DAKU NGA kahul-anan para sa linyada sang kapulisan ang pagtaliwan sang isa ka masaligan kag hangkilan nga pulis sang Police Regional Office 6.
Indi malipod kag manegar nga nangin daku ang kontribusyon ni anay Police Colonel Marlon Tayaba sa pagpakig-away sa tanan nga sahi sang kriminalidad, sa tana nga sahi sang ilegal nga aktibidades kag ang pag-neutralize sa mga gung-an, dumalagku kag ginakahadlukan nga mga lider sang grupo nga naga-obra sang kalautan sa komunidad.
Una nga nakita ang iya abilidad kag dedikasyon sa serbisyo diri sa idalom sang hayahay sang Police Regional Office 6 sang nangin deputy chief siya sang CIDG-6 kag nangin aktibo sa iya katungdanan sa pagpanakop sa mga tawo nga nagapanago nga may salabton sa kasuguan bangud sa nahimo nga krimen.
Ginbun-ag si Tayaba sa San Carlos City, Pangasinan. Nagtapos sang iya kurso nga Bachelor of Science in Public Safety kag kabahin sang Class 1993 sang Philippine National Police Academy. Natapos man sini ang iya master’s degree in Development Management sa Pangasinan State University sadtong 2014.
Napuno sang dekorasyon ang iya pagka-opisyal sang pulis bangud sa masobra 70 ka mga medalya, awards, kag commendations nga iya naagom umpisa nga nagsulod sa pagkapulis sadtong 1988.
Sa iya pagpamuno sadto sa CIDG-6, natigayon nga nadakpan sadtong Oktubre 2014 ang suspek nga siyam ka tuig nga nagapanago bangud sa pagpatay sa radio broadcaster sa South Cotabato nga si Rolando Morales sang DWMD sadtong 2005.
Nadakpan sang hubon ni Tayaba si Servando Servano Jr., 62-anyos, sa Barangay Ungka, Jaro. Ang suspek tumandok sang Polomolok, South Cotabato kag ikalima sa lista sang most wanted person sa Region 12 nga may 140 mil pesos nga reward sa iya pagkatikma.
Nangin instrumento man si Tayaba sa pag-neutralize sa duha ka high-value target sa pagduso sang ilegal nga druga kag may mga kaso nga murder sadtong Setyembre 2016 sa Barangay Ticud, La Paz.
Tuyo kuntani nga iserbe ang warrant of arrest batok kanday Aslani Ansari alyas Boy kag Alex Mapandi alyas Angari apang ginapasuni nga nagbatu sa kapulisan rason nga naluthangan kag gindeklarar nga dead on arrival sa West Visayas State University Medical Center.
Sadtong Setyembre 2017, natigayon nga ma-neutralize sang hubon sa pagpamuno ni Tayaba ang kilala nga drug lord nga si Richard Prevendido matapos ang madugay na nga handom nga iserbe sa iya ang warrant of arrest bangud sa paglapas sa Republic Act 9165.
Kasunod sini, sadtong Pebrero 2018, natigayon man nga nadakpan ang notoryus nga si Michael Jancilan nga tirador sang napatay nga si drug group leader nga si Melvin Odicta, Sr.
Ginsiling sadto ni IPPO director Marlon Tayaba nga si Jancilan ang imbolbado sa ilegal nga pasugal kag ilegal nga druga kag ginagamit sang pila ka personalidad sa ila kaugalingon nga mga interes kag naangot sa kamatayon sang pila ka mga personalidad kaangay nanday SPO2 Rex de los Reyes sadtong Enero 2014; PO1 Rizaldy Henarios kag Freddie Animas sadtong 2013; Jimmy Punzalan sadtong Agosto 2013 kag retired police superintendent Musa Amiyong sadtong Nobyembre 2013.
Daku nga kahul-anan sa pwersa sang PRO-6 ang madulaan sang isa ka matuod nga hangaway nga dedikado sa iya trabaho kag pursigido sa paglagas sa mga tawo nga may salabton sa kasuguan.
Madamo siya sang eksperyensya sa patag-awayan kag isa siya sa mga katapo sang board of inquiry sa Mamasapano case investigation.
Nangin director sang 15th Regional Mobile Group nga nabase sa PRO-ARMM kon sa diin ginkabig siya nga Marawi hero nga nagbulig sa pagpangapin sa Marawi City.
Nangin acting Chief of Regional Staff siya sa PRO-6, nagapakigbatu sa iya ginabatyag sa lawas tubtub nga ginbawian sang kabuhi sadtong Pebrero 16.
Magapabilin sa aton balatyagon kag paminsaron ang iya pagkamatuod nga hangaway, magahatag siya sang inspirasyon sa kapulisan kag mangin salandigan sang tanan sa paghatag sang kahulugan sa ginasiling nga “a true warrior and a gentleman.”
Paalam, Police Colonel Marlon Tayaba, ang matuod nga hangaway. (bertladera@gmail.com/PN)
