakonsumo sa syudad sang Iloilo apang ang datus indi pa masyado kag athag kag angay pa nga ipatigayon ang mas maid-id nga pagtuon tuhoy diri.
Dapat naton dumdumon nga naga-uswag ang syudad, madamo sang mga bisita, madamo sang mga kalan-an, kag madamo sang konsumidor sang karne nga dapat halungan kag ipasiguro nga luwas, matinlo kag kalidad ang karne nga ila ginakaon.
Indi man naton pagkalipatan ang mga nagalitson. Dapat masami man nga tsekyaron agud masiguro man ang kalidad sang ila produkto.
Tion na nga maghatag sang daku nga atensyon ang local government kag national government agencies sa sini nga bagay agud masiguro nga luwas kag matinlo ang mga karne sa merkado. (bertladera@gmail.com/PN)
